سوڭعى ۋاقىتتا ينتەرنەت-الاياقتىقتىڭ جاڭا ءتۇرى تارالىپ كەلەدى.
«قاسكۇنەمدەر جەتكىزۋ قىزمەتتەرى, باسقارۋشى كومپانيالار جانە بانكتەر اتىنان ءارتۇرلى حابارلامالار مەن SMS-حابارلامالار جىبەرىپ, ازاماتتاردى وزدەرى قايتا قوڭىراۋ شالۋعا يتەرمەلەيدى. مۇنداي تاسىلدەر ازاماتتاردىڭ قىراعىلىعىن تومەندەتىپ, قاۋىپتىڭ الدىن الا بايقالماۋىنا اكەلەدى», دەلىنگەن ءىىم تاراتقان حابارلامادا.
الاياقتار «اۆتوريزاتسياداعى قاتە», «دوموفوندى اۋىستىرۋ», «ەسەپتەگىشتەردى تەكسەرۋ» سياقتى سىلتاۋلارمەن ازاماتتاردى ءوز ەركىمەن بايلانىسقا شىعۋعا ماجبۇرلەيدى. سالدارىنان ەش كۇماندانباعان تۇرعىندار كيبەرالاياقتارعا الەۋمەتتىك ينجەنەريا ادىستەرىن قولدانۋعا مۇمكىندىك بەرەدى. مۇنداي جاعدايلاردا قاسكۇنەمدەر سەنىمگە كىرىپ, جەكە دەرەكتەردى, بانك مالىمەتتەرىن الۋعا نەمەسە قارجىلىق شىعىن كەلتىرۋگە باعىتتالعان ارەكەتتەر جاسايدى.
الدىن الۋ ماقساتىندا پوليتسيا مىناداي ساقتىق شارالارىن ۇسىنادى:
- بەيمالىم حاتتارعا, حابارلامالار مەن قوڭىراۋلارعا سىني كوزقاراسپەن قاراۋ;
- ۇيىمداردىڭ تەك رەسمي سايتتارىندا كورسەتىلگەن بايلانىس نومىرلەرى ارقىلى عانا قوڭىراۋ شالۋ; ەكى فاكتورلى اۋتەنتيفيكاتسيانى پايدالانۋ;
- بانك كارتالارىنىڭ دەرەكتەرىن, SMS ارقىلى كەلەتىن ءبىر رەتتىك كودتاردى جانە وزگە دە قۇپيا اقپاراتتى بوگدە تۇلعالارعا بەرمەۋ.
ايتا كەتەيىك, بۇعان دەيىن پاۆلوداردا بەلگىسىز ادامدار وزدەرىن ەنەرگەتيكا ورتالىعىنىڭ قىزمەتكەرى رەتىندە تانىستىرىپ, زەينەتكەردىڭ شوتىنان 24 ملن تەڭگە يەمدەنىپ الماقشى بولعان ەدى.
