ونىڭ ايتۋىنشا, تەكسەرۋدى ءىىم-ءنىڭ كۇزەت قىزمەتىن باقىلاۋ دەپارتامەنتى وتكەن اپتادا باستاعان.
«ناقتى مۋزەيلەر تىزبەسى بار. ۇلتتىق جانە مەملەكەتتىك مۋزەيلەردىڭ ءبىر بولىگى پوليتسيا قىزمەتكەرلەرى مەن مامانداندىرىلعان كۇزەت قىزمەتىنىڭ باقىلاۋىندا. ال كەيبىر مۋزەيلەر جەرگىلىكتى اتقارۋشى ورگانداردىڭ قۇزىرەتىنە كىرەدى. ءبىز جۇمىستى كەلەسى اپتانىڭ سوڭىنا دەيىن تولىق اياقتاپ, ۇكىمەت ارقىلى ءتيىستى ۇسىنىس ەنگىزەمىز», دەدى سانجار ءادىلوۆ ءماجىلىس كۋلۋارىندا.
ۆيتسە-ءمينيستردىڭ اتاپ وتۋىنشە, ەلىمىزدەگى مادەني نىسانداردىڭ قاۋىپسىزدىگىن كۇشەيتۋ قاجەت. وسىعان بايلانىستى ىشكى ىستەر مينيسترلىگى اكىمدىكتەرگە مادەني قۇندىلىقتارعا قارسى زاڭسىز ارەكەتتەردىڭ الدىن الۋ بويىنشا ارنايى ۇسىنىمدار ازىرلەيدى.
ەسكە سالايىق, بيىل قازان ايىندا پاريجدەگى لۋۆر مۋزەيىندە ءىرى توناۋ دەرەگى تىركەلگەن بولاتىن. قىلمىسكەرلەر جەتى مينۋتتىڭ ىشىندە جالپى قۇنى شامامەن 88 ملن ەۋرو بولاتىن تاريحي جادىگەرلەردى الىپ كەتكەن. كەيىن سەگىز كۇدىكتى ۇستالعانىمەن, بۇرىن فرانتسۋز كورولدىك اۋلەتىنىڭ مۇشەلەرىنە تيەسىلى بولعان بىرقاتار قۇندى بۇيىمدار ءالى كۇنگە دەيىن تابىلعان جوق.
