فوتو: اشىق دەرەككوز
اۆتوكولىك جۇرگىزۋشىلەرىنىڭ ايتۋىنشا, قالاداعى كەيبىر جول ۋچاسكەلەرىندە ەسكى جانە جاڭا جول تاڭبالارى قاتار ساقتالىپ قالعان. بۇل جاعداي قوزعالىسقا قاتىسۋشىلاردى شاتاستىرىپ, اسىرەسە تۇنگى ۋاقىتتا جانە قولايسىز اۋا رايىندا جولمەن ءجۇرۋدى قيىنداتادى.
جۇرگىزۋشىلەر 13 جانە 15-شاعىناۋداندار اراسىنداعى جول بولىگىن ۆيدەوعا ءتۇسىرىپ, وندا ەسكى تاڭبالار تولىق وشىرىلمەي, جاڭاسىمەن قاباتتاسىپ تۇرعانىن كورسەتكەن. ولاردىڭ سوزىنشە, تۇندە جول سىزىقتارى ناشار كورىنەدى, بۇل جول-كولىك وقيعالارىنىڭ قاۋپىن ارتتىرادى.
اتالعان ماسەلەگە قاتىستى اقتاۋ قالاسى اكىمدىگى تۇسىنىكتەمە بەردى. اكىمدىكتىڭ مالىمەتىنشە, كورسەتىلگەن ۋچاسكەدە قوزعالىس سىزباسى وزگەرتىلىپ, جاڭا جول تاڭبالارى سالىنعان, ال ەسكى تاڭبالار ەكى رەت قارا بوياۋمەن جابىلعان. الايدا بىرنەشە جىل بويى جول جابىنىندا بولعان ەسكى تاڭبالاردىڭ ۇستىنەن جاعىلعان بوياۋ كەي جەرلەردە توزىپ, بۇرىنعى سىزىقتار قايتا كورىنىپ قالعان.
قالا اكىمدىگى قولايلى اۋا رايى ورناعان سوڭ ەسكى جول تاڭبالارىن قايتادان بوياۋ جۇمىستارى جالعاساتىنىن مالىمدەدى.
