مەگاپوليستەگى بالالار اۋرۋحاناسىنىڭ نەيروحيرۋرگتەرى قىتايلىق بىلىكتى ماماننىڭ قاتىسۋىمەن العاش رەت جامباس مۇشەلەرى قىزمەتىنىڭ بۇزىلۋى بار 15, 17 جاستاعى ەكى جاسوسپىرىمگە جوعارى تەحنولوگيالىق وپەراتسيا جاسادى. بۇل پاتسيەنتتەر ومىرگە ج ۇلىننىڭ ءتۋابىتتى اقاۋى – «spina bifida» دياگنوزىمەن كەلگەن. دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرىنە سۇيەنسەك, اتالعان پاتولوگيا جاڭا تۋعان ءاربىر مىڭ نارەستەنىڭ ءبىر-ەكەۋىندە عانا كەزدەسەدى ەكەن.
اۋرۋحانا ديرەكتورى مارات راباندياروۆتىڭ ايتۋىنشا, مۇنداي اۋىر دياگنوز ناۋقاستىڭ ءومىر ءسۇرۋ ساپاسىنا كەرى اسەرىن تيگىزەدى. اتاپ ايتقاندا, اياق بۇلشىق ەتتەرى السىزدەنىپ, جۇكتەمە تۇسكەندە اۋىرسىنۋ پايدا بولادى, ەڭ قيىنى – كىشى, ۇلكەن دارەتتى ۇستاۋ فۋنكتسيالارى بۇزىلادى.
مۇنداي جاعدايدا بالالار قاتارلاستارى سەكىلدى ەركىن قوزعالىپ, سپورتپەن شۇعىلدانا المايدى. بۇل فيزيكالىق شەكتەۋمەن قوسا, جاسوسپىرىمدەردى الەۋمەتتىك, پسيحولوگيالىق تۇرعىدان وقشاۋلاپ, كۇيزەلىسكە ۇشىراتاتىنى بەلگىلى. كونسەرۆاتيۆتى ەم-دوم كۇتكەن ناتيجەنى بەرمەيتىندىكتەن, زاماناۋي مەديتسينا ساكرالدى نەيروستيمۋلياتسيا ورناتۋعا, ياعني ماسەلەنى حيرۋرگيالىق جولمەن شەشۋگە باسىمدىق بەرەدى.
كۇردەلى وپەراتسيا بارىسىندا اۋرۋحانانىڭ بىلىكتى نەيروحيرۋرگتەرى دانيار سابدەناليەۆ, ازامات جايىلعانوۆ, روزا تانتساروۆا, انەستەزيولوگ جاندوس شولاقوۆ قىتايلىق پروفەسسور گۋان يۋينحۋەيمەن تىزە قوسا وتىرىپ, ناۋقاستاردىڭ سەگىزكوزىنە ستيمۋلياتوردى ءساتتى ورناتتى. قاراپايىم تىلمەن تۇسىندىرسەك, بۇل قۇرىلعى سەگىزكوز كانالدارىنا ەلەكترلىك يمپۋلس بەرۋ ارقىلى اۋىرسىنۋدى باسىپ, ورگانداردىڭ جۇمىسىن جاقسارتۋعا مۇمكىندىك بەرەدى.
ناۋقاستاردى ىرىكتەۋ, ستيمۋلياتوردى باپتاۋ جۇمىستارىن جۇرگىزگەن نەۆروپاتولوگ-نەيروفيزيولوگ گۇلنۇر قاسەنوۆا وپەراتسيادان كەيىن پاتسيەنتتەردىڭ دەنساۋلىعىندا وڭ ديناميكا بايقالىپ, ءزار شىعارۋ قىزمەتىنىڭ جاقسارعانىن اتاپ ءوتتى.
الەمنىڭ جەتەكشى كلينيكالارىندا كەڭىنەن قولدانىلاتىن وزىق ءادىستىڭ الماتىداعى ءىرى بالالار اۋرۋحاناسىندا قولعا الىنۋى – وتاندىق دەنساۋلىق ساقتاۋ سالاسىنداعى ەلەۋلى وقيعا. بۇل باستاما حيرۋرگيالىق كومەككە مۇقتاج تالاي بالدىرعاننىڭ تولىققاندى ومىرگە ورالۋىنا جول اشادى.
ايتا كەتەيىك, جوعارى تەحنولوگيالىق وپەراتسيالار مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا تەگىن جاسالدى. جالپى, ەلىمىزدەگى بارلىق بالا مەملەكەت تاراپىنان ساقتاندىرىلعان ساناتقا جاتادى.
الماتى
