فوتو: اقوردا
پرەزيدەنتتىڭ سوزىنشە, قوعامدا جوعارى ەكولوگيالىق مادەنيەت قالىپتاسىپ, تۇرعىندار ورتاق مەكەنىمىزدىڭ تىنىس-تىرشىلىگىنە بەلسەندى ارالاسا باستاعانى قۋانتادى.
ء«دال وسى سەبەپتى «تازا قازاقستان» جوباسىن باستادىم. ونى بۇكىل ەل قولدادى. قورشاعان ورتانى قورعاۋ – ستراتەگيالىق ماسەلە.
«تازا قازاقستان» يدەولوگيالىق كومپانياسىنا نە ءۇشىن باستاماشى بولعانىمدى ايتايىن. ويتكەنى ەكولوگيا, تۇرمىس-تىرشىلىكتەگى تازالىق بولمىسىمىزدىڭ ءبىر بولىگىنە اينالۋعا ءتيىس.
جالپى, ازيانىڭ بىرقاتار قالاسىندا قالدىقتاردى جويۋدىڭ ەكونوميكاعا نەگىزدەلگەن تاسىلدەرى قولدانىلادى. شىنىندا دا قوقىسپەن كۇرەسۋ كەرەك», دەدى پرەزيدەنت.
قاسىم-جومارت توقاەۆتىڭ ايتۋىنشا, توكيودا 14 ميلليون ادام تۇرادى. ازعانتاي اۋماقتا وسىنشاما حالىق ءومىر ءسۇرىپ جاتسا دا, ونداعى تازالىق پەن ءتارتىپ وتە جوعارى دەڭگەيدە.
«مىسالى, سامميتتە سويلەگەن سوزىمدە جاپونيا پرەمەر-مينيسترىنە «ەلىڭىزدىڭ قۋاتى – ادامدارىڭىزدا. سىزدەر ۇنەمى ۇيلەسىمدىلىككە ۇندەيسىزدەر. جاپوندار ۇيرەنۋدەن جالىقپايدى. ءوزىن قالاي ۇستاۋدى بىلەدى, وزگە ادامدارعا قۇرمەتپەن قارايدى. ءۇيىن, پاتەرىن, ءوزى وتىرعان عيماراتتى تازا ۇستايدى. سونىمەن قاتار ولار ۇزدىكسىز ءبىلىم الادى ءارى ونى وسكەلەڭ ۇرپاققا دا سىڭىرەدى» دەپ جىلى ءسوزىمدى ارنادىم.
بىزگە دە ءدال وسىنداي مەنتاليتەت قاجەت. سوندىقتان تسيفرلاندىرۋ مەن جاساندى ينتەللەكتىدەن ۇلكەن ءۇمىت كۇتەمىن. ءبىز العا قارىشتاپ قادام باسىپ, تەحنولوگيالىق ۇلت بولۋدىڭ ۇلگىسىنە اينالۋىمىز كەرەك», دەدى پرەزيدەنت.
پرەزيدەنت: قالدىقتاردى قايتا وڭدەۋدىڭ زاماناۋي جۇيەسىن قالىپتاستىرۋدى جەدەلدەتۋ كەرەك
«استانا, الماتى جانە شىمكەنت قالالارىندا وسى تەكتەس جوبالاردى ىسكە قوسۋ پىسىقتالىپ جاتىر. سونىڭ اياسىندا تاۋلىگىنە مىڭ جارىم تونناعا دەيىن قالدىق وڭدەۋ, ەلەكتر ەنەرگياسىن ءوندىرۋ قاراستىرىلعان.
ەل بويىنشا قالدىقتاردى جويۋدى كوزدەيتىن 40-تان استام جوبا جوسپارلانعان», دەدى پرەزيدەنت.
مەملەكەت باسشىسىنىڭ ايتۋىنشا, ولاردىڭ ءبارى بەلگىلەنگەن مەرزىمدە ءارى ساپالى جۇزەگە اسىرىلۋعا ءتيىس.
«سونىمەن قاتار قالدىقتاردى سۇرىپتاۋ جانە قوقىس پوليگوندارىن دامىتۋ ماسەلەسىنە ءمان بەرۋ ماڭىزدى.
بۇل ءىستى كەيىنگە قالدىرۋدىڭ ەكولوگيالىق سالدارى اۋىر بولاتىنىن ءارى ونىڭ تۇرعىندار تۇرمىسىنا تەرىس اسەر ەتەتىنىن حالىقارالىق تاجىريبە كورسەتىپ وتىر. سوندىقتان ۇكىمەت وسى باعىتتا قاجەتتى شارالار قابىلداعانى دۇرىس», دەدى قاسىم-جومارت توقاەۆ.
