فوتو: مادەنيەت جانە اقپارات مينيسترلىگى
پرەزيدەنتتەر تاماشالاعان كورمە
كورمەنىڭ اشىلۋىنا دەيىن ونى قاسىم-جومارت توقاەۆ پەن يران يسلام رەسپۋبليكاسىنىڭ پرەزيدەنتى ماسۋد پەزەشكيان تاماشالاعان. قۇجاتتار قازاقستانعا يران پرەزيدەنتىنىڭ استاناعا رەسمي ساپارى اياسىندا بەرىلدى.
ەكسپوزيتسيانى قاراپ شىققان سوڭ قاسىم-جومارت توقاەۆ يراندىق ارىپتەسىنە تاريحي ماتەريالداردى ۇسىنعانى ءۇشىن العىس ايتىپ, ولاردىڭ وتاندىق عىلىم مەن قوعام ءۇشىن ماڭىزدىلىعىن ەرەكشە اتاپ ءوتتى.
«بۇل – وتە قۇندى سىيلىق. ءبىز مىندەتتى تۇردە قازاق قاۋىمىنا بۇل كورمەنى كورسەتەمىز, بۇقارالىق اقپارات قۇرالدارى ارقىلى كەڭىنەن دارىپتەيمىز. بۇرىن بىلمەگەن تاريحي دەرەكتەر بار ەكەن. قازاق حالقىنا پايدالى بولادى دەپ ويلايمىن», دەدى مەملەكەت باسشىسى.
ەكسپوناتتار قازاق دالاسىنداعى (XVIII-XIX عع) باعالى مالىمەتتەردى قامتيدى
مادەنيەت جانە اقپارات مينيسترلىگىنىڭ ءباسپاسوز قىزمەتىنىڭ مالىمدەۋىنشە, قولجازبالاردا قازاق حاندىعىنىڭ الەۋمەتتىك-ەكونوميكالىق جاعدايى, تاۋكە مەن ابىلقايىر حانداردىڭ يران شاحتارىمەن ديپلوماتيالىق بايلانىستارى, تۇركىستانداعى ساياسي احۋال, سونداي-اق قازاقستان اۋماعىنداعى كومىر, تەمىر, مىس, قورعاسىن جانە بيريۋزا كەنىشتەرىنىڭ تابىلىپ, ولاردى ءوندىرۋ ماسەلەسى سيپاتتالعان.
ارحيۆتىك ماتەريالدار قازاقستان مەن يران اراسىنداعى تاريحي بايلانىستاردىڭ تىعىز بولعانىن ايقىن كورسەتەدى. ەكى ەل اۋماعىنان ۇلى جىبەك جولى وتكەن, بۇل ساۋدا, مادەنيەت جانە رۋحاني بايلانىستاردىڭ دامۋىنا ىقپال ەتكەن. يران ارحيۆتەرىندە قازاق حاندىعى, ەلشىلەردىڭ ساپارى مەن مەملەكەتارالىق كەلىسسوزدەر تۋرالى جازبالار ساقتالعان.
تايقازاندى كىم جاسادى؟
يران مادەني ىقپالى قازاقستاننىڭ مادەني مۇراسىندا دا كورىنىس تاپقان. ماسەلەن, ازىرەت سۇلتان كەسەنەسىندەگى تايقازاندى يران شەبەرى ابدەلازيز شارافۋددين تەبريزي جاساپ شىعارعان. قازاق تىلىندە پارسى سوزدەرى كوپ. عالىمدار تىلدىك قورىمىزداعى پارسى سوزدەرىنىڭ ۇلەسى شامامەن 4% دەپ سانايدى. سونىڭ ىشىندە «استانا», «پايدا», «كورپە», ء«دارى», «دارۋمەن», «اۋلا», «ورازا» سياقتى سوزدەر بار.
كورمەدە جالپى جۇرتشىلىق قازاقستان مەن يراننىڭ ورتاق تاريحىنداعى ماڭىزدى تۇپنۇسقا دەرەكتەرمەن, بىرەگەي ارحيۆتىك ماتەريالدارمەن تانىسا الادى.
