جاڭا فورماتتاعى ءبىلىم ورداسىنىڭ جالپى اۋماعى 15 مىڭ شارشى مەتردەن اسادى. مۇندا وقۋشىلاردىڭ ساپالى ءبىلىم الىپ, جان-جاقتى دامۋى ءۇشىن 77 ءپان كابينەتى جابدىقتالعان. مەكتەپتە ءداستۇرلى سىنىپتاردان بولەك, روبوتوتەحنيكا, STEM-زەرتحانالار, ديزاين جانە تەحنولوگيا, ۆيزۋالدى ونەر, مۋزىكا جانە تاماقتانۋ مادەنيەتى سياقتى ارنايى باعىتتاعى كابينەتتەر جۇمىس ىستەيدى.
مەكتەپ ديرەكتورى ليۋبوۆ نامنىڭ ايتۋىنشا, جاڭا عيمارات تەك ءبىلىم بەرۋ ورنى ەمەس, بالالاردىڭ تسيفرلىق ساۋاتتىلىعى مەن شىعارماشىلىق الەۋەتىن ارتتىراتىن زياتكەرلىك كەڭىستىككە اينالماق.
«بۇگىندە مەملەكەتىمىزدىڭ باستى باسىمدىقتارىنىڭ ءبىرى – ساپالى ءبىلىم بەرۋ جۇيەسىن قالىپتاستىرۋ. وسى ورايدا, «كەلەشەك مەكتەپتەرى» ۇلتتىق جوباسى اياسىندا بوي كوتەرگەن جاڭا ءبىلىم ورداسى – ءبىزدىڭ مەكتەبىمىز, وسى باستامانىڭ جارقىن كورىنىسى دەپ بىلەمىز. مەكتەپ ۇجىمى – تاجىريبەلى, جاڭاشىل ۇستازداردان قۇرالعان. ءبىز ءبىلىم مەن تاربيەنى تەڭ ۇستاۋدى باستى مىندەت سانايمىز. بالانىڭ جان-جاقتى دامۋى, قاۋىپسىز ورتادا ەركىن ويلاپ, ءوز بولاشاعىن قالىپتاستىرۋى – ءبىزدىڭ كۇندەلىكتى جۇمىسىمىزدىڭ نەگىزى. وسى مۇمكىندىكتى پايدالانا وتىرىپ, بارلىق اتا-انالاردى, قوعام مۇشەلەرىن مەكتەپپەن تىعىز بايلانىستا بولۋعا, ءبىلىم بەرۋ ىسىنە قولداۋ بىلدىرۋگە شاقىرامىن», دەپ اتاپ ءوتتى مەكتەپ باسشىسى.
ەرەكشە ءبىلىم بەرۋدى قاجەت ەتەتىن بالالار ءۇشىن مەكتەپتە كەدەرگىسىز ورتا قالىپتاسقان: ارنايى جەدەلساتىلار, ينكليۋزيۆتى قولداۋ كابينەتتەرى مەن سەنسورلىق بولمەلەر قاراستىرىلعان. سونىمەن قاتار قاۋىپسىزدىك ماسەلەسىنە دە باسىمدىق بەرىلىپ, 126 بەينەباقىلاۋ كامەراسى ورناتىلعان. مەكتەپ اۋلاسىندا سپورتتىق جانە ويىن الاڭدارى تولىق جابدىقتالعان.
ايتا كەتەيىك, بۇعان دەيىن ماڭعىستاۋ وبلىسىندا وسى جوبا اياسىندا 11 مىڭنان استام وقۋشىعا ارنالعان 12 مەكتەپ اشىلعان بولاتىن. بۇگىنگى №35 مەكتەپتىڭ ىسكە قوسىلۋىمەن وڭىردە جوسپارلانعان بارلىق 13 ءبىلىم نىسانى حالىق يگىلىگىنە بەرىلدى.
