«ALTAI MAI» وسىمدىك مايىن وندىرۋگە ارنالعان سوڭعى ۇلگىدەگى زاماناۋي كەشەن. مۇندا شيكىزاتتى وڭدەۋدىڭ بارلىق تسيكلى قامتىلعان. ماسەلەن ءونىمدى قابىلداۋ, ونى كەپتىرۋ, ەكستراكتسيالاۋ, تازارتۋ جانە قاپتاۋ تولىق اۆتوماتتاندىرىلعان جۇيەدە جۇرگىزىلەدى. كاسىپورىن جەرگىلىكتى جەردە وسىرىلەتىن كۇنباعىس پەن راپس سياقتى مايلى داقىلداردى وڭدەپ, بىرنەشە ءتۇرلى ءونىم شىعارادى. اتاپ ايتقاندا, تازارتىلعان جانە تازارتىلماعان وسىمدىك مايى, كۇنجارا (شروت), پەللەت جانە باسقا دا ونىمدەر. زاۋىتتىڭ تسەحتارى جوعارى تەحنولوگيالىق جابدىقتارمەن جاراقتالعان.
«بۇگىن ءبىز كوپتەن كۇتكەن ىرگەلى زاۋىتتىڭ اشىلۋىنا جينالدىق. ينۆەستورلار بۇل جوبانى ىسكە اسىرۋ ءۇشىن 23,5 ملرد تەڭگە قارجى قۇيدى. جاڭا زاۋىتتىڭ ەرەكشەلىگى مايلى داقىلداردى تولىق تسيكلدى وڭدەۋدەن وتكىزەدى. قازىر مۇندا 280 ادام ەڭبەك ەتەدى, الداعى ۋاقىتتا 350 ادام جۇمىس ىستەيتىن بولادى. ەڭ باستىسى بۇل كاسىپورىن ەكولوگيا تالاپتارىنا ساي ءارى قالدىقسىز جۇمىس ىستەيدى», دەدى ايماق باسشىسى نۇرىمبەت ساقتاعانوۆ.
مامانداردىڭ ايتۋىنشا, ءونىمنىڭ ءار پارتياسى كوپ ساتىلى ساپا باقىلاۋىنان وتەدى. بۇل ونىڭ تابيعي قۇندىلىعىن ساقتاۋعا, حالىقارالىق ستاندارتتارعا ساي بولۋىنا مۇمكىندىك بەرەدى. وعان قوسا كاسىپورىندا ەكولوگياعا جۇكتەمەنى ازايتاتىن زاماناۋي جۇيەلەر ەنگىزىلگەن, ايتالىق ءتيىمدى تازارتۋ قۇرىلعىلارى, قاۋىپسىز قايتا وڭدەۋ تەحنولوگيالارى جانە قالدىقسىز ءوندىرىس شەشىمدەرى قولدانىلادى.
جاڭا زاۋىتتىڭ ىسكە قوسىلۋى وندىرىستىك قۋاتتى ارتتىرىپ قانا قويماي, بۇكىل اگروونەركاسىپ سەكتورىن دامىتۋعا تىڭ سەرپىن بەرەدى دەيدى ماماندار.
«تاۋلىگىنە 500 توننا كۇنباعىس مايىن, 120 توننا تازارتىلعان ماي, 178 توننا سىعىمدالعان ماي, 50 توننا ەكستراكتسيالى ماي, 200 توننا تۇيىرشىكتى كۇنجارا وڭدەپ شىعارامىز. ساعاتىنا 2 مىڭ بوتەلكە ماي قۇيىلادى. دايىن ونىمدەر تمد ەلدەرىنەن باسقا كورشى قىتايعا, ازيا مەملەكەتتەرىنە ەكسپورتتالادى. بولاشاقتا ەۋروپاعا, اراب ەلدەرىنە شىعارساق دەگەن جوسپارىمىز بار. قازىردىڭ وزىندە قىتايدان سۇرانىس كوپ ءتۇسىپ جاتىر. ءبىزدىڭ كاسىپورىن ولاردىڭ ءبارىن قامتاماسىز ەتۋگە دايىن» دەدى, «ALTAI MAI» زاۋىتىنىڭ باس تەحنولوگى داۋلەن بەيسەنباەۆ.
زاۋىتتىڭ جۇمىسى قالدىقسىز وندىرىسكە باعىتتالعاندىقتان بۇل جەردە مايلى داقىلداردىڭ قابىعىنا دەيىن كادەگە جاراتىلادى. ماسەلەن, كۇنباعىستى سىعىپ, مايىن العان سوڭ قابىعىنان وتىن دايىندالادى. ونى كاسىپورىننىڭ بۋ قازاندىعىنا جاعىپ, ەنەرگياسىن وندىرىسكە پايدالانادى.
زاۋىت وكىلدەرىنىڭ ايتۋىنشا, بۇل كاسىپورىننىڭ اشىلۋى جاڭا ءوندىرىستى ىسكە قوسۋ عانا ەمەس, ءبىرىنشى كەزەكتە يمپورتتى الماستىرۋعا, وتاندىق اۋىل شارۋاشىلىعى وندىرۋشىلەرىن قولداۋعا جانە ەلدىڭ ازىق-ت ۇلىك تاۋەلسىزدىگىن نىعايتۋعا مۇمكىندىك بەرەدى.
شىعىس قازاقستان وبلىسى
