دەنساۋلىق ساقتاۋ سالاسىن تسيفرلاندىرۋ جانە قارجىلىق ءتارتىپ ماسەلەسى بويىنشا كەڭەس ءوتتى

وندا دەنساۋلىق ساقتاۋ مينيسترلىگىنىڭ الەۋمەتتىك مەديتسينالىق ساقتاندىرۋ قورىنىڭ قىزمەتىن جەتىلدىرۋگە جانە تسيفرلىق ترانسفورماتسياسىنا قاتىستى تاسىلدەرى قارالدى. حالىققا ءمامس شەڭبەرىندە كورسەتىلەتىن مەديتسينالىق كومەكتىڭ قولجەتىمدىلىگى مەن ساپاسىن ارتتىرۋ بويىنشا جۇرگىزىلىپ جاتقان جۇمىستارعا نازار اۋدارىلدى. 

قازاقستاندا مىندەتتى الەۋمەتتىك مەديتسينالىق ساقتاندىرۋ جۇيەسىمەن شامامەن 17 ملن ادام قامتىلعان, ونىڭ 12 ملن-عا جۋىعى جەڭىلدىككە يە ساناتتارعا جاتادى. دەنساۋلىق ساقتاۋ ءمينيسترى اقمارال ءالنازاروۆا ءمامس قاراجاتىنىڭ جيىنتىق كولەمى 6 جىل ىشىندە 6,8 ترلن تەڭگەدەن اسقانىن باياندادى, ونىڭ 2 ترلن تەڭگەسى – ازاماتتاردىڭ جەڭىلدىككە يە ساناتتارى ءۇشىن بەرىلگەن مەملەكەتتىك جارنالار. تەك بيىلدىڭ وزىندە عانا وسى ماقساتتارعا 1,4 ترلن تەڭگە اۋدارىلعان.

جيىنعا قاتىسۋشىلار مىندەتتى الەۋمەتتىك ساقتاندىرۋ پاكەتى 2026 جىلدىڭ 1 قاڭتارىنان باستاپ كەڭەيتىلەتىنىنە بايلانىستى تسيفرلىق تەتىكتەردى ەنگىزۋ ارقىلى قاداعالاۋدى كۇشەيتە ءتۇسۋ جانە جۇيەنىڭ اشىقتىعى ماسەلەلەرىن تالقىلادى. كەلەر جىلدان باستاپ حالىقتى مىندەتتى الەۋمەتتىك مەديتسينالىق ساقتاندىرۋمەن قامتۋ ايتارلىقتاي كەڭەيمەك. ءتيىستى زاڭنامالىق وزگەرىستەر جاڭا جىلدان باستاپ كۇشىنە ەنەدى.

بۇگىندە قازاقستاندا مەديتسينالىق كومەكتىڭ 92%-ى اۆتوماتتى تۇردە جۇزەگە اسىرىلادى. 2026 جىلدىڭ سوڭىنا دەيىن ونى  100%-عا دەيىن جەتكىزۋ جوسپارلانىپ وتىر, بۇل ادامي فاكتوردى تولىعىمەن الىپ تاستاۋعا مۇمكىندىك بەرەدى.

ودان بولەك ساتىپ الۋ, مەديتسينالىق قىزمەتتەرگە اقى تولەۋ سياقتى باسقا دا نەگىزگى بيزنەس-پروتسەستەر تسيفرلاندىرىلدى. قوردىڭ اقپاراتتىق جۇيەسىن دەنساۋلىق ساقتاۋ, ەڭبەك جانە حالىقتى الەۋمەتتىك قورعاۋ مينيسترلىكتەرى جانە eGov جۇيەلەرىمەن ينتەگراتسيالاۋ جەڭىلدىككە يە ساناتتار بويىنشا دەرەكتەردىڭ اۆتوماتتى تۇردە جاڭارتىلۋىن قامتاماسىز ەتتى جانە مەديتسينالىق ساقتاندىرۋ جۇيەسى جارنالارىن ەسەپكە الۋدىڭ دالدىگىن ارتتىردى.

بيىل حالىقتىڭ مەديتسينالىق قىزمەتتەر كولەمىنە ناقتى قاجەتتىلىگىن ەسەپتەۋدى ەسكەرە وتىرىپ, جوسپارلاۋ قاعيدالارىن, ادىستەرى مەن تاسىلدەرىن بەكىتۋ ماڭىزدى قادام بولدى. كەلەسى جىلى جوسپارلاۋدىڭ بارلىق پروتسەسىن تسيفرلاندىرۋ اياقتالادى, بۇل ەسەپتەۋلەردى تەك بۇرىنعى دەرەكتەر نەگىزىندە عانا ەمەس, سونىمەن قاتار كورسەتىلگەن مەديتسينالىق كومەكتىڭ ناقتى كولەمىن جانە بولجامداردى ەسكەرە وتىرىپ جۇزەگە اسىرۋعا مۇمكىندىك بەرەدى.

2025 جىلدىڭ 1 شىلدەسىنەن بەرى مەديتسينالىق قىزمەتتەردىڭ ساپاسىنا مونيتورينگ جاساۋ جانە اقى تولەۋ بىرىڭعاي تسيفرلىق كونتۋرعا بىرىكتىرىلگەن. جاڭا مودۋل تولەم قۇجاتتارىنىڭ سانىن 9-دان 3-كە دەيىن قىسقارتتى جانە 1س بۋحگالتەريامەن ۇزدىكسىز ينتەگراتسيانى قامتاماسىز ەتتى. سونىمەن بىرگە جۇيەنىڭ ء«السىز تۇستارى» دا انىقتالدى. ىقتيمال تاۋەكەلدەر دەنساۋلىق ساقتاۋ مينيسترلىگىنىڭ باقىلاۋىندا, ولار تسيفرلىق قۇرالداردى ەنگىزۋ ارقىلى جويىلادى.

مەديتسينالىق ۇيىمداردا Face ID جۇيەسى ەنگىزىلۋدە, بۇل بۇگىندە مەديتسينالىق مەكەمەلەر تاراپىنان تىركەۋلەر سانىن 7%-عا تومەندەتۋگە جانە بيۋدجەت قاراجاتىنىڭ شامامەن 10,5 ملرد تەڭگەسىن ۇنەمدەۋگە مۇمكىندىك بەردى.

كەلەسى جىلى مەديتسينالىق قىزمەتتەردى ءبولۋ ءۇشىن رەيتينگتىك باعانى ەسەپتەۋ ينديكاتورلارىن تولىق تسيفرلاندىرۋ جوسپارلانىپ جاتىر. سونىڭ ناتيجەسىندە مەديتسينالىق كومەكتىڭ جوعارى ساپاسى مەن قولجەتىمدىلىگىن قامتاماسىز ەتە العان جەتكىزۋشىلەر قارجىلاندىرۋ مۇمكىندىگىنە يە بولماق. 2026 جىلى مەديتسينالىق دەرەكتەردىڭ بىرىڭعاي قويماسىن قالىپتاستىرۋ جونىندەگى جۇمىستىڭ اياقتالۋى كورسەتىلەتىن مەديتسينالىق كومەكتى جوسپارلاۋ مەن ساپاسىن جاقسارتۋعا اسەر ەتەدى.

حالىققا ارنالعان ءدارى-دارمەكتەردى جوسپارلاۋ مەن بەرۋ تيىمدىلىگى ماسەلەلەرىنە بولەك نازار اۋدارىلدى. كلينيكالىق حاتتامالاردى تسيفرلاندىرۋ جانە بىرلەسىپ تولەۋ تەتىكتەرىن ەنگىزۋ بويىنشا كەزەڭ-كەزەڭمەن جۇمىستار جۇرگىزىلىپ جاتىر, بۇل ەم الۋشىلاردى قاجەتتى پرەپاراتتارمەن قامتاماسىز ەتۋ ۇدەرىستەرىن وڭتايلاندىرۋعا مۇمكىندىك بەرەدى. 

ء«بىزدىڭ باعىت – كورسەتىلەتىن مەديتسينالىق قىزمەتتەردىڭ ساپاسىن ۇنەمى جاقسارتا وتىرىپ, قولجەتىمدىلىگىن ارتتىرۋ. تسيفرلاندىرۋدىڭ العاشقى ناتيجەلەرىن قازىردىڭ وزىندە كورىپ وتىرمىز. وزىق تەحنولوگيالاردى قارقىندى ەنگىزۋدى جالعاستىرۋ قاجەت. پروتسەستەردى اۆتوماتتاندىرۋ مەديتسينالىق پەرسونالدى بيۋروكراتيالىق راسىمدەردەن بوساتىپ قانا قويماي, ەمدەۋ مەن ءدارى-دارمەككە بولىنگەن قاراجاتتىڭ جۇمسالۋىنىڭ اشىقتىعىن قامتاماسىز ەتەدى. سول كەزدە ازاماتتار دا, دارىگەرلەر دە, مەملەكەت تە رەفورمالاردىڭ ناتيجەلەرىن ايقىن كورەتىن بولادى», دەدى ولجاس بەكتەنوۆ.

جيىن قورىتىندىسى بويىنشا پرەمەر-مينيستر دەنساۋلىق ساقتاۋ, جاساندى ينتەللەكت جانە تسيفرلىق دامۋ مينيسترلىكتەرىنە پروتسەستەردى تسيفرلاندىرۋ جۇمىسىن جانداندىرۋدى تاپسىردى. قارجى مينيسترلىگى دەنساۋلىق ساقتاۋ جۇيەسىندە قارجىلىق ءتارتىپتى كۇشەيتۋ جونىندە شارالار قابىلدايدى.