پرەمەرا قوناقتارىنىڭ قاتارىندا تانىمال اكتەرلەر ارتۋر اسكار ۇلى, سانجار ءمادي, بەلگىلى اكتريسالار اسەل قاليەۆا, نۇراي جەتكەرگەن, رەجيسسەر جانە پروديۋسەر قۋانىش بەيسەك, پروديۋسەر ءارى ينتەرۆيۋەر تيمۋر بالىمبەتوۆ, مۋزىكانت dudeontheguitar, ءانشى Ayau, ستەنداپ-كوميك شىڭعىس ەرمەك, سونداي-اق تانىمال بلوگەرلەر ازيزا ايبادۋللينا, ءبىرجان ءاشىم جانە باسقا دا ونەر وكىلدەرى بولدى. سونىمەن قاتار پرەمەراعا «اۆاتار: وت پەن كۇل» ءفيلمىنىڭ دۋبلياج رەجيسسەرى شاح-مۇرات ورداباەۆ تا قاتىستى.
ء«بىز ءۇشىن قازاقستاندىق كورەرمەندەردىڭ «اۆاتار: وت پەن كۇل» ءفيلمىن ءوز انا تىلىندە تاماشالاي الۋى – ەرەكشە ماڭىزدى. بۇل پرەمەرا – جىلدىڭ ەڭ ماڭىزدى وقيعالارىنىڭ ءبىرى. ال ءبىز ءۇشىن, ديستريبيۋتور رەتىندە جىلدى اۋقىمدى ءارى بىرلىككە شاقىراتىن شارامەن قورىتىندىلاۋعا بەرىلگەن مۇمكىندىك. بۇل فيلم وتباسىن ءبىر شاڭىراق استىنا جيناپ, ۇرپاقتار ساباقتاستىعىن نىعايتادى, وتباسىلىق قۇندىلىقتاردىڭ ماڭىزىن ەسكە سالادى. الەمدىك پرەمەرانى ءوز انا تىلىندە كورۋ كورەرمەن ءۇشىن شىنىمەن دە ماڭىزدى. بۇعان Disney ستۋدياسىنىڭ «اڭدار شاھارى 2» انيماتسيالىق ءفيلمىنىڭ قازاقشا دۋبلياجىنىڭ كورسەتكىشى دالەل بولا الادى. فيلم قازاقستانداعى جالپى كاسسالىق تابىستىڭ 15,7%-ىن قۇرادى. بۇل بۇعان دەيىنگى گولليۆۋدتىق فيلمدەردىڭ قازاقشا نۇسقالارىنان جوعارى ناتيجە كورسەتتى. قازاقستاندىق كورەرمەندەردىڭ ۆيزۋالدىق مۇمكىندىكتەرى, اۋقىمى مەن ەلىكتىرەر وقيعاسى ءتانتى ەتەتىن وسى بىرەگەي تاريحتىڭ ءبىر بولىگىنە اينالىپ جاتقانىن كورۋ – ءبىز ءۇشىن ۇلكەن قۋانىش», دەدى Ascar Cinema كومپانياسىنىڭ ماركەتينگ ديرەكتورى دينارا چەكانوۆا.
«ەندى الەمدىك كينويندۋستريانىڭ ەڭ اۋقىمدى جوبالارىنىڭ ءبىرى – «اۆاتار» ءفيلمىنىڭ ءۇشىنشى ءبولىمىن قازاق تىلىندە كورەمىز. بۇل – جاي عانا اۋدارما ەمەس, قازاق ءتىلىنىڭ جاھاندىق مادەني كەڭىستىكتە ءوز ورنى قالىپتاسىپ كەلە جاتقانىنىڭ بەلگىسى. «اۆاتار» – تۇتاس وركەنيەت پەن فيلوسوفيانى قامتيتىن الەم. سول الەمنىڭ قازاقشا سويلەۋى – ءتىلىمىزدىڭ مۇمكىندىگى مەن الەۋەتىن ارتتىرىپ, ونى زاماناۋي مادەنيەتتىڭ تولىققاندى تىلىنە اينالدىرادى دەپ سەنەمىز», دەدى حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى.
