فوتو: pexels.com
جاپونيا ازيا دامۋ بانكىنىڭ (ادب) جانە ەۋروپالىق قايتا قۇرۋ جانە دامۋ بانكىنىڭ (ەقدب) ەڭ ءىرى اكتسيونەرلەرىنىڭ ءبىرى رەتىندە ولاردىڭ پوستكەڭەستىك رەسپۋبليكالارداعى قىزمەتىن كەڭەيتۋگە ىقپال ەتتى. ادب ءۇشىن قازاقستاننىڭ 1994 جىلى بانككە قوسىلۋى كەزىندە تەحنيكالىق كومەكتى قارجىلاندىرسا, ەقدب ءۇشىن ىنتىماقتاستىقتىڭ ارنايى قورىن قۇرىپ, ساراپتامالىق قولداۋ مەن قاجەتتى زاڭنامالىق بازانى دايىنداۋعا جاردەمدەستى. بۇل ورتالىق ازيانىڭ جاھاندىق قارجى جۇيەسىنە ينتەگراتسيالانۋىنا, نارىقتىق ەكونوميكانىڭ نىعايۋىنا جانە قازاقستاننىڭ وڭىرلىك تاۋەلدىلىگىنىڭ تومەندەۋىنە ىقپال ەتتى.
جاپونيانىڭ قازاقستانعا سەنىمى جوعارى
ۇلتتىق بانكتىڭ دەرەكتەرىنە سايكەس, 2024 جىلدىڭ قورىتىندىسى بويىنشا جاپونيادان قازاقستانعا تىكەلەي شەتەلدىك ينۆەستيتسيالار اعىنى 468,6 ملن دوللارعا جەتكەن (+16%). بۇل كورسەتكىشتەر جاپون بيزنەسىنىڭ ەلدىڭ ەكونوميكالىق ساياساتىنا جانە ينۆەستيتسيالىق احۋالىنا دەگەن جوعارى سەنىمىن ايقىن كورسەتەدى.
وڭ سەرپىن ءوزارا ساۋدا-ساتتىقتا دا بايقالادى
2024 جىلدىڭ قورىتىندىسى بويىنشا قازاقستان مەن جاپونيا اراسىنداعى تاۋار اينالىمى شامامەن 1,8 ملرد دوللاردى قۇراعان. ال 2025 جىلدىڭ 10 ايىندا بۇل كورسەتكىش 1,4 ملرد دوللارعا جۋىقتاعان.
ەلىمىزدە 70 جاپون كومپانياسى بار
قازاقستاندا Sumitomo, Marubeni, Toshiba, Mitsui جانە باسقا دا كومپانيالاردى قوسا العاندا, شامامەن 70 جاپون كومپانياسى تابىستى جۇمىس ىستەپ جاتىر. جاپون تاراپى تاۋ-كەن مەتاللۋرگياسى سالاسىنداعى, ەنەرگەتيكاداعى, سونداي-اق ترانزيتتىك-كولىك سالاسىنداعى ءىرى جوبالاردى ىسكە اسىرۋعا بەلسەندى قاتىسىپ كەلەدى.
Marubeni كومپانياسى
جاپونيا نارىعىندا Marubeni كومپانياسى ساۋدا, ينۆەستيتسيا, مينەرالدىق رەسۋرستاردى ءوندىرۋ مەن وڭدەۋ, سونداي-اق ينفراقۇرىلىمدى دامىتۋ سالالارىندا كوشباسشى بولىپ سانالادى. قازاقستاندا بۇل كومپانيا اتىراۋ مۇناي وڭدەۋ زاۋىتىن جانە استانا قالاسىنىڭ حالىقارالىق اۋەجايىن قايتا جاڭعىرتۋ جوبالارىنا قاتىستى. «قازاتومونەركاسىپ» ۇاك» اق-مەن بىرلەسىپ, حوراسان ۋران كەن ورنىن يگەرۋ جانە قىزىلوردا وبلىسىندا كۇكىرت قىشقىلى زاۋىتىن سالۋ جۇمىستارى جۇرگىزىلىپ جاتىر. سونىمەن قاتار, Marubeni قازاقستاندا دەكاربونيزاتسيا جانە كومىرقىشقىل گازى شىعارىندىلارىن ازايتۋ سالالارىنداعى جوبالاردى ىسكە اسىرۋ مۇمكىندىكتەرىن زەرتتەپ جاتىر.
