سۋرەتتى تۇسىرگەن – اۆتور
ءيا, ەلىمىزدەگى ەڭ سۋىق نۇكتە – مارقاكول اۋدانىنىڭ ءتۇۋ تۇكپىرىندەگى شاناعاتى اۋىلى. ازىن-اۋلاق ءتۇتىن قالعان اۋىلدىڭ ايازىن ەل اڭىز قىلىپ ايتىپ جۇرگەنىمەن, اقيقات. بيىلعى اياز تىپتەن قىستى. تەرمومەتر باعاناسى الپىستان استى. جەرگىلىكتى جۇرت ودان تومەن سان بولمادى, ايتپەسە جەتپىسكە دە بارىپ قالۋى عاجاپ ەمەس دەپ توپشىلادى.
الدىڭعى جىلى مارقا وڭىرىنە قالىڭ قار ءتۇسىپ, ەل-جۇرتتىڭ جاعدايىن سۇراي ساپارلاپ بارعانبىز. سول كەزدە شاناعاتىنىڭ تۇرعىنى ويرات شوقاقوۆ ەرتەدە –66 گرادۋس اياز تىركەلگەن دەپ, ءوزى تاڭعالىپ وتىرعان. ءدال سول اياز, مىنە, بيىل قايتالاندى. تۇكىرىك جەرگە تۇسپەيتىن سۋىق مالدى دا, جاندى دا قينادى. ءتىپتى تەحنيكا توزبەيتىن ۇسكىرىك وڭمەنىڭنەن وتەدى. ونىڭ ۇستىنە بۇل جاقتىڭ سۋىعى اپتالاپ تۇرادى. اۋىلدى تاۋ قورشاپ جاتقاندىقتان با, ايازدىڭ بەتى ءبىر دەمدە قايتپايدى دا. ناعىز قىس – شاناعاتىدا. انىق-قانىعىن كىم ءبىلسىن, اۋىل اتاۋى دا تابيعاتتىڭ توسىن مىنەزىمەن بايلانىستى-مىس. ەرتەدە دەيدى, اۋىلدىڭ باس جاعىندا ايازدى كۇنى شانا قاتىپ, سودان شاناعاتى بولىپ كەتكەن كورىنەدى. كەيبىر زيالى قاۋىم شاناعاتى دا ارعاناتى سەكىلدى اتاۋ دەپ, ارىعا بارعىسى كەلمەيدى. ءتۇپ-توركىنىن قازبالايتىن بولساق, ءبىرى موڭعولدىڭ ءسوزى دەسە, ەندى ءبىرى قالماقتى قايتالاپ ءجۇرمىز دەيدى.
قىزىعى سول, ساحا جەرىندەگى ساقىلداعان سارى اياز بىزدە دە بار.
شىعىس قازاقستان وبلىسى,
مارقاكول اۋدانى,
شاناعاتى اۋىلى
