فوتو: turkystan.kz
اۋىل شارۋاشىلىعى ۆيتسە-ءمينيسترى ازات سۇلتانوۆتىڭ حابارلاۋىنشا, 2026 جىلى وڭىرلەر الەۋمەتتىك ماڭىزى بار كوكونىستەردىڭ, ەڭ الدىمەن كارتوپ پەن ءسابىزدىڭ ەگىس القاپتارىن ۇلعايتۋى قاجەت.
ونىڭ ايتۋىنشا, وتكەن جىلى كارتوپ ەگىسىن ارتتىرۋ بويىنشا ماقساتتى جۇمىس جۇرگىزىلىپ, ۇيىمداسقان شارۋاشىلىقتارداعى ەگىس كولەمى 12,5 مىڭ گەكتارعا ۇلعايعان.
ء«ونىم كولەمى نارىقتاعى باعا تۇراقتىلىعىنا تىكەلەي اسەر ەتەدى. وسىعان بايلانىستى وڭىرلەر تۇپكىلىكتى ەگىس قۇرىلىمىن بەكىتۋ كەزىندە ءسابىز ەگىسىن ۇلعايتۋ مىندەتىن ەسكەرۋى قاجەت», دەپ اتاپ ءوتتى ۆيتسە-مينيستر.
سونداي-اق بولجامدى ەگىس قۇرىلىمىندا قاراقۇمىق ەگىس القاپتارىن كەزەڭ-كەزەڭىمەن ۇلعايتۋ كوزدەلگەن. 2026 جىلى ونىڭ ەگىسىن 101 مىڭ گەكتارعا دەيىن ۇلعايتۋ جوسپارلانىپ وتىر (2025 جىلى – 91 مىڭ گەكتار). وڭىرلەرگە بەلگىلەنگەن ينديكاتورلارعا قول جەتكىزۋدى قامتاماسىز ەتۋ تاپسىرىلدى.
كوكتەمگى ەگىس جۇمىستارى ءۇشىن شارۋالار ەرتە قارجىلاندىرىلادى
جۇگەرى ەگىسىن كەڭەيتۋگە دە ەرەكشە نازار اۋدارىلدى. ەگىس القاپتارىنىڭ ايتارلىقتاي ۇلعايۋى جامبىل وبلىسىندا جۇگەرىنى تەرەڭ وڭدەۋ بويىنشا Fufeng Group كومپانياسىنىڭ جاڭا تىك ينتەگراتسيالانعان ونەركاسىپتىك پاركىن, سونداي-اق تۇركىستان وبلىسىنداعى «قازكراحمال» جشس-ءنىڭ كراحمالدى سىرنە ءوندىرۋ زاۋىتىن شيكىزاتپەن قامتاماسىز ەتۋ ءۇشىن قاجەت.
جاڭا وندىرىستەردىڭ قاجەتتىلىگىن تەك وڭتۇستىك وڭىرلەر ەسەبىنەن قامتاماسىز ەتۋ مۇمكىن ەمەس. وسىعان بايلانىستى ءۇش سولتۇستىكتەگى استىق ەگەتىن وڭىردە جۇگەرى ەگىس القاپتارىن ارقايسىسىندا ورتا ەسەپپەن 15 مىڭ گەكتارعا ۇلعايتۋ مىندەتى قويىلدى.
اۋىل شارۋاشىلىعى مينيسترلىگى ءوز تاراپىنان ۇلتتىق اگرارلىق عىلىمي-ءبىلىم بەرۋ ورتالىعىمەن جانە مەملەكەتتىك سورت سىناۋ كوميسسياسىمەن بىرلەسىپ, وڭىرلەرگە ادىستەمەلىك جانە تەحنولوگيالىق قولداۋ كورسەتۋگە دايىن ەكەنىن ءبىلدىردى. بۇل سولتۇستىك وڭىرلەردىڭ جاعدايىنا بەيىمدەلگەن ءوسىرۋ تەحنولوگيالارىن ەنگىزۋ جانە سايكەس سورتتاردى ىرىكتەۋ بولىگىندە جۇزەگە اسىرىلادى.
قوسىمشا اۋىل شارۋاشىلىعى مينيسترلىگى جۇگەرى وسىرۋدە پراكتيكالىق كومەك كورسەتۋگە دايىن ەكەنىن بىلدىرگەن قىتايلىق كومپانيامەن كەزدەسۋ وتكىزدى. قىتاي تاراپى توپىراق-كليماتتىق جاعدايلارى ۇقساس قىتايدىڭ سولتۇستىك وڭىرلەرىندە جۇگەرى ءوسىرۋ تاجىريبەسىمەن بولىسۋگە, سونداي-اق وسىنداي جاعدايلارعا بەيىمدەلگەن تەحنولوگيالار مەن سورتتاردى ۇسىنۋعا دايىن. وسىعان بايلانىستى وڭىرلەرگە حالىقارالىق تاجىريبەنى ەسكەرە وتىرىپ, جۇگەرى ەگىسىن كەڭەيتۋ باعىتىنداعى جۇمىستى جانداندىرۋ ۇسىنىلدى.
وڭىرلەرگە مينەرالدى تىڭايتقىشتاردى جونەلتۋ باستالعان. اۋىل شارۋاشىلىعى مينيسترلىگى «قازفوسفات» جشس-مەن 2026 جىلى امموفوستىڭ قوسىلعان قۇن سالىعىن ەسەپتەمەگەندەگى تونناسىنا 254 مىڭ تەڭگە دەڭگەيىندە (وتكەن جىلمەن سالىستىرعاندا 15%-عا جوعارى) بەكىتىلگەن باعا بەلگىلەۋ تۋرالى مەموراندۋمعا قول قويدى. قازىر اۋىل شارۋاشىلىعى تاۋار وندىرۋشىلەرىمەن شارتتار جاساسۋ جانە جەتكىزۋ كەستەلەرىن كەلىسۋ جۇمىستارىن جۇرگىزىپ جاتىر.
2025 جىلى كوكتەمگى ەگىس جانە جيناۋ جۇمىستارىن جۇرگىزۋ ءۇشىن 7 مىڭنان استام اۋىل شارۋاشىلىعى وندىرۋشىسىنە جالپى سوماسى 501,5 ملرد تەڭگە كولەمىندە كرەديت بەرىلىپ, 7 ملن گەكتاردان استام ەگىس القابى قامتىلدى. اگرارلىق كرەديت كورپوراتسياسى ارقىلى ەگىس ناۋقانىندا 126 فەرمەردى 17 ملرد تەڭگە كولەمىندە قارجىلاندىرادى, تاعى 235 ءوندىرۋشىنىڭ ءوتىنىمى قارالىپ جاتىر.
