«اتىراۋ» فۋتبول كلۋبىنىڭ ديرەكتورى قۋاندىق جاقياليەۆتىڭ ايتۋىنشا, وسىنداي سەبەپپەن قارسىلاس كوماندالاردى جەرگىلىكتى ستاديوندا قابىلدامايدى. جاسىل جەيدەلى كوماندانىڭ ويىنى باسقا قالادا وتەدى.
– پرەمەر-ليگا ويىندارىن وتكىزۋ ءۇشىن ستاديوندا 3 مىڭ ورىن, جارىق بولۋى قاجەت, باسقا دا تالاپتار بار. وسىعان بايلانىستى «مۇنايشى» ستاديونىندا كۇردەلى جوندەۋ جۇمىسىن باستاۋ كوزدەلىپ وتىر. ال «سۋدرەمونتنيك» ستاديونى جاتتىعۋ وتكىزەتىن ورىن رەتىندە سالىنعاندىقتان, پرەمەر-ليگا ويىندارىن وتكىزۋ تالابىنا سايكەس بولماي تۇر. بۇل ستاديوندى دا تالاپقا سايكەستەندىرۋ جۇمىستارى قولعا الىنادى. وسىنداي سەبەپتەر «اتىراۋ» كومانداسىنىڭ الداعى ەكى-ءۇش ايداعى ويىندارىن تۇركىستان قالاسىندا وتكىزۋگە شەشىم قابىلداندى, – دەيدى ق.جاقياليەۆ.
فۋتبول كلۋبى بيىلعى چەمپيونات قارساڭىندا باس باپكەردى اۋىستىردى. ەكى رەت باس باپكەر بولعان ۆيتالي جۋكوۆسكيدىڭ قانداي سەبەپپەن كەتكەنى بەلگىسىز. ەندى كوماندا قۇرامىن كۇشەيتۋگە ءمان بەرىلىپ وتىر. باس باپكەر لاۋازىمىنا ۆلاديمير چەبۋرين تاڭدالدى. ول 2009 جىلى «شاحتيور» كلۋبىن ەل چەمپيوناتىنىڭ قولا جۇلدەسىنە جەتكىزىپ, ەل كۋبوگىنىڭ فينالىنا شىعاردى. كەيىن «وقجەتپەس» كلۋبىن قايتادان پرەمەر-ليگاعا الىپ شىقتى. ونىڭ جەتەكشىلىگىمەن ليتۆانىڭ «سۋدۋۆا» كلۋبى ءۇش رەت ەل چەمپيونى اتاندى. وسى ەلدىڭ «جالگيريس» كلۋبى ءۇش مارتە ەل چەمپيونى, ەكى مارتە ليتۆا كۋبوگىنىڭ جەڭىمپازى اتانعان. وسىنداي جەتىستىكتەرى ءۇشىن ۆ.چەبۋرين ليتۆادا ءۇش رەت «جىل باپكەرى» اتاعىن يەلەنگەن.
كوماندا جاڭا ويىنشىلارمەن كەلىسىمشارت جاساپ جاتىر. سونىڭ ءبىرى – بەلارۋس قۇراماسىنىڭ ويىنشىسى ەگور حۆالكو. قورعاۋشى پوزيتسياسىندا وينايتىن ەگور – بيىل اتالعان كلۋبتىڭ ساپىنا قوسىلعان العاشقى لەگيونەر. ە.حۆالكو بۇعان دەيىن «نەمان» (بەلارۋس), «نەمان-2», «دنياپرو», «ارسەنال دزەرجينسك», «كياپاز» (ازەربايجان), «توبىل» (قازاقستان) كوماندالارى قۇرامىندا ويناعان.
تاعى ءبىر ويىنشى – جارتىلاي قورعاۋشى الەكساندر نويوك. 2023–2024 جىلعى فۋتبول ماۋسىمىندا «اتىراۋ» ساپىندا دوپ تەپتى. ەندى ەسكى ءارى جاڭا ويىنشى رەتىندە قايتا ورالىپ وتىر.
نيگەريالىق فۋتبولشى ماريو رابيۋ جارتىلاي قورعاۋشى پوزيتسياسىندا وينايدى. ول فۋتبولداعى كاسىبي مانسابىن يتاليانىڭ «مودەنا» كلۋبىندا باستادى. كەيىن 2023 جىلدىڭ قاڭتارىندا «ۆيتەربەزە» كلۋبىنا, ودان سوڭ البانيالىق «سكەندەربەۋ» كلۋبىنا اۋىسقان. بىلتىرعى اقپاندا «اقتوبە» كلۋبىنىڭ ساپىنا تارتىلىپ, پرەمەر-ليگادا بەس ويىن وتكىزگەن.
وسىنداي دەڭگەيى بار «اتىراۋ» فۋتبول كلۋبى ساتىلۋى مۇمكىن بە؟ بۇل ساۋال جەرگىلىكتى جانكۇيەرلەردى تولعاندىرىپ ءجۇر. وبلىستىق دەنەشىنىقتىرۋ, سپورت جانە تۋريزم باسقارماسىنىڭ باسشىسى نۇربول سىدىقوۆتىڭ ايتۋىنا قاراعاندا, كوماندانى جەكەنىڭ يەلىگىنە بەرۋ جوسپارى بار. وسىعان بايلانىستى كلۋبتىڭ ناقتى قۇنى ەسەپتەلىپ, جەكەگە ساتۋعا كونكۋرس جاريالاندى. كلۋبتىڭ باستاپقى قۇنى 175,6 ملن تەڭگەگە باعالانىپ وتىر. نارىقتىق قۇنى – 250,8 ملن تەڭگە.
فۋتبول كلۋبىن ساتىپ الاتىن ينۆەستورعا بىرنەشە تارماقتان تۇراتىن مىندەتتى ورىنداۋ جۇكتەلىپ وتىر. بىرىنشىدەن, ينۆەستور قۇنى 1 ملرد تەڭگەدەن كەم ەمەس فۋتبول اكادەمياسىن اشۋعا ءتيىس. ەكىنشىدەن, 8 660 ورىنعا ەسەپتەلگەن «مۇنايشى» ستاديونىنا يەلىك ەتىپ, ينفراقۇرىلىمىن جەتىلدىرۋى قاجەت. ۇشىنشىدەن, الداعى ءۇش جىلدا فۋتبول ورتالىعىندا كەمىندە 1 مىڭ بالانى تەگىن وقىتۋى كەرەك. كلۋبتىڭ نەگىزگى قۇرامىنا جەرگىلىكتى تاربيەلەنۋشىلەردى تارتۋ جۇكتەلىپ وتىر. تورتىنشىدەن, جىل سايىن قارجىلىق كىرىس-شىعىسقا قاتىستى اۋديتورلىق تەكسەرۋ وتكىزىپ, مەملەكەتتىك ورگاندارعا ەسەپ بەرەدى. بەسىنشىدەن, كلۋبتىڭ وسى كەزگە دەيىنگى برەندىن ساقتايدى. دەمەك, تاريحي اتاۋىن, ءتۇسى مەن ەمبلەماسىن قۇزىرلى ورگانداردىڭ كەلىسىمىنسىز وزگەرتۋگە قاتاڭ تىيىم سالىنادى.
– جەكەشەلەندىرۋ تالاپقا سايكەس جۇرگىزىلەدى. سونىڭ اياسىندا «اتىراۋ» فۋتبول كلۋبىن جەكە يەلىككە ساتۋ جونىندە شەشىم قابىلداندى. الەۋمەتتىك جەلىدە كلۋبتىڭ جاڭا يەسى كىم بولاتىنى جونىندە جازبا تارادى. الايدا كلۋبتى كىم ساتىپ الاتىنى ازىرگە بەلگىسىز. كلۋبتىڭ جاڭا يەسى تەندەردىڭ قورىتىندىسىمەن بەلگىلى بولادى. قازىر الەۋەتتى كاسىپكەرلەرمەن كەلىسسوزدەر جۇرگىزىلىپ جاتىر, – دەپ مالىمدەدى ن.سىدىقوۆ.
اتىراۋ وبلىسى
