قالا بيلىگى عيماراتقا جۇرگىزىلگەن تەحنيكالىق تەكسەرۋ ناتيجەسىندە تىرەك قۇرىلىمدارى مەن ينجەنەرلىك جەلىلەرىنىڭ ابدەن توزعانىن انىقتاپ, دالەلدەپ شىقتى. ءورت قاۋىپسىزدىگى, جەلدەتۋ, گيدرووقشاۋلاۋ جۇيەلەرى قازىرگى زامان تالاپتارىنا ساي ەمەس, سونداي-اق ناۋقاستاردى تاسىمالداۋعا ارنالعان جەدەل ساتى بولماعان.
جەر تەلىمى تەكتونيكالىق سىزات ايماعىندا ورنالاسقانىنا قاراماستان, عيماراتتا بىردە-ءبىر رەت سەيسميكالىق كۇشەيتۋ جۇمىستارى جۇرگىزىلمەگەن. عيماراتتىڭ سەيسميكالىق نورمالار تالاپتارىنا سايكەس كەلمەيتىنى جونىندە قازقسعزي-ءدىڭ ءتيىستى قورىتىندىسى بار.
پەرزەنتحانا زاماناۋي مەديتسينالىق كومەك كورسەتۋ ستاندارتتارىنا دا ساي ەمەس. اتاپ ايتقاندا, قابىلداۋ بولىمىندە شۇعىل وتا جاسايتىن زال بولماعان, پاتسيەنتتەردى triage (سۇرىپتاۋ) جۇيەسىمەن قابىلداۋعا جاعداي جاسالماعان, وپەراتسيالىق بلوك پەن رەانيماتسيادا ينفەكتسيالىق باقىلاۋعا ارنالعان ارنايى ءۇي-جايلار قاراستىرىلماعان.
عيماراتتىڭ ىرگەتاسىن كۇشەيتۋ مۇمكىن ەمەس, كۇردەلى جوندەۋ مەن ونى ۇستاۋ ەكونوميكالىق تۇرعىدان ءتيىمسىز دەپ تانىلعاندىقتان, 1938 جىلعى عيماراتتى ءسۇرىپ, ونىڭ ورنىنا جاڭاسىن سالۋ تۋرالى شەشىم قابىلداندى.
اقتوبەدەگى پەرزەنتحانادا جاڭا تۋعان نارەستەنى ساتىپ جىبەرگەن
جوباعا سايكەس, جالپى اۋماعى 10 مىڭ شارشى مەتردەن اساتىن ءۇش قاباتتى جاڭا عيمارات سالىنادى. جاڭا پەرزەنتحانا 155 ورىنعا ەسەپتەلگەن. زاماناۋي پالاتالار انا مەن بالاعا جايلى جاعداي جاساپ, ەنەرگيا ۇنەمدەيتىن تەحنولوگيانى ەنگىزۋ پايدالانۋ شىعىندارىن ازايتۋعا مۇمكىندىك بەرەدى.
قابىلداۋ بولىمىندە شۇعىل وتا جاسايتىن بولمە قاراستىرىلعان, بۇل كەزەك كۇتتىرمەيتىن كومەكتى كىدىرىسسىز كورسەتۋگە جول اشادى. وپەراتسيالىق زالداردىڭ جالپى سانى ەكىدەن تورتكە دەيىن ارتادى. سونداي-اق, قابىلداۋ ءبولىمىنىڭ مۇمكىندىگى دە تاۋلىگىنە ەكى ەسەگە ارتادى.
جاڭا كورپۋس پايدالانۋعا بەرىلگەننەن كەيىن كورسەتىلەتىن مەديتسينالىق قىزمەت سانى جىلىنا 11 مىڭنان 14 مىڭعا دەيىن ءوسىپ, بوساناتىندار سانى 5 مىڭنان 9 مىڭعا دەيىن كوبەيەدى دەگەن جوسپار بار. جاڭا عيمارات اكۋشەرلىك, پەريناتالدىق كومەك پەن جاڭا تۋعان نارەستەلەرگە كۇتىم جاساۋ سالاسىندا يننوۆاتسيا مەن وزىق مەديتسينالىق تەحنولوگيانى, دالەلدى مەديتسينالىق تاسىلدەردى ەنگىزۋگە مۇمكىندىك بەرەدى.
قۇرىلىس جۇمىستارىن كەلەسى جىلدىڭ ناۋرىز ايىندا اياقتاۋ جوسپارلانعان. دەگەنمەن, وسى ارالىقتا پەرزەنتحانا جۇمىسىن توقتاتپايدى – بارلىق بولىمشە ۋاقىتشا سەيفۋللين داڭعىلىنداعى «ا» بلوگىنا ورنالاستىرىلادى.
