فوتو: rsv.ru
«بيزنەس – كەز كەلگەن ەلدەگى ەكونوميكانىڭ نەگىزگى تىرەگى. ءبىز ۇزاق جولدى ءجۇرىپ وتتىك. وسى جولدا جۇرت جەكە مەنشىك ينستيتۋتىنا ەشكىم قول سۇقپاۋعا ءتيىس ەكەنىن تۇسىنە باستادى.
مەن مەملەكەتتىك بيلىك جۇيەسىندە جوعارى لاۋازىمدى قىزمەتتەردى اتقارا ءجۇرىپ, سوزبەن دە, ىسپەن دە ۇلتتىق بۋرجۋازيانىڭ زاڭدى مۇددەسىن قورعاۋعا تىرىستىم. سەبەبى, ەكونوميكانى وركەندەتۋ جانە مەملەكەتتىڭ قوعامدىق نەگىزدەرىن نىعايتۋ ىسىندە كاسىپكەرلەر ەلەۋلى ءرول اتقاراتىنىن جاقسى تۇسىنەمىن», دەدى قاسىم-جومارت توقاەۆ.
پرەزيدەنت تاريحي سەبەپتەر مەن ۇلت بولمىسىنداعى ەرەكشەلىكتەرگە بايلانىستى ءىرى بيزنەسمەندەرىمىز قاراپايىمدىلىق, ۇستامدىلىق سياقتى قاسيەتتەرگە ءمان بەرە قويمايتىنىن دا اتاپ ءوتتى.
«مەن شۆەيتساريادا جۇمىس ىستەپ جۇرگەندە اسا ءىرى ءارى بەلگىلى كاسىپكەرلەرمەن كەزدەسۋلەر وتكىزدىم. سول كەزدە ولاردىڭ ءوز قاراجاتىن وتە ۇنەمدەپ جۇمسايتىنىن جانە ەلدەن دارالانىپ كوزگە تۇسكىسى كەلمەيتىنىن كورىپ, تاڭعالدىم. ميللياردتاعان قارجىسى بار ادامدار قوناقۇيدىڭ قاراپايىم ءبىر بولمەسىندە تۇرۋعا نامىستانبايدى. جەكە ۇشاقپەن ۇشپاق تۇگىلى, ءبىرىنشى ساناتتاعى ورىندارعا دا وتىرمايدى. بىراق, بۇل – ولاردىڭ بويىندا عاسىرلار بويى قالىپتاسقان داعدى.
ال, ءبىزدىڭ كاسىپكەرلەرىمىز ءۇشىن قالىپتى كورىنەتىن ءومىر سالتى كەيدە قوعامنىڭ نارازىلىعىن تۋدىرىپ جاتادى. مۇنداي جاعداي كوپتەگەن ەلدە بار. سول ءۇشىن دە قايىرىمدىلىق قىزمەتى جۇمىس ىستەيدى. بۇل – قوعام مەن بيزنەس اراسىنداعى ءوزارا كەلىسىم ىسپەتتەس», دەدى مەملەكەت باسشىسى.
سونداي-اق قاسىم-جومارت توقاەۆ كاسىپكەرلەردىڭ قوعامنىڭ يگىلىگىنە قىزمەت ەتۋى بيلىك جۇكتەگەن مىندەت ەمەس, مارتەبەلى پارىز ەكەنىن دە ەسكەرتتى.
«وسى ورايدا, شەتەلدە تابىسقا جەتسە دە, تۋعان جەرىن ۇمىتپاي, حالقىنا كومەكتەسىپ جۇرگەن ءىرى كاسىپكەرلەردى جاقسى ۇلگى رەتىندە اتاپ ءوتتىم. ونداي ازاماتتار اۋقىمدى جوبالاردى جۇزەگە اسىرىپ ءجۇر. قالالاردا ينفراقۇرىلىم سالىپ, جوندەپ, مۇراجايلاردىڭ, ەمحانالار مەن مەكتەپتەردىڭ قۇرىلىسىن قارجىلاندىرىپ جاتىر.
قازاقستاندا كوپ نارسە وزگەردى. قوعامدىق سانا جاڭعىرا ءتۇستى, مەملەكەتتىك باسقارۋ جۇيەسى جاڭاردى, ساياسي قايراتكەرلەر اۋىستى. ءىرى كاسىپكەرلەر عانا جۇرىسىنەن جاڭىلماي, ءباز-باياعى قالپىندا كەلە جاتىر. بىراق, بۇل, ءبىر جاعىنان, بيلىكتىڭ بيزنەسكە كوزقاراسى دۇرىس ەكەنىن كورسەتەدى», دەدى پرەزيدەنت.
مەملەكەت باسشىسى كاسىپكەرلەردىڭ ءبارى بىردەي مەملەكەتتىڭ قولداۋىن دۇرىس تۇسىنە بەرمەيتىنىن, ءاردايىم سولاي بولۋعا ءتيىس دەپ قابىلدايتىنىن سىنعا الدى.
«ولار اۋقىمدى جوبالاردى باستاپ الىپ, قيت ەتسە ۇكىمەتتەن كومەك سۇرايدى. مەن ولارعا «بيزنەسپەن اينالىسىپ جاتقان سىزدەر مە, الدە ۇكىمەت پە؟» دەپ سۇراق قويدىم. قيتۇرقى ساياسي ويىندارمەن اۋەستەنىپ كەتكەن كەيبىر كاسىپكەرلەردى سىناۋعا تۋرا كەلدى. بيزنەسمەندەر ەل ەكونوميكاسىن وركەندەتۋ ءۇشىن جۇمىس ىستەۋى كەرەك. ءتىپتى, كاسىپتىڭ جىلىگىن شاعىپ, مايىن ىشكەن يلون ماسكتىڭ ءوزى ساياساتقا بەلسەندى ارالاسپاۋ تۋرالى شەشىم قابىلدادى.
وتاندىق بيزنەس وكىلدەرى تاريحىمىزدا بۇرىن-سوڭدى بولماعان الاپات تاسقىن كەزىندە ەلدىك ىستەن شەت قالعان جوق, اپات سالدارىن جويۋعا قارجىلاي كومەك كورسەتتى. بۇل – قۋانارلىق جاعداي.
مەن قايىرىمدىلىقپەن اينالىسىپ جۇرگەن ازاماتتاردى قولداۋ ءۇشىن ارنايى «مەيىرىم» وردەنىن ەنگىزدىم. ەلگە جاناشىرلىق كورسەتىپ, الەۋمەتتىك جاۋاپكەرشىلىك تانىتقان كاسىپكەرلەر بيىلدان باستاپ وسى جوعارى ناگراداعا يە بولادى. وسىلايشا, ولاردىڭ قوعام الدىنداعى ابىروي-بەدەلى مەن مارتەبەسى ايقىندالادى», دەدى قاسىم-جومارت توقاەۆ.
ەسكە سالايىق, بۇگىن قازاقستان پرەزيدەنتى قاسىم-جومارت توقاەۆ «Turkistan» گازەتىنە كەڭ كولەمدى سۇحبات بەردى. وندا ول كولىك جانە لوگيستيكا سالاسىن دامىتۋ قازاقستان ءۇشىن ستراتەگيالىق ماڭىزى بار باسىمدىق ەكەنىن اتاپ ءوتتى. قاسىم-جومارت توقاەۆ نۇرسۇلتان نازارباەۆتىڭ ۆلاديمير پۋتينمەن كەزدەسۋلەرى بەيرەسمي سيپاتقا يە ەكەنىن ايتتى. سونداي-اق پرەزيدەنت سوڭعى جىلدارى تاريحتى تالقىلاۋ سانگە اينالعانىن ءسوز ەتتى.ء تۇرلى پودكاستتار, فيلمدەر, ماقالالار مەن كىتاپتار شىعىپ جاتقانىنان حاباردار ەكەنىن جەتكىزدى. قاسىم-جومارت توقاەۆ قاڭتار وقيعاسىنا قاتىسقان ازاماتتارعا بايلانىستى سوت پروتسەستەرى مەن تەرگەۋ جۇمىستارى جونىندە پىكىر ءبىلدىردى. مەملەكەت باسشىسى بۇل تاقىرىپقا قاتىستى نەگىزگى دەرەكتەر الدەقاشان بەلگىلى بولعانىن ايتىپ, كەيبىر سوت ىستەرى مەن ۇرلانعان قارۋدى ىزدەستىرۋ جۇمىستارى ءالى دە جالعاسىپ جاتقانىن مالىمدەدى.
