سۋرەتتەردى تۇسىرگەندەر – ا.دۇيسەنباەۆ, ە.ۇكىباەۆ
ءوندىرىس الاڭىنداعى ءونىمدى ءىس
پرەزيدەنت ەڭ الدىمەن «Tausogar» زاۋىتىنا باردى. №1 يندۋستريالىق پاركتە ورنالاسقان كاسىپورىن قۇرىلىس سالاسىن زاماناۋي جۇك كوتەرگىش ماشينالارمەن جانە مەحانيزمدەرمەن قامتاماسىز ەتەدى.
قاسىم-جومارت توقاەۆ ەلدەگى ءىرى قۇرىلىس كومپانيالارىنا قاجەتتى مۇنارا كراندارى مەن ەسكالاتورلار وندىرىسىمەن تانىستى.
قازىر «Tausogar» زاۋىتىندا جوعارى بىلىكتى 44 مامان ەڭبەك ەتەدى. ءوندىرىس ورنى جىلىنا 200 ليفت, 70 ەسكالاتور جانە 70 مۇنارا كرانىن شىعارا الادى.
مەملەكەت باسشىسى ەڭبەك ۇجىمىمەن اڭگىمەلەسۋ بارىسىندا كاسىپورىننىڭ ەل ينفراقۇرىلىمىن دامىتۋعا قوسقان ۇلەسىن اتاپ ءوتىپ, ونىڭ الداعى ۋاقىتتا باسەكەگە قابىلەتتىلىگى ارتا تۇسەتىنىنە سەنىم ءبىلدىردى.
بۇدان سوڭ پرەزيدەنت استانانىڭ №1 يندۋستريالىق پاركىندە ورنالاسقان بىرقاتار كاسىپورىننىڭ قىزمەتىمەن تانىستى.
قاسىم-جومارت توقاەۆقا ءۆينيلدى گيپسكارتون پانەلىن شىعاراتىن «گيپسۆينيل», ءورت دابىلدارى, بەينەكامەرالار مەن دوموفوندار وندىرەتىن «QR Systems» زاۋىتتارىنىڭ ونىمدەرى كورسەتىلدى. سونداي-اق كورمەدە «استانا ەلەكترتەحنيكا» زاۋىتىنىڭ, «ارىستان» استانا قۇبىر» زاۋىتىنىڭ, قۇرىلىس جانە جول حيمياسىنا ماماندانعان ARGP كاسىپورنىنىڭ قىزمەتى جونىندە ماعلۇماتتار ۇسىنىلعان.
بۇعان قوسا پرەزيدەنتكە مەملەكەت-جەكە مەنشىك سەرىكتەستىك قاعيداتى بويىنشا پايدالانۋعا بەرىلەتىن №2 يندۋستريالدىق پاركىنىڭ دامۋ پەرسپەكتيۆاسى جايىندا باياندالدى. اتالعان الاڭدا جالپى قۇنى 500 ملرد تەڭگەدەن اساتىن جانە 8 مىڭعا جۋىق جاڭا جۇمىس ورنىن اشۋعا مۇمكىندىك بەرەتىن 100-دەن اسا جوبانى ىسكە قوسۋ جوسپارلانىپ وتىر.
سونىمەن قاتار لوگيستيكالىق ينفراقۇرىلىمدى ىلگەرىلەتۋ باعىتىندا بەلسەندى جۇمىس اتقارىلۋدا. سونىڭ ىشىندە «استانا-تەحنوپوليس» ارنايى ەكونوميكالىق ايماعىندا لوگيستيكالىق پارك قۇرىلادى.
استانانىڭ جالپىۇلتتىق پۋلى اياسىندا 1,9 ترلن تەڭگەگە 120 جوبا جۇزەگە اسىرىلادى. وسى ارقىلى 22 مىڭعا تارتا جۇمىس ورنىن اشۋ كوزدەلگەن.
سونداي-اق مەملەكەت باسشىسى شىنجىر تاباندى جانە دوڭگەلەكتى بروندى ماشينالار شىعاراتىن, سونداي-اق ولارعا تەحنيكالىق قىزمەت كورسەتەتىن «Besqaru» زاۋىتىنا باردى. قاسىم-جومارت توقاەۆ تسەحتارداعى قۇراستىرۋ جۇمىستارىن ارالاپ كورىپ, قورعانىس ونەركاسىبى كەشەنىنە قاراستى كاسىپورىننىڭ تەحنولوگيالىق پروتسەستەرىمەن, وندىرىستىك مۇمكىندىكتەرىمەن تانىستى.
كومپانيا جىلىنا 200 بروندى تەحنيكا قۇراستىرادى. ولاردىڭ قاتارىندا سۋدى كەشىپ وتە الاتىن, دوڭگەلەكتى Taimas8x8, Aibar 4x4 بروندى ماشينالارى, سونداي-اق Tulpar شىنجىر تاباندى تەحنيكاسى بار. «Besqaru» كومپانياسى ءوز ءونىمىن قورعانىس مينيسترلىگى مەن باسقا دا كۇشتىك قۇرىلىمدارعا ارناپ شىعارادى. ءوندىرىس الاڭى بيىل اقپان ايىندا ىسكە قوسىلدى. جالپى قۇنى 13,5 ملرد تەڭگە بولاتىن جوبا اياسىندا 134 جۇمىس ورنى اشىلدى.
مەملەكەت باسشىسى زاۋىت قىزمەتكەرلەرىمەن اڭگىمەلەسىپ, ولاردىڭ ەڭبەگى ءونىمدى بولۋىنا تىلەكتەستىك ءبىلدىردى.
بالالارعا بارلىق جاعداي جاسالعان
پرەزيدەنت توقتاعان كەلەسى نىسان – Tanym كوپفۋنكتسيونالدى كەشەنى.
مەملەكەت باسشىسى وقۋ سىنىپتارىن, حورەوگرافيالىق زالدى, كوۆوركينگ-ورتالىقتى, جاساندى ينتەللەكتىنىڭ يننوۆاتسيالىق جۇيەسى ەنگىزىلگەن ءجۇزۋ باسسەينىن, كەمە مودەلدەۋ شەبەرحاناسىن, تەاتر ونەرى ستۋدياسى مەن سپورت زالدى ارالادى.
750 بالاعا قىزمەت كورسەتەتىن بۇل ورتالىق بالالار مەن جاستاردىڭ تالانتىن شىڭداۋعا, كوشباسشىلىق قابىلەتىن, عىلىمي ويلاۋ جۇيەسى مەن شىعارماشىلىق الەۋەتىن جەتىلدىرۋگە مۇمكىندىك بەرەدى. جوبا بالالارعا زاماناۋي ءبىلىمدى, تەحنولوگيانى, مادەنيەت پەن سپورتتى قولجەتىمدى ەتۋگە باعىتتالعان. قازىر كەشەندە 100-دەن استام جوعارى بىلىكتى پەداگوگ جۇمىس ىستەيدى.
قاسىم-جومارت توقاەۆ ورتالىقتىڭ ۇستازدارىمەن, وقۋشىلارىمەن اڭگىمەلەسىپ, بالالار مەن جاستار شىعارماشىلىعىن دامىتۋدىڭ ماڭىزىنا توقتالدى. سونىمەن قاتار بالالارعا تابىس تىلەدى.
ەلوردا نىساندارىن ارالاۋ بارىسىندا مەملەكەت باسشىسى نۇرا اۋدانىندا ورنالاسقان New Generation School Astana جەكە مەنشىك ءبىلىم مەكەمەسىنىڭ جۇمىسىمەن تانىستى.
1320 وقۋشىعا ەسەپتەلگەن مەكتەپ جاراتىلىستانۋ-ماتەماتيكا جانە الەۋمەتتىك-گۋمانيتارلىق باعىتتارىندا ءبىلىم بەرەدى. اسىرەسە, ماتەماتيكا مەن اعىلشىن ءتىلى تەرەڭدەتىپ وقىتىلادى. وقۋ-تاربيە جۇمىسىن ۇيىمداستىرۋعا قاجەتتى بارلىق جاعداي جاسالعان. وقۋشىلار ءۇش مەزگىل تاماقتاندىرىلادى. ەرەكشە ءبىلىم الۋ قاجەتتىلىگى بار بالالارعا قولايلى ورتا قاراستىرىلعان.
قاسىم-جومارت توقاەۆقا مەكتەپ قۇرىلىسىنىڭ بيزنەستى مەملەكەتتىك قولداۋ شارالارى اياسىندا بوي كوتەرگەنى جونىندە باياندالدى. قارجىنىڭ 40 پايىزىن «دامۋ» قورى كرەديت رەتىندە بولگەن.
پرەزيدەنت وقۋ كابينەتتەرىن, كىتاپحانانى, سپورت زالىن ارالاپ كوردى.
سودان سوڭ مەملەكەت باسشىسى ينكليۋزيۆتى سپورت ورتالىعىنىڭ قىزمەتىمەن تانىستى. بۇل – ەلىمىزدەگى مۇگەدەكتىگى بار ادامدارعا ارنالعان سپورتتىق, مەديتسينالىق, وڭالتۋ جانە ءبىلىم بەرۋ ينفراقۇرىلىمىن بىرىكتىرگەن العاشقى كەشەن.
استانادا مۇمكىندىگى شەكتەۋلى 42 مىڭعا جۋىق ازامات تۇرادى. ولاردىڭ باسىم كوپشىلىگى – بالالار, جاستار مەن ەڭبەككە قابىلەتتى جاستاعى ادامدار. ولار ورتالىقتا سپورتپەن تۇراقتى تۇردە شۇعىلدانىپ, وڭالتۋ كۋرسىنان وتە الادى. وسىلايشا, الەۋمەتتىك ورتاعا بوي ۇيرەتەدى.
مەكەمەدە كوپ فۋنكتسيونالدى سپورت زالى, رەابيليتاتسيا بلوگى, 15 مەديتسينالىق كابينەت, كونفەرەنتس-زال, سونداي-اق التى بولمەلى قوناقۇي سەكتورى قاراستىرىلعان. مۇندا وقۋ-جاتتىعۋ جيىنى, جارىستار مەن ءبىلىم باعدارلامالارى كەزىندە پاراسپورتشىلار جايعاسادى. ورتالىقتا سپورتتىڭ 12 بەيىمدەلگەن تۇرىنەن جاتتىعۋ جۇرگىزىلەدى.
سپورت جانە ءبىلىم سالالارىندا مۇمكىندىگى شەكتەۋلى بالالارمەن جۇمىس ىستەيتىن مامان دايارلاۋعا ايرىقشا ءمان بەرىلەدى.
