فوتو: gov.kz
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمدەۋىنشە 2026 جىلعى 1 قاڭتارداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 57,4%-دى, ەڭبەككە قابىلەتتى جاستان كىشى 34%-دى جانە زەينەتكەرلەر 8,6%-دى قۇراعان. ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 15%-ى جوعارى ءبىلىمدى, 27,5%-ى ورتا كاسىبي ءبىلىمدى, 51,2%-ى جالپى ورتا ءبىلىمدى, 6,3%-نىڭ ءبىلىمى جوق.
قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستانعان.
«قانداستاردى قونىستاندىرۋ ءۇشىن ەڭبەك كۇشى تاپشى اقمولا, اباي, قوستاناي, پاۆلودار, اتىراۋ, باتىس, شىعىس جانە سولتۇستىك قازاقستان وبلىستارى انىقتالدى. وسى وڭىرلەرگە قونىستانعان قانداستارعا – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (275,2 مىڭ تەڭگە) مولشەرىندە, تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (59-دان 118 مىڭ تەڭگەگە دەيىن) مولشەرىندە سۋبسيديا تۇرىندەگى مەملەكەتتىك قولداۋ ۇسىنىلادى. 1 834 قانداسقا ءتۇرلى قولداۋ شارالارى كورسەتىلدى. 428 ادام تۇراقتى جۇمىسقا ورنالاستىرىلدى», دەلىنگەن مينيسترلىك حابارلاماسىندا.
دەپۋتاتتار قانداستارعا گرانت بەرۋ مەرزىمىن 5 جىلعا سوزۋدى ۇسىندى
سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلدانعان.
«سونىمەن قاتار تۇرعىن ءۇي ساتىپ الۋ جانە سالۋ ءۇشىن ەكونوميكالىق ۇتقىرلىق سەرتيفيكاتى ەنگىزىلدى. وتكەن جىلى اتالعان سەرتيفيكاتتى 586 وتباسى الدى. 2026 جىلعى 1 قاڭتاردان باستاپ ەكونوميكالىق ۇتقىرلىق سەرتيفيكاتىنىڭ مولشەرى 1 625 اەك-كە دەيىن ۇلعايتىلدى», دەلىنگەن ۆەدومستۆو مالىمەتىندە.
