قىزىلوردا وبلىسىندا مال ۇرلىعى ازايار ەمەس

استانا. 26 ناۋرىز. قىزىلوردا وبلىسى اكىمدىگىنىڭ احۋال ورتالىعىندا وبلىستىق قۇقىق قورعاۋ ورگاندارىنىڭ زاڭدىلىقتى, قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ جوسپاردان تىس كوشپەلى وتىرىسى ءوتتى. بۇل تۋرالى وبلىستىق پروكۋراتۋرانىڭ ءباسپاسوز قىزمەتى حابارلادى. وتىرىسقا وبلىس اكىمىنىڭ ورىنباسارى س.قوجانيازوۆ جانە ونلاين-رەجيمدەگى بەينەبايلانىس ارقىلى قالا, اۋدان اكىمدەرى مەن قۇقىق قورعاۋ جانە ارناۋلى ورگانداردىڭ باسشىلارى مەن قىزمەتكەرلەرى قاتىستى. جيىندا مال ۇرلىعىمەن كۇرەستە جانە اشكەرەلەۋدە ىشكى ىستەر ورگاندارىنىڭ اتقارعان جۇمىستارىنىڭ تيىمدىلىگى مەن زاڭدىلىققا باعىتتالعان مۇددەلى ورگانداردىڭ جۇمىستارىنىڭ پارمەندىلىگى تالقىلاندى. وبلىستىڭ ەلدى مەكەندەردەگى تۇرعىندارى, نەگىزىنەن مال شارۋاشىلىعىمەن اينالىسىپ, حالىقتىڭ قوسالقى, كەي جانۇيالاردىڭ نەگىزگى كۇن كورىس كوزدەرىن قۇرايدى. بىلتىر وبلىس كولەمىندە 783 مال ۇرلىعى قىلمىسى تىركەلىپ, ونىڭ 374-ءى توپپەن جاسالعان. ال 2015 جىلدىڭ 2 ايىندا وسى ساناتتا 234 قىلمىستىق قۇقىق بۇزۋشىلىق بىرىڭعاي تىزىلىمگە تىركەلىپ, 169-ى ءىرى قارا مەن 65 ۇساق مال قولدى بولعان. اتالعان قىلمىستار ەسىك الدىنداعى قورادان, ورىستە, تاس جول بويىندا جايىلىپ جۇرگەن جەرىنەن ۇرلانعان. مال ۇرلىعى قىلمىستارىنىڭ ءوسۋىنىڭ بىردەن-ءبىر سەبەبى – قوماقتى پايدا تابۋ جانە ۇرلانعان مالدى وتكىزۋ ورىندارىنىڭ بولۋى, مالدارىنىڭ جوعالعانى تۋرالى يەلەرىنىڭ قۇقىق قورعاۋ ورگاندارىنا كەش حابارلاسۋى بولىپ وتىر. سونىمەن قاتار, مال شارۋاشىلىعىمەن اينالىساتىن شارۋا-قوجالىق يەلەرى مال قورالارىنا ءتيىستى نازار اۋدارمايدى. كۇزەتشى, باقتاشى جالداۋدان باس تارتۋى ۇرلىق جاساۋعا ىقپالىن تيگىزۋدە. جالپى, وبلىس كولەمىندەگى 147 اۋىلدىق وكرۋگتىڭ 66-دا عانا پادا ۇيىمداستىرىلىپ, باقتاشىمەن قامتىلعان. مىسالى, قازالى اۋدانى, «قىزىلقۇم» اۋىلدىق وكرۋگىندە پادا جۇمىستارىن ءتيىستى دەڭگەيدە ۇيىمداستىرۋ ناتيجەسىندە سوڭعى ەكى جىل كولەمىندە بىردە -ءبىر مال ۇرلىعى ورىن الماعان. ال وسى اۋداننىڭ «قاراشەڭگەل» اۋىلدىق وكرۋگىندە پادا مەن باقتاشى قامتاماسىز ەتىلمەۋىنەن, 2014 جىلدىڭ وزىندە 50 مال ۇرلىعى تىركەلىپ, 72 باس مال ء(ىرى قارا-36, جىلقى-24, ۋاق مال-12) قولدى بولعان. 2014 جىلى سوتتاردا وسى ساناتتا بارلىعى 19 قىلمىستىق ءىس قارالىپ, ونىڭ 8 ءىس بويىنشا 14 ادامعا قاتىستى ايىپتاۋ ۇكىمدەرى قابىلدانسا, 20 ادام جونىندە 11 قىلمىستىق ءىس تاراپتاردىڭ ءوزارا تاتۋلاسۋىنا بايلانىستى اقتالمايتىن نەگىزبەن وندىرىستەن قىسقارتىلعان. مىسالى, بۇرىن مال ۇرلىعى ءۇشىن سوتتى بولعان م.ەرمەكباەۆ شيەلى اۋدانى, ن.بەكەجانوۆ اۋىلىنىڭ تۇرعىنى كەنجاليەۆتىڭ اۋلاسىنداعى 1 200 000 تەڭگە تۇراتىن توعىز جاسار اسىل تۇقىمدى جىلقىسىن ۇرلاعانى ءۇشىن, اۋداندىق سوتتىڭ ۇكىمىمەن 5 جىلعا باس بوستاندىعىنان ايىرىلدى. وتىرىس سوڭىندا كەڭەس مۇشەلەرىمەن جوعارىدا كەلتىرىلگەن اقپاراتتار نازارعا الىنىپ, ناتيجەسى تالقىلانىپ, بىرلەسكەن ءىس-شارالار قابىلدانىپ, قۇقىق قورعاۋ جانە اتقارۋشى ورگاندارعا ءتيىستى تاپسىرمالار بەرىلدى. سونىمەن قاتار, قىزىلوردا وبلىستىق پروكۋراتۋراسىمەن وبلىس بويىنشا مال ۇرلىعى قىلمىسىنىڭ تولقۇجاتى مەن ادىستەمەلىك قۇرالدار ازىرلەنىپ, قۇقىق قورعاۋ ورگاندارىنا تاراتىلدى. جولدىباي بازار. دەرەك: قىزىلوردا وبلىستىق پروكۋراتۋراسىنىڭ ءباسپاسوز قىزمەتى. سۋرەت: azattyg.org.