ەلىمىزدە عانا ەمەس, حالىقارالىق ساحنالاردا ءداستۇرلى مۋزىكانى ناسيحاتتاپ جۇرگەن ونەر يەسى ساحناعا ا.جۇبانوۆ اتىنداعى قازاق حالىق اسپاپتار وركەسترى شىقتى. كونتسەرت سوڭىندا نۇركەن نۇرعالي ۇلى اتالعان وركەستردىڭ كوركەمدىك جەتەكشىسى بولۋ ۇسىنىسىن قابىل العانى بەلگىلى بولدى. مۇنىڭ وزىندىك سەبەبى دە بار. بيىل كورنەكتى كومپوزيتور, ديريجەر, مۋزىكاتانۋشى عالىم, ۇستاز احمەت جۇبانوۆتىڭ تۋعانىنا 120 جىل تولادى. وسى ايتۋلى داتاعا وراي نۇركەن نۇرعالي ۇلى عازيزا جۇبانوۆا اتىنداعى وبلىستىق فيلارمونيا قۇرامىنداعى ا.جۇبانوۆ اتىنداعى قازاق حالىق اسپاپتار وركەسترىنىڭ رەپەرتۋارىن جاڭارتۋعا كۇش سالىپ, ۇجىمنىڭ كاسىبي ورىنداۋشىلىق دەڭگەيىن كۇشەيتەدى دەگەن سەنىم بار.
كونتسەرت سوڭىندا وبلىستىق مادەنيەت باسقارماسىنىڭ باسشىسى التىناي يۋنيسوۆا وبلىس اكىمى اسحات شاحاروۆتىڭ قۇتتىقتاۋ حاتىن وقىپ بەردى. ءوڭىر باسشىسى ۇلتتىق ونەر ساباقتاستىعىن ساقتاۋعا ولشەۋسىز ۇلەس قوسىپ جۇرگەن تالانت يەسىنىڭ احمەت قۋان ۇلى تۋعان توپىراقتا ءداستۇرلى ونەردى جاڭاشا وركەندەتۋ ىقىلاسىنا ريزاشىلىعىن بىلدىرگەن. اقتوبەلىكتەر ەكى ساعاتتان استام ۋاقىت تاپجىلماستان قازاقتىڭ كۇيلەرى مەن ءداستۇرلى اندەرىن تىڭداپ, دومبىرا, قوبىز, سازسىرناي ۇندەرىنە قۇلاق ءتۇردى. كاسىبي دەڭگەيدە وتكەن كونتسەرتكە نۇركەن اشىروۆپەن بىرگە رامازان ستامعازيەۆ, ارمان جۇدەباەۆ قاتىسىپ, كورەرمەندەردىڭ ىقىلاسىنا بولەندى.
اقتوبە وبلىسى
