اكتسيا 23-31 جەلتوقسان ارالىعىندا ءوتىپ, ەلىمىزدىڭ بارلىق وڭىرلەرىن قامتيدى. وعان SMALL, Magnum, Fermag, Anvar, Toimart, Dina, «نورما», «دانا» سياقتى شامامەن 80 ءىرى ساۋدا جەلىسى, سونداي-اق بىرقاتار وڭىرلىك ريتەيلەرلەر قاتىسىپ وتىر.
ساۋدا جانە ينتەگراتسيا مينيسترلىگىنىڭ مالىمەتىنشە, بۇل باستاما نەگىزگى تۇتىنۋ تاۋارلارىنىڭ باعاسىن تۇراقتاندىرۋعا, وتاندىق وندىرۋشىلەردى قولداۋعا جانە قازاقستاندىق ونىمدەردىڭ حالىق ءۇشىن قولجەتىمدىلىگىن ارتتىرۋعا باعىتتالعان. بۇعان دەيىن اكتسيا بيىلعى جىلدىڭ قىركۇيەك–قازان ايلارىندا وتكەن بولاتىن.
«بەرەكە Fest» اياسىنداعى باعانىڭ تومەندەۋى ساۋدا جەلىلەرى تاراپىنان ساۋدا ۇستەمەلەرىنىڭ قىسقارتىلۋى, سونداي-اق دەلدالداردىڭ قاتىسۋىنسىز فەرمەرلەر مەن ساۋدا نۇكتەلەرى اراسىندا تىكەلەي جەتكىزىلىمدەر جولعا قويىلۋى ەسەبىنەن مۇمكىن بولدى. ناتيجەسىندە وتاندىق جانە يمپورتتىق تاۋارلار جەڭىلدىكتەرمەن ۇسىنىلۋدا. اكتسيا اسسورتيمەنتىنە الەۋمەتتىك ماڭىزى بار ازىق-ت ۇلىك تاۋارلارى كىرەدى.
ءىرى ساۋدا جەلىلەرىندە اكتسيا كەزەڭىندە قازاقستاندىق وندىرۋشىلەردىڭ ونىمدەرى ۇسىنىلاتىن ارنايى پرومو-ايماقتار ۇيىمداستىرىلدى. نەگىزگى نازار وتاندىق تاۋارلاردى ىلگەرىلەتۋگە جانە ساۋدا جەلىلەرى مەن جەرگىلىكتى جەتكىزۋشىلەر اراسىنداعى تۇراقتى كووپەراتسيانى دامىتۋعا اۋدارىلعان.
اكتسياعا قاتىساتىن بارلىق ساۋدا نۇكتەلەرى بىرىڭعاي ستيلدە بەزەندىرىلگەنى اتاپ ءوتىلدى. بۇل ساتىپ الۋشىلاردىڭ باعدار الۋىن جەڭىلدەتىپ, ءونىمنىڭ قولجەتىمدىلىگى مەن جەرگىلىكتى شىعۋ تەگىنە باسا نازار اۋدارادى. مينيسترلىكتە «بەرەكە Fest» اكتسياسىن وتكىزۋ ىشكى سۇرانىستى ىنتالاندىرۋعا جانە ەلدىڭ ازىق-ت ۇلىك قاۋىپسىزدىگىن نىعايتۋعا دا ىقپال ەتەتىنىن اتاپ ءوتتى.
