دونالد ترامپ CNN تەلەارناسىنا بەرگەن سۇحباتىندا امەريكالىق اسكەر يرانعا جويقىن سوققى جاساپ جاتقانىن, الايدا نەگىزگى كەزەڭ ءالى باستالماعانىن جەتكىزدى.
ء«بىز ولاردى تاس-تالقان ەتىپ جاتىرمىز. مەنىڭشە, ءبارى وتە جاقسى ءجۇرىپ جاتىر. بۇل وتە قۋاتتى ارەكەت. ءبىزدىڭ ارميا – الەمدەگى ەڭ مىقتى ارميا, جانە ءبىز ونى پايدالانىپ وتىرمىز. <...> ءبىز ولارعا ءالى شىن مانىندە كۇشتى سوققى جاساعان جوقپىز. ۇلكەن تولقىن ءالى الدا. ال ۇلكەن تولقىن جاقىن ارادا كەلەدى», دەدى ترامپ CNN جۇرگىزۋشىسى دجەيك تاپپەرگە بەرگەن سۇحباتىندا.
پرەزيدەنتتىڭ ايتۋىنشا, ءوزى ءۇشىن «ەڭ ۇلكەن توسىنسىي» يراننىڭ وڭىردەگى اراب مەملەكەتتەرىنە جاساعان شابۋىلدارى بولعان. اتاپ ايتقاندا, باحرەين, يوردانيا, كۋۆەيت, قاتار جانە بىرىككەن اراب امىرلىكتەرى اتالدى.
اق ءۇي باسشىسى كومانداسىنىڭ تەگەرانمەن كەلىسسوز جۇرگىزۋگە تىرىسقانىن, الايدا مامىلەگە كەلە الماعانىن مالىمدەدى. ونىڭ سوزىنشە, يران ۋراندى بايىتۋدى توقتاتۋعا كەلىسپەگەن. ءاربىر جاڭا ۇسىنىس الدىڭعى كەلىسىمدەردەن باس تارتۋمەن اياقتالعان.
New York Post باسىلىمىنا بەرگەن سۇحباتىندا ترامپ قاجەت بولعان جاعدايدا يران اۋماعىنا امەريكالىق اسكەر جىبەرۋ مۇمكىندىگىن دە جوققا شىعارمادى.
«قۇرلىقتاعى اسكەر ەنگىزۋگە قاتىستى مەندە ەشقانداي الاڭداۋشىلىق جوق. كوپتەگەن پرەزيدەنتتەر: «قۇرلىقتاعى اسكەر بولمايدى» دەپ ايتادى. مەن ولاي دەمەيمىن. مەن: «مۇمكىن, قاجەت بولماس نەمەسە ەگەر قاجەت بولسا" دەيمىن», دەدى دونالد ترامپ.
بۇعان دەيىن ول يرانعا قارسى شابۋىل شامامەن ءتورت اپتاعا سوزىلۋى مۇمكىن ەكەنىن ايتقان ەدى. كەيىن وپەراتسيا جوسپارلانعان مەرزىمنەن دە ۇزاققا سوزىلۋى ىقتيمال ەكەنىن مەڭزەدى.
بۇگىن ترامپ قازا تاپقان ءتورت امەريكالىق ساربازدى قۇرمەت مەدالىمەن ماراپاتتاۋ ءراسىمىن وتكىزەدى. اقش-تىڭ ورتالىق قولباسشىلىعى بىرلەسكەن امەريكالىق-يزرايلدىك شابۋىل كەزىندە اسكەري قىزمەتشىلەردىڭ قازا بولعانىن راستاعان.
28 اقپاندا ترامپ يراننىڭ جوعارعى كوشباسشىسى اياتوللا ءالي حامەنەي قازا تاپقانىن مالىمدەدى. كەيىن بۇل اقپاراتتى يران تاراپى راستادى.
يران اياتوللا حامەنەيدىڭ قازاسىن راستادى: ەلدە 40 كۇندىك ازا تۇتۋ جاريالاندى
تاياۋ شىعىستاعى احۋال وسىلايشا جاڭا كەزەڭگە ءوتتى. ۆاشينگتون قاتاڭ اسكەري ستسەناريدەن باس تارتپايتىنىن اڭعارتسا, ءوڭىر ەلدەرى گەوساياسي تەپە-تەڭدىكتىڭ بۇزىلۋ قاۋپىن ءجىتى باقىلاپ وتىر.
