رۋحاني قۇندىلىقتارىمىزدى ايشىقتاعان جوبادا مادەني مۇرالارىمىز ناسيحاتتالىپ, مەكتەپ اۋلاسىنا جينالعان قوناقتاردى ۇلتتىق داستۇرگە ساي قارسى الۋ ءراسىمى ءوتتى. اق كيمەشەك كيگەن اجەلەر شاشۋ شاشىپ, اقجارما تىلەگىن ارناسا, اقساقالدار باتا بەرىپ جاستارعا ونەگە كورسەتتى. قازاقى قوناقجايلىقتىڭ ۇلگىسى رەتىندە كەلگەن قوناقتار ۇلتتىق دامنەن اۋىز ءتيىپ, كونە ءداستۇردىڭ كوركەم ۇلگىسىن سەزىندى.
مەرەكەلىك الاڭدا وقۋشىلاردىڭ قاتىسۋىمەن اسىق اتۋ, ارقان تارتىس, قازاقشا كۇرەس, بورەنەگە شىعۋ سياقتى ۇلتتىق ويىندار ۇيىمداستىرىلدى. ارنايى ۇسىنىلعان ەتنو-كورمە كەلۋشىلەرگە ەرەكشە اسەر سىيلادى. كورمەدە ۇلتتىق ويۋ-ورنەك كومپوزيتسيالارى, قولونەر شەبەرلەرىنىڭ تۋىندىلارى كورسەتىلىپ, مەكتەپ وقۋشىلارى مەن ۇستازدارى ءان مەن كۇيدەن شاشۋ شاشتى.
شارا بارىسىندا ءسوز العان مەكتەپ ديرەكتورى انارگۇل ماندىباەۆا ناۋرىزناما ونكۇندىگىنىڭ تاربيەلىك ماڭىزىنا توقتالىپ, ايتۋلى باستاما وقۋشىلار ءۇشىن ومىرلىك قۇندىلىقتاردى بويعا سىڭىرەتىن ۇلكەن تاربيە مەكتەبى ەكەنىن اتاپ ءوتتى.
«ناۋرىزناما ونكۇندىگى – ۇلتتىڭ جادى مەن جاڭعىرۋىنىڭ توعىسقان تۇسى, ءداستۇر مەن بۇگىننىڭ اراسىن جالعاعان رۋحاني كوپىر. بۇل كەزەڭ تەك مەرەكەلىك دۋمانمەن شەكتەلمەي, ءار كۇننىڭ وزىندىك مازمۇنى ارقىلى قوعامعا, اسىرەسە جاس ۇرپاققا تەرەڭ تاعىلىم ۇسىنادى. وقۋشىلارىمىز ءۇشىن ناۋرىزناما – تاربيە مەكتەبى. مۇندا ولار ۇلكەندى قۇرمەتتەۋ, كىشىگە ىزەت كورسەتۋ, تابيعاتپەن ۇيلەسىمدە ءومىر ءسۇرۋ, ەڭبەك پەن بىرلىكتىڭ قادىرىن ءتۇسىنۋ سەكىلدى ومىرلىك ماڭىزدى قاعيدالاردى بويىنا سىڭىرەدى. ءار كۇننىڭ مازمۇنى – ءبىر-ءبىر ونەگە: قايىرىمدىلىق, ۇلتتىق ونەر, تازالىق, تاتۋلىق, جاڭارۋ. بۇل ۇعىمدار ءجاسوسپىرىم ساناسىندا ەلدىك پەن ادامگەرشىلىكتىڭ ىرگەتاسىن قالايدى. سونىمەن قاتار, ناۋرىزناما – جاستاردىڭ ۇلتتىق بولمىسىن تانۋىنا جول اشاتىن الاڭ. زاماناۋي جاھاندانۋ داۋىرىندە ءتول مادەنيەتكە دەگەن قىزىعۋشىلىقتى ارتتىرىپ, ۇلتتىق كودتى ساقتاۋدىڭ ماڭىزىن ۇعىندىرادى. دومبىرا ءۇنى, ۇلتتىق ويىندار, ءداستۇرلى تاعامدار مەن ادەت-عۇرىپتار – ءبارى دە جاس ۇرپاقتىڭ جۇرەگىنە ەلگە دەگەن سۇيىسپەنشىلىك ۇيالاتادى. ءبىزدىڭ مەكتەبىمىزدە قازاق, ورىس, ۇيعىر تىلدەرىندە ءبىلىم بەرىلەدى. ءىس-شارانىڭ ءبىر ماقساتى ولاردىڭ بارىنە ۇلتتىق سالت-داستۇرلەرىمىزدىڭ تاعىلىمىن تانىتۋ», دەيدى ءال-فارابي اتىنداعى №31 ورتا مەكتەپتىڭ ديرەكتورى انارگۇل ماندىباەۆا.
ءداستۇرلى ونەرگە ارنالعان شەبەرلىك ساعاتتارى باعدارلامانىڭ تاعى ءبىر ماڭىزدى بولىگىنە اينالدى. مۇندا قوناقتار دومبىرا جاساۋ, قىش قۇمىرا دايىنداۋ, كيىز باسۋ, شي توقۋ سياقتى ۇلتتىق قولونەر باعىتتارىمەن تانىسىپ, شەبەرلەردىڭ جۇمىسىنا ءتانتى بولدى. بىلىكتى ۇستاز قايىرعالي اتاباي ۇلى جەتەكشىلىك ەتەتىن «توعىزقۇمالاق» ۇيىرمەسىنىڭ جەتكىنشەكتەرى ەرەكشە ويىن ءتاسىلىن كورسەتتى. «بۇل ءبولىم ءداستۇرلى ونەردىڭ قىر-سىرىن زاماناۋي فورماتتا كورسەتۋگە باعىتتالعان», دەيدى ۇستازدار.
ءىس-شارادا تالعار اۋداندىق ادىستەمەلىك ورتالىعىنىڭ ادىسكەرى انار ابەۋوۆا عاسىرعا جۋىق تاريحى بار مەكتەپتىڭ تاعىلىمدى تاجىريبەسىنە جوعارى باعا بەرىپ, جينالعانداردى مەرەكەمەن قۇتتىقتادى. ءىس-شارا كونتسەرتتىك باعدارلاماعا ۇلاسىپ, «ەكى جۇلدىز» ءان بايقاۋىمەن جالعاسىن تاپتى.
الماتىدا ناۋرىز مەرەكەسىنە وراي «Nauryz Sale» اكتسياسى وتەدى
