قاۋىپسىزدىك ماسەلەلەرى جونىندەگى ۇنقاتىسۋ جالعاسۋدا

سەنات توراعاسى قاسىم-جومارت توقاەۆ ناتو پارلامەنتتىك اسسامبلەياسى قاۋىپسىزدىكتىڭ ازاماتتىق ولشەمى جونىندەگى كوميتەتىنىڭ توراعاسى ۆيتالينو كاناش باستاعان دەلەگاتسياسىمەن كەزدەستى. ناتو پا دەلەگاتسياسىنىڭ قۇرامىندا پورتۋگاليا, فرانتسيا, پولشا, ۇلىبريتانيا, گرەكيا, يتاليا جانە لاتۆيا دەپۋتاتتارى بار, دەپ حابارلادى سەناتتىڭ ءباسپاسوز قىزمەتى.  كەزدەسۋدى اشقان ق.توقاەۆ قازاقستان ايماقتىق قاۋىپسىزدىكتى قامتاماسىز ەتۋ تۇرعىسىندا ناتو-مەن ىنتىماقتاستىققا زور ءمان بەرەدى, دەپ اتاپ ءوتتى. توراعا قازاقستان پارلامەنتى ناتو پارلامەنتتىك اسسامبلەيا قىزمەتىنە بايقاۋشى رەتىندە قاتىساتىنىن جانە ونىڭ جىل سايىنعى سەسسياسىنا تۇراقتى تۇردە قاتىسىپ كەلە جاتقانىنا توقتالدى. ول, سونداي-اق 2009 جىلى استانادا ناتو پا-مەن بىرلەسە وتىرىپ, ەۋرواتلانتيكالىق قاۋىپسىزدىك, وعان قوسا اۋعانستان جانە ورتالىق ازياداعى قاۋىپسىزدىك ماسەلەلەرى جونىندەگى روۋز-روت سەمينارى تابىستى وتكەنىن ەسكە سالدى. ق.توقاەۆ پرەزيدەنت ن.نا­زار­باەۆتىڭ ەلىمىزدى جان-جاقتى جاڭعىرتۋعا باعىتتالعان بەس ينس­تيتۋتتىق رەفورماسى, سونداي-اق, قازاقستاندىق پارلامەنتاريزمنىڭ دامۋى مەن سەنات قىزمەتى تۋرالى ايتتى. ءوز كەزەگىندە ۆ.كاناش قا­زاقستان ناتو پا-نىڭ ورتا­لىق ازياداعى ەڭ جاقىن ارىپتەسى ەكە­نىن, سوندىقتان ۇيىم قازاقستاندىق پارلامەنتشىلەرمەن بايلانىستى ودان ءارى نىعايتۋعا نيەتتەنىپ وتىر­عانىن اتاپ ءوتتى. فرانتسۋز سەناتورى جوەل گارريو-مەيلام فرانتسيا سەناتى توراعاسىنىڭ سالەمىن جەتكىزىپ, بەيبىتشىلىكتى نىعايتۋ جو­لىندا پارلامەنتارالىق ۇنقا­تىسۋ مەن پارلامەنتتىك ديپلو­ماتيانىڭ ماڭىزى تۋرالى پىكىر ءبىلدىردى. ول اۋماقتىق تۇراقتىلىق پەن قاۋىپسىزدىكتى قامتاماسىز ەتۋگە ارنالعان قازاقستاننىڭ كۇش-جىگەرىن جوعارى باعالادى. فرانتسيانىڭ تاعى ءبىر دەپۋتاتى جان-ميشەل ۆيوم ەۋروپا مەن ازيا اراسىنداعى كوپىر رەتىندەگى جانە ۋكرايناداعى شيەلەنىسكەن جاعدايدى رەتتەۋدەگى قازاقستاننىڭ ءرولىن ەرەكشە ءبولىپ ايتتى. كەزدەسۋ بارىسىندا ەۋرو­پا­داعى بوسقىندار, تەرروريزممەن  جانە ەكسترەميزممەن كۇرەس, حالىق­ارالىق پارلامەنتتىك ۇيىمدار ماسەلەلەرى بويىنشا پىكىر الماسىلدى.