فوتو: istockphoto.com
سالتانات تومپيەۆانىڭ ايتۋىنشا, الداعى جىلى ەلىمىزدىڭ ءىرى اۆياتسيالىق توراپتارىندا كەشەندى جوبالار قولعا الىنادى.
«وسى رەتتە ەلىمىزدىڭ ءىرى اۆياتسيالىق توراپتارىندا ينفراقۇرىلىمدىق جوبالار كەشەنىن ىسكە اسىرۋ جوسپارلانىپ وتىر. اتاپ ايتقاندا, استانا جانە شىمكەنت اۋەجايلارىندا ەكىنشى ۇشۋ-قونۋ جولاقتارىنىڭ قۇرىلىسى باستالادى, الماتى اۋەجايىنىڭ ىشكى رەيستەر تەرمينالى قايتا جاڭعىرتىلادى, سونداي-اق اقتاۋ اۋەجايىنىڭ پەررونىنا كۇردەلى جوندەۋ جۇرگىزىلەدى», دەدى ول.
سونىمەن قاتار, وڭىرلىك اۆياتسيانى دامىتۋ باعىتىندا اتىراۋدا جاڭا تەرمينال سالۋ, پاۆلودار اۋەجايىن رەكونسترۋكتسيالاۋ جانە قاتونقاراعاي, زايسان, كەندىرلى كۋرورتتىق ايماقتارىنداعى اۋەجايلار قۇرىلىسىن اياقتاۋ جوسپارلانعان. سونداي-اق, ارقالىق اۋەجايى دا قايتا قالپىنا كەلتىرىلمەك.
اۋە پاركى مەن جاڭا باعىتتار
2026 جىلدىڭ سوڭىنا دەيىن وتاندىق اۋە كومپانيالارى تاعى 9 جاڭا اۋە كەمەسىن ساتىپ الۋدى كوزدەپ وتىر.
«بۇل اۋە پاركىن شامامەن 118 بىرلىككە دەيىن ۇلعايتىپ, اۋە تاسىمالدارىنىڭ وتكىزۋ قابىلەتىن ارتتىرۋعا مۇمكىندىك بەرەدى. وڭىرلەردىڭ كولىك قولجەتىمدىلىگىن قامتاماسىز ەتۋ جانە ءتۋريزمدى دامىتۋ ماقساتىندا الەۋمەتتىك ماڭىزى بار 23 اۋە باعىتى بويىنشا سۋبسيديالاۋ باعدارلاماسى جالعاسىن تابادى», دەپ ءتۇسىندىردى سالتانات تومپيەۆا.
حالىقارالىق قاتىناستار گەوگرافياسى دا ايتارلىقتاي كەڭەيەدى. ورتالىق ازيا مەن تمد ەلدەرىنەن بولەك, ۆەنا, توكيو, ريم, ابۋ-دابي, ءار-رياد, داممام, لارناكا, اممان, سيان, شانحاي, ءۇرىمشى, قاشعار جانە ۆارشاۆا سياقتى الەمنىڭ ءىرى قالالارىنا جاڭا رەيستەر اشىلادى دەپ كۇتىلەدى.
سالانىڭ ۇزاق مەرزىمدى دامۋى ءۇشىن ICAO-مەن بىرلەسە وتىرىپ, ازاماتتىق اۆياتسيانىڭ باس جوسپارى ازىرلەنىپ, 2050 جىلعا دەيىنگى دامۋ ستراتەگياسى دايىندالماق. كوميتەت توراعاسىنىڭ پايىمداۋىنشا, بۇل شارالاردىڭ بارلىعى جيىلىپ كەلگەندە ۇشۋ قاۋىپسىزدىگىن كۇشەيتىپ, قازاقستاننىڭ حالىقارالىق اۆياتسيالىق جۇيەدەگى ءرولىن نىعايتۋعا جول اشادى.
