دياس دوسقاراەۆ كەزىندە جاقسى ويىنشى بولدى. تۋعان اعاسى ولجاس ەكەۋى عاسىرلار توعىسىندا ءتۇرلى جارىستاردا اتوي سالدى. اعايىندىلار بىرقاتار ەلىشىلىك, حالىقارالىق دودادا دارالاندى. ولجاس – قازاق تەننيسشىلەرى اراسىنان شىققان تۇڭعىش سپورت شەبەرى. الايدا ول ءبىلىم-ءىلىمنىڭ جولىنا ءتۇسىپ, اقش-قا اتتاندى دا, ۇلكەن سپورتپەن قوش ايتىستى. ءسويتىپ, سپورتتىق مانسابىن ەرتە اياقتادى. دياس تا امەريكاداعى وڭتۇستىك الاباما ۋنيۆەرسيتەتىندە وقىدى. دەگەنمەن تەننيستەن قول ۇزبەدى. كەزىندە يسپانيادا, ايگىلى ەميليو سانچەس اكادەمياسىندا شەبەرلىگىن شىڭداعان دوسقاراەۆ ەلىمىزدىڭ ەكىنشى راكەتكاسى دارەجەسىنە دەيىن جەتتى. سول كەزدەرى «Egemen Qazaqstan» گازەتىندە حالىقارالىق جارىستاردا ەلەۋلى تابىستارعا قول جەتكىزىپ جۇرگەن جالعىز قازاق تەننيسشىسى جايىندا قۇلاش-قۇلاش ماقالالاردىڭ جارىق كورگەنى كوزىقاراقتى وقىرمانداردىڭ ەسىندە بولار.
كورتپەن قوش ايتىسقاننان كەيىن دە دياس باۋىرجان ۇلى ۇلكەن سپورتتان الىستاعان جوق. فەدەراتسيادا بىرقاتار باسشىلىق قىزمەت اتقاردى. 2012–2019 جىلدار ارالىعىندا ۇلتتىق قۇرامانىڭ كاپيتانى بولدى. سول كەزدەرى جەرلەستەرىمىز ءۇش رەت دەۆيس كۋبوگىنىڭ شيرەك فينالىندا وينادى. 2019 جىلى جاڭا فورماتتاعى جارىستىڭ فينالىنا شىقتى. ودان كەيىن ۇيىمنىڭ ۆيتسە-پرەزيدەنتى بولدى. بۇل رەتتە دە د.دوسقاراەۆ ءبىراز شارۋا تىندىرىپ, ۇنەمى يگى ىستەردىڭ باسى-قاسىنان تابىلدى. ەندى, مىنە, رەسپۋبليكالىق تەننيس فەدەراتسياسىنىڭ پرەزيدەنتى بولات وتەمۇراتوۆ قازاق مامانىنىڭ ىسكەرلىگى مەن بىلىمدارلىعىن, تالاپشىلدىعى مەن تاباندىلىعىن, ءوز ىسىنە دەگەن ادالدىعى مەن ۇيىمداستىرۋشىلىق قابىلەتىن ەسكەرىپ, وعان ءدۇبىرلى دودا قارساڭىندا اسا جاۋاپتى مىندەت جۇكتەدى. بۇل مىندەتتى دياستىڭ ابىرويمەن اتقاراتىنىنا سەنىم مول.
