ۇجىم ۇسىنعان مالىمەتتەرگە سۇيەنسەك, الداعى ماۋسىمدا تەاتر رەپەرتۋارى كلاسسيكالىق مۇرا مەن قازىرگى حورەوگرافيا اراسىنداعى شىعارماشىلىق ديالوگقا نەگىزدەلەدى. بۇل باعىتتاعى نازار اۋدارارلىق پرەمەرالاردىڭ ءبىرى – موريس راۆەلدىڭ مۋزىكاسىنا قويىلعان زاماناۋي ءبىر اكتىلى «Bolero X» بالەتى. حح عاسىردىڭ مۋزىكالىق جاۋھارى سانالاتىن Boléro وركەسترلىك ۆارياتسيالارى نەگىزىندە جاسالعان قويىلىم ءبيدىڭ تابيعاتىن, ونىڭ ۋاقىت پەن كەڭىستىكتەگى ەۆوليۋتسياسىن فيلوسوفيالىق تۇرعىدا زەردەلەيدى. ىرعاق پەن پلاستيكا, مۋزىكا مەن قيمىل ءبىرتۇتاس كوركەم الەمگە اينالىپ, كورەرمەندى زاماناۋي حورەوگرافيانىڭ جاڭا قىرلارىمەن تانىستىرادى.
سونىمەن قاتار 2026 جىلعى رەپەرتۋاردا تەاتردىڭ باس بالەتمەيستەرى مۇكارام ءاۆاحريدىڭ قويىلىمىنداعى «قىز جىبەك» بالەتى ايرىقشا ورىن الادى. قازاقتىڭ ماڭگىلىك ماحاببات داستانىن ارقاۋ ەتكەن سپەكتاكل ءداستۇرلى بەينەلەردى زاماناۋي ساحنالىق شەشىمدەرمەن ۇيلەستىرە وتىرىپ, ۇلتتىق كلاسسيكانىڭ مازمۇنىن تەرەڭ اشادى. بۇل قويىلىم ارقىلى تەاتر مادەني مۇراعا دەگەن قۇرمەتتى, ونى بۇگىنگى كورەرمەنگە جاڭاشا ۇسىنۋ مۇمكىندىگىن ايقىن كورسەتەدى.
ماۋسىمنىڭ ەڭ ءىرى وقيعالارىنىڭ ءبىرى – الەمدىك بالەت ونەرىنىڭ ءىنجۋ-مارجانى سانالاتىن «بايادەركا» بالەتىنىڭ اۋقىمدى پرەمەراسى بولماق. ايتۋلى تۋىندىنى ساحنالاۋ ارقىلى «استانا بالەت» تەاترى اكادەميالىق داستۇرگە ادالدىعىن دالەلدەپ, وتاندىق كورەرمەنگە الەمدىك بالەت رەپەرتۋارىنىڭ ۇزدىك ۇلگىلەرىن جوعارى كاسىبي دەڭگەيدە ۇسىنۋعا دايىن ەكەنىن ايقىندايدى.
شىعارماشىلىق ۇجىم, سونداي-اق وسى جىلى تەاتردىڭ رەپەرتۋارى كلاسسيكالىق بالەتتەرمەن قاتار زاماناۋي حورەوگرافيالىق جوبالارعا, ۇلتتىق باعدارلامالار مەن كونتسەرتتىك قويىلىمدارعا دا تولى بولادى دەپ ۋادە ەتىپ وتىر. سيمفونيالىق وركەستر قاتىساتىن سپەكتاكلدەر مەن كونتسەرتتەر, حور, ۇزدىك سوليستەر, شاقىرىلعان ديريجەرلەر ونەر كورسەتەتىن جوبالار تەاتردىڭ مۋزىكالىق باعىتىن تەرەڭدەتە تۇسەدى. وركەستر جەكە كوركەم ۇجىم رەتىندە دامىپ, كونتسەرتتىك قىزمەتىن دە جۇيەلى تۇردە جالعاستىرادى.
بۇعان قوسا بيىل «استانا بالەت» تەاترى گاسترولدىك ساپارلارعا شىعىپ, ەلىمىزدىڭ تۇكپىر-تۇكپىرىن ارالاۋدى ءارى شەتەلدىك ساحنالاردا ونەر كورسەتۋدى جوسپارلاپ وتىر. بۇل ساپارلار ارتىستەر ءۇشىن جاڭا مادەني تاجىريبە جيناقتاپ قانا قويماي, تەاتردىڭ حالىقارالىق دەڭگەيدەگى بەدەلىن ارتتىرۋعا ىقپال ەتەدى. سونىمەن قاتار ءبىلىم بەرۋ جانە الەۋمەتتىك جوبالارعا ەرەكشە ءمان بەرىلىپ, قازاق ۇلتتىق حورەوگرافيا اكادەمياسىمەن ىنتىماقتاستىقتى كەڭەيتۋ, جاس حورەوگرافتار مەن ارتىستەردى قولداۋ, حالىقارالىق شىعارماشىلىق باستامالاردى ىسكە اسىرۋ باستى نازاردا بولادى.
وسىلايشا, 2026 جىل «استانا بالەت» تەاترى ءۇشىن كوركەم ىزدەنىس پەن شىعارماشىلىق سەرپىلىس كەزەڭىنە اينالماق. جاڭا پرەمەرالار, ۇلتتىق جانە الەمدىك كلاسسيكانىڭ ۇيلەسىمى, گاسترولدىك ساپارلار مەن ءبىلىم بەرۋ جوبالارى تەاتردىڭ مادەني كەڭىستىكتەگى ماڭىزىن ارتتىرىپ, كورەرمەنگە بالەت ونەرىنىڭ تەرەڭ دە سان قىرلى الەمىن ايگىلەيدى.
