ەلىمىز ترانزيت سالاسىنداعى ارتىقشىلىقتارىن ساقتاۋ ءۇشىن بىرقاتار باعىتتا جۇمىس جۇرگىزىپ جاتىر. نەگىزگى نازار جۇك تاسىمالىنىڭ ساپاسىنا اۋدارىلعان. قىتايدان ەۋروپاعا جونەلتىلگەن كونتەينەرلەر قازاقستان اۋماعى ارقىلى ورتا ەسەپپەن 13-15 كۇندە جەتەدى. ونىڭ شامامەن 4 كۇنى ەل اۋماعىنداعى ترانزيتكە تيەسىلى. بۇل كورسەتكىش بالاما باعىتتارمەن سالىستىرعاندا بىرنەشە ەسە جىلدام.
سونىمەن قاتار سالادا تسيفرلاندىرۋ ۇدەرىسى ءجۇرىپ جاتىر. قازىرگى تاڭدا تەك تاسىمال باعىتىن ۇسىنۋمەن شەكتەلمەي, كەشەندى لوگيستيكالىق قىزمەت كورسەتۋگە كوشۋ كوزدەلگەن. وسى باعىتتا شىعىس – باتىس ءدالىزى بويىنشا بىرقاتار لوگيستيكالىق كومپانيا جۇمىس ىستەپ جاتىر, ال سولتۇستىك – وڭتۇستىك باعىتى بويىنشا سەرىكتەستەرمەن كەلىسسوزدەر جۇرگىزىلۋدە. تسيفرلىق شەشىمدەردى ەنگىزۋ ارقىلى راسىمدەر جەڭىلدەپ, ادامي فاكتور ازايتىلىپ كەلەدى.
حالىقارالىق كووپەراتسيا دا ءترانزيتتى دامىتۋداعى ماڭىزدى باعىتتاردىڭ ءبىرى سانالادى. قازاقستان كولىك-لوگيستيكا سالاسىندا ارىپتەستىككە باسىمدىق بەرەدى. دالىزدەر, حابتار, تەرمينالدار مەن مۋلتيمودالدىق شەشىمدەر ەلدىڭ ترانزيتتىك مۇمكىندىگىن ارتتىرۋعا باعىتتالعان. رەسمي مالىمەتكە سايكەس, كولىك جانە لوگيستيكا سالاسى حالىقارالىق ءوزارا ءىس-قيمىلدىڭ ماڭىزدى بولىگىنە اينالىپ وتىر.
«وسى تۇرعىدان العاندا, «ورتا ءدالىز» ستراتەگيالىق مانگە يە باعىت سانالادى. قىتاي تاراپى بۇل باعىتتى دامىتۋدا باستى سەرىكتەستەردىڭ ءبىرى بولىپ وتىر. قازىر قىتاي ءىس جۇزىندە ورتا ءدالىزدىڭ تولىق مۇشەسىنە اينالدى دەۋگە بولادى. رەسمي كەلىسىمدەرگە سايكەس, قىتاي 2029 جىلعا قاراي بۇل باعىت ارقىلى جىلىنا 300 مىڭ كونتەينەر جونەلتۋدى جوسپارلاپ وتىر», دەيدى كولىك ۆيتسە-ءمينيسترى جانىبەك تايجانوۆ.
ءدالىزدى دامىتۋ ءۇشىن ەلىمىزدە ينفراقۇرىلىمدىق جوبالار اتقارىلدى. دوستىق – مويىنتى مەن الماتى اينالما تەمىرجولدارىنىڭ قۇرىلىسى اياقتالدى. اقتاۋ پورتىندا كونتەينەرلىك حاب سالىندى. وتكەن جىلى تەڭىز فلوتى ءۇش كەمەمەن تولىقتى. بۇل جۇمىستار ءالى دە جالعاسادى.
باعىتتىڭ مارتەبەسىن ارتتىرۋ ماقساتىندا ۇكىمەتارالىق كەلىسىم ازىرلەنىپ, ونى بيىل قابىلداۋ جوسپارلانىپ وتىر. جالپى العاندا, ورتا ءدالىز بۇگىندە تولىققاندى كولىك باعدارىنا اينالدى. 2028-2030 جىلدارعا قاراي ونىڭ الەۋەتى ايتارلىقتاي ارتا تۇسەدى دەپ كۇتىلەدى.
