تۇرىكمەنستان كاسىپكەرلەرى ەلىنەن قاشىپ جاتىر

استانا. 23 ناۋرىز. ۇستىمىزدەگى جىلدىڭ ناۋرىز ايىنىڭ باسىندا تۇرىكمەنستاننىڭ ءىرى كاسىپكەرلەرى وتباسىلارىمەن بىرگە ەلدەن بوي تاسالادى. ولاردىڭ باسىم بولىگى بىرىككەن اراب امىرلىگىنەن, قالعاندارى تۇركيا مەن رەسەيدەن ءۇي ساتىپ العان. بۇل تۋرالى chrono-tm.org حابارلادى. تاراتا ايتار بولساق, كاسىپكەرلەردىڭ ءبىرى تۇرىكمەنستاندا جۇمىس ىستەۋ مۇمكىن ەمەس دەيدى. سەبەبى, ەل پرەزيدەنتىنىڭ تۋىستارى ءىرى-ءىرى كومپانيالاردىڭ جۇمىسىنا كەدەرگى كەلتىرىپ, بيزنەس سالاسىندا ولاردىڭ تابىستارىن ءوز باقىلاۋلارىندا ۇستاعىسى كەلەتىن كورىنەدى. سونداي-اق, الگى ازامات: «مەن سالىق تولەۋدەن تەرىس اينالدىم. ويتكەنى, ولاردىڭ اقشاعا دەگەن تابەتتەرى كۇن سايىن ەمەس, ساعات سايىن ارتىپ بارادى. ەلدە قارجىلىق شيەلەنىس, سالىق تولەمدەرىنىڭ ءوسۋى انىق بايقالىپ وتىر. كاسىپكەرلەردىڭ دەرلىگى شىعىنعا باتتى. مۇندا ەشقانداي بولاشاق جوق. شەتەلدىك ءىرى كومپانيالاردىڭ ەلدەن تەز كەتۋى بەكەر ەمەس», – دەپتى. ايتا كەتەيىك, ازىرگە ەلدەن شىعىپ كەتكەن 6 كاسىپكەردىڭ اتى بەلگىلى بولىپ وتىر. الايدا, بۇلاردان بولەك قانشا بيزنەسمەن تۇرىكمەنستاننان كەتكەنىن ەشكىم ءدوپ باسىپ ايتا الماۋدا. ولاردىڭ اراسىندا مەملەكەتپەن جانە Polimeks, Halliburto سەكىلدى تانىمال فيرمالارمەن ارىپتەستىك بايلانىس ورناتا وتىرىپ, ەلگە قۇرىلىس تەحنيكالارى مەن ماتەريالدارىن, مۇناي جانە گاز قوندىرعىلارىن تاسىمالداۋشى قۇرىلىمداردىڭ جەتەكشىلەرى بار. تالعات رايىمبەك. دەرەك, سۋرەت: chrono-tm.org.