ماراپاتتاۋ راسىمىندە قورعانىس ءمينيسترى ارميانى دامىتۋدىڭ نەگىزگى باسىمدىقتارىنا توقتالدى. ونىڭ ايتۋىنشا, قازىرگى كەزەڭدە اسكەردىڭ ۇتقىرلىعى, تەحنولوگيالىق جاڭاشىلدىققا بەيىمدىلىگى جانە جەكە قۇرامنىڭ قاجەتتىلىكتەرىنە باعىتتالعان ساياسات شەشۋشى مانگە يە.
مينيستر قورعانىس سالاسىنا اقپاراتتىق تەحنولوگيالاردى كەڭىنەن ەنگىزۋ اسكەري باسقارۋ جۇيەلەرىن جەتىلدىرۋگە, قۇقىقتىق ءتارتىپتى نىعايتۋعا, مەديتسينالىق مونيتورينگتى دامىتۋعا جانە ازاماتتارعا كورسەتىلەتىن سەرۆيستىك قىزمەتتەردىڭ ساپاسىن ارتتىرۋعا مۇمكىندىك بەرەتىنىن اتاپ ءوتتى.
«بۇگىن ءبىز كاسىبيلىكتىڭ سوزبەن ەمەس, ناقتى ىسپەن ولشەنەتىنىن كۇندەلىكتى قىزمەتىمەن دالەلدەپ جۇرگەن ازاماتتارعا قۇرمەت كورسەتىپ وتىرمىز. «اسكەر تارلانى» – كومانديرلەر سەنىمىنىڭ, قارۋلاس سەرىكتەر سىيلاستىعىنىڭ جانە وتباسىلار ماقتانىشىنىڭ ايقىن كورىنىسى. سىزدەردىڭ ءبىلىمىڭىز, سابىرىڭىز, تارتىپكە بەرىكتىگىڭىز بەن جولداستىق رۋحىڭىز – ارميانىڭ باستى قۇندىلىعى», دەدى داۋرەن قوسانوۆ.
ۇزدىكتەر ەسىمى اتالدى
كاسىبي سايىس قورىتىندىسى بويىنشا ۇزدىك ۇشقىش اتالىمىن مايور اسحات تەزەكباەۆ (53975 اسكەري ءبولىمى) يەلەندى. ۇزدىك تەڭىزشى اتاندى – «ماڭعىستاۋ» زىمىران-ارتيللەريالىق كەمەسىنىڭ كومانديرى, 3-دارەجەلى كاپيتان ەرمەكباي وسپانوۆ (29011 اسكەري ءبولىمى).
ارنايى وپەراتسيالار كۇشتەرىنىڭ 20030 اسكەري بولىمىندە قىزمەت ەتەتىن اعا لەيتەنانت باقىتجان جايلاۋباەۆ «جاۋجۇرەك» نوميناتسياسىمەن ماراپاتتالدى. ال اۋە شابۋىلىنا قارسى قورعانىس اسكەرلەرىنىڭ 97638 اسكەري ءبولىمىنىڭ سەرجانتى اندرەي فۋكس «اۋە قورعاۋشىسى» اتالىمىنا يە بولدى.
جاۋىنگەرلىك دايىندىقتاعى ۇزدىك سەرجانت دەپ 18404 اسكەري ءبولىمىنىڭ 3-سىنىپتى سەرجانتى جاندوس راقىمعازى تانىلدى. ۇزدىك سپورتشى اتالىمى 35950 اسكەري ءبولىمىنىڭ كاپيتانى جولداس ساپارعا بەرىلدى.
قۇرلىق اسكەرلەرى قاتارىنان بىرقاتار مامان كاسىبي شەبەرلىگىمەن ەرەكشەلەندى. اعا سەرجانت دانيار بەكجان (12740 اسكەري ءبولىمى) – ۇزدىك ارتيللەريست, كىشى سەرجانت اسحات تىنىشتىق (25744 اسكەري ءبولىمى) – جاۋىنگەرلىك ماشينانىڭ ۇزدىك كومانديرى اتاندى. مەرگەندەر اراسىندا ەفرەيتور ەلنۇر كوزجان (99116 اسكەري ءبولىمى) ۇزدىك دەپ تانىلسا, سەرجانت قۋاندىق احمەتقاليەۆ (10810 اسكەري ءبولىمى) ۇزدىك جۇرگىزۋشى اتالىمىن يەلەندى.
وسكەمەن قالاسىنداعى اسكەري لازارەتتە قىزمەت ەتەتىن سەرجانت اننا گولوۆانوۆانىڭ ەڭبەگى «ابزال جان» نوميناتسياسىمەن باعالاندى.
بىتىمگەرلىك بيىگى
بىتىمگەرلىك ميسسياسىنداعى ۇلگىلى قىزمەتى ءۇشىن مايور باحتيار باتتالوۆ ۇزدىك بىتىمگەر اتاندى. ۇزدىك بايلانىسشى – اعا سەرجانت رۇستەم ەردەنبەكوۆ (54380 اسكەري ءبولىمى), ال ساپەرلەر اراسىندا سەرجانت ساعيت مىڭباي (44859 اسكەري ءبولىمى) «قايسار جۇرەك» اتالىمىمەن ماراپاتتالدى.
راديوەلەكتروندىق كۇرەس سالاسىنداعى ۇزدىك مامان دەپ كاپيتان مەدەت كۇزەمباەۆ (54179 اسكەري ءبولىمى) تانىلدى. جەدەل كەزەكشى اتالىمىن پودپولكوۆنيك ارتۋر ميساليم (78639 اسكەري ءبولىمى) يەلەندى. تىلدىق قامتاماسىز ەتۋ سالاسىندا كىشى سەرجانت ايبەك ەسەنجولوۆ (44293 اسكەري ءبولىمى) ۇزدىك اتانسا, رادياتسيالىق, حيميالىق جانە بيولوگيالىق قورعاۋ اسكەرلەرىنىڭ ۇزدىك مامانى – سەرجانت ەرنۇر تاڭىربەرگەن (22534 اسكەري ءبولىمى).
كادر قىزمەتى بويىنشا مايور ازامات اشىقوۆ (44803 اسكەري ءبولىمى) ۇزدىك دەپ تانىلسا, تاربيە جۇمىسى جونىندەگى ۇزدىك وفيتسەر اتالىمى پودپولكوۆنيك رەنات قاليدولدينگە (12740 اسكەري ءبولىمى) بۇيىردى. اسكەري پوليتسيا قىزمەتى بويىنشا ۇزدىك – اقتاۋ وڭىرلىك گارنيزونىنىڭ كىشى سەرجانتى قىدىرعالي ءادىلحان.
وتباسى جەتىستىگى
«مەرەيلى وتباسى» بايقاۋىندا اۋە قورعانىسى كۇشتەرىنىڭ 54835 اسكەري بولىمىندە قىزمەت ەتەتىن مايور ەرلان شىناليەۆتىڭ وتباسى جەڭىسكە جەتتى.
ال «جىل سەرپىلىسى» اتالىمى ەلورداداعى 68665 اسكەري ءبولىمىنىڭ «جۇلدىزدى جىگىتتەر» كومانداسىنا بەرىلدى. ونەرلى ۇجىم «قازاقستان CUP» ليگاسىندا جۇلدەلى ءۇشىنشى ورىن الىپ, 2026 جىلى وتەتىن «جايدارمان» ۇلتتىق ليگاسىنا جولداما الدى.
سونداي-اق «جاس سارباز داۋىسى» نوميناتسياسى ماسكەۋدە وتكەن «گولوس. دەتي» بايقاۋىندا جۇلدەگەر اتانعان «جاس سارباز» ستۋدياسىنىڭ تاربيەلەنۋشىسى جاسمينا تۇزەلوۆاعا تابىستالدى.
ىرىكتەۋ جۇمىستارى 27 نوميناتسيا بويىنشا جۇرگىزىلدى. بايقاۋ جەڭىمپازدارى ديپلومدارمەن, اتاۋلى مۇسىنشەلەرمەن جانە اقشالاي سىيلىقتارمەن ماراپاتتالدى.
