پانەلدىك سەسسيا بارىسىندا اقىن-جازۋشىلار مەن ادەبيەتتانۋشىلار بۇگىنگى بالالار ادەبيەتىنىڭ رۋحاني كەڭىستىگىن جاڭعىرتۋ, دامۋ باعدارىن ايقىنداۋ, جانرداعى جاڭا ۇردىستەرگە بويلاۋ جونىندە پىكىر الماسىپ, تىڭ يدەيالاردى ورتاعا سالدى. ادەبيەتتىڭ مادەني جانە كرەاتيۆتى يندۋستريامەن توعىساتىن وزەكتى باعىتتارى, بالالار ادەبيەتىنىڭ بۇگىنگى بولمىسى مەن بولاشاعىن جاڭا قىرىنان سارالاۋ سەكىلدى تاقىرىپتاردى تالقىلادى.
جيىندا بالالار مەن جاسوسپىرىمدەر ادەبيەتى جانرلىق كەڭەسىنىڭ كەيىنگى بەس ايدا اتقارىلعان جۇمىس ەسەبى تىڭدالدى. كەڭەس توراعاسى ەلدوس توقتارباي جاس اۆتورلاردى قولداۋ, بالالار ادەبيەتىنىڭ ساپالىق دەڭگەيىن ارتتىرۋعا باعىتتالعان باستامالار جايىندا بايانداپ, ادەبي ۇدەرىستى جۇيەلى تۇردە مونيتورينگتەۋ ماسەلەلەرىنە توقتالدى.
سونداي-اق «بالالار ادەبيەتىنىڭ باعباندارى» سەرياسىمەن جارىق كورگەن وتەپبەرگەن اقىپبەك ۇلى, توقاش بەردياروۆ, بەيبىت قويشىباەۆ, سەرىكباي وسپان ۇلى, نۇرداۋلەت اقىش جانە بەيسەباي كىرىسباي ۇلىنىڭ ەستەلىك ءھام ءىلتيپات-لەبىز جيناقتارى, سونىمەن قاتار «بالالار كىتاپحاناسى» توپتاماسى اياسىندا جارىق كورگەن قۋاندىق تۇمەنبايدىڭ «اسسالاۋماعالەيكۇم!» دەيتىن اۋىل», ساۋلە دوسجاننىڭ «مايماق قىز», «كوك تۇرىك» كىتاپتارى كوپشىلىككە تانىستىرىلدى. بۇعان قوسا, بالالار تاقىرىبىندا قالام تەربەپ جۇرگەن دۇيسەن ماعلۇم ۇلى, باعدات ءماجيت ۇلى, ءادينا ءجۇسىپ, ميرا سەمبايقىزى, باعدات ايتمۇحاەۆا, ەرجەڭىس تاستىباي ۇلى, جاقسىلىق مۇراتبەك جازۋشىلار وداعىنىڭ مۇشەلىگىنە قابىلداندى. سوڭىندا بالالار ادەبيەتىنە ۇلەس قوسقان قالامگەرلەرگە قۇرمەت كورسەتىلدى.
