بيىل بالا تۋعانى جانە بالا كۇتىمى ءۇشىن ەل تۇرعىندارى قانشا اقشا الدى؟

ۆەدومستۆو مالىمەتىنشە, جىل باسىنان بەرى رەسپۋبليكالىق بيۋدجەتتەن بالا تۋىنا بايلانىستى 312,2 مىڭ ادام جاردەماقى العان, تولەمدەردىڭ جالپى سوماسى – 56,4 ملرد تەڭگە. جاردەماقى مولشەرى ايلىق ەسەپتىك كورسەتكىشكە (اەك) بايلانىستى جانە 2025 جىلى 6,5%-عا يندەكستەلگەن.
اتاپ ايتقاندا:

• ءبىرىنشى, ەكىنشى جانە ءۇشىنشى بالاعا – 38 اەك نەمەسە 149 416 تەڭگە;

• ءتورتىنشى جانە ودان كەيىنگى بالالارعا – 63 اەك نەمەسە 247 716 تەڭگە تولەنەدى.

بالا ءبىر جارىم جاسقا تولعانعا دەيىنگى كۇتىمگە ارنالعان جاردەماقى مىندەتتى الەۋمەتتىك ساقتاندىرۋ جۇيەسىنە قاتىسپايتىن, بالا كۇتىمىن جۇزەگە اسىراتىن تۇلعالارعا تاعايىندالادى. جىل باسىنان بەرى بۇل جاردەماقىنى ورتا ەسەپپەن 125 مىڭ ادام العان, تولەمدەردىڭ جالپى سوماسى – 40,2 ملرد تەڭگە. اي سايىنعى تولەم مولشەرى:

• ءبىرىنشى بالاعا – 5,76 اەك نەمەسە 22 648 تەڭگە;

• ەكىنشى بالاعا – 6,81 اەك نەمەسە 26 777 تەڭگە;

• ءۇشىنشى بالاعا – 7,85 اەك نەمەسە 30 866 تەڭگە;

• ءتورتىنشى جانە ودان كەيىنگى بالالارعا – 8,90 اەك نەمەسە 34 995 تەڭگە.

جۇمىس ىستەيتىن ازاماتتارعا مەملەكەتتىك الەۋمەتتىك ساقتاندىرۋ قورىنان جۇكتىلىككە جانە بوسانۋعا بايلانىستى بىرجولعى الەۋمەتتىك تولەم تاعايىندالادى. جىل باسىنان بەرى بۇل تولەمدى 187,2 مىڭ ادام العان, جالپى سوماسى – 260 ملرد تەڭگە, ال ورتاشا تولەم مولشەرى 1,4 ملن تەڭگەدەن استى.

«2025 جىلدىڭ 11 ايىندا اتالعان تولەم 223,2 مىڭ ادامعا 392,4 ملرد تەڭگە كولەمىندە تاعايىندالدى, ونىڭ ىشىندە قاراشا ايىندا 14,9 مىڭ ادامعا 33,8 ملرد تەڭگە تولەندى. 11 ايداعى اي سايىنعى ورتاشا تولەم مولشەرى 86 221 تەڭگەنى قۇرادى», دەلىنگەن حابارلامادا.