فوتو: ءسىم
سىرتقى ىستەر ءمينيسترىنىڭ ورىنباسارى الىبەك قۋانتىروۆ پەن «Kazakh Invest» ۇلتتىق كومپانياسى» اق باسقارما توراعاسىنىڭ ورىنباسارى ماديار سۇلتانبەك قىتايلىق «Zhongyoung Power» كومپانياسىنىڭ باس ديرەكتورى لي تسزيانتسزيانمەن كەزدەستى. كەزدەسۋ بارىسىندا قىتايلىق تاراپ قازاقستانداعى ەلەكتر ەنەرگەتيكالىق ينفراقۇرىلىمدى جاڭعىرتۋعا قاتىسۋعا نيەتىن جەتكىزدى.
مينيسترلىكتىڭ مالىمەتىنشە, كومپانيا «ەنەرگەتيكا جانە كوممۋنالدىق سەكتوردى جاڭعىرتۋ» ۇلتتىق جوباسىنا قاتىسۋعا مۇددەلى.
«بۇل باعدارلاما اياسىندا جوندەۋدى, جاڭارتۋدى جانە قايتا قۇرۋدى قاجەت ەتەتىن نىسانداردىڭ كەڭ ءتىزىمى ايقىندالعان. لي تسزيانتسزيان اتاپ وتكەندەي, «Zhongyoung Power» كومپانياسى مەملەكەتتىك-جەكەشەلىك سەرىكتەستىك (مجس) جانە تاريفتىك مودەل ارقىلى ينۆەستيتسيانى قايتارۋ سياقتى حالىقارالىق تاجىريبەدە قولدانىلاتىن قارجىلاندىرۋ تەتىكتەرىن قاراستىرۋعا دايىن. سونىمەن قاتار ول جوبالاردى ىسكە اسىرۋ كەزىندە قازاقستاندا وندىرىلگەن جابدىقتار مەن ترانسفورماتورلاردى پايدالانۋعا نيەتتى ەكەنىن ايتتى», دەلىنگەن حابارلامادا.
كەزدەسۋ بارىسىندا تاراپتار قوسالقى ستانتسيالاردى جاڭارتۋ, ەسكى جابدىقتاردى الماستىرۋ, جاڭا ترانسفورماتورلىق قۋاتتار سالۋ جانە ورتا جانە جوعارى كەرنەۋلى جەلىلەرگە زاماناۋي شەشىمدەردى ەنگىزۋ مۇمكىندىكتەرىن تالقىلادى.
الىبەك قۋانتىروۆ ەنەرگەتيكا سەكتورىن جاڭعىرتۋ ستراتەگيالىق باسىمدىق ەكەنىن اتاپ ءوتتى. ول مجس جانە تاريفتىك تەتىكتەردى قولدانۋ ارقىلى حالىقارالىق تاجىريبەسى بار سەنىمدى سەرىكتەستەردى تارتۋ مۇمكىندىگىن اتاپ, سونداي-اق كەيبىر جابدىقتاردى قازاقستاندا ءوندىرۋ جانە ۇزاق مەرزىمدى جوبالاردا جەرگىلىكتى كاسىپورىندارمەن كووپەراتسيا قۇرۋدى ۇسىندى.
ماديار سۇلتانبەك ءوز كەزەگىندە مەملەكەتتىك قولداۋ قۇرالدارى مەن ەنەرگيا جەلىلەرىن جاڭعىرتۋدىڭ ۇلتتىق جانە وڭىرلىك باعدارلامالارىنا قاتىسۋ جولدارىن تانىستىردى. ول ەنەرگيا تيىمدىلىگىن ارتتىرۋ جانە زاماناۋي تەحنولوگيالاردى ەنگىزۋگە باعىتتالعان ۇسىنىستاردى قاراۋعا دايىن ەكەنىن ايتتى.
كەزدەسۋ سوڭىندا تاراپتار ءوندىرىستى لوكاليزاتسيالاۋ مەن جوبالاردىڭ تەحنيكالىق پارامەترلەرىن باعالاۋدى قوسا العاندا, ىقتيمال ىنتىماقتاستىق نىساندارىن تالقىلاۋدى جالعاستىرۋعا ۋاعدالاستى. سونىمەن قاتار قىتاي دەلەگاتسياسىنا ەنەرگەتيكا مينيسترلىگىمەن جەكە كەزدەسۋ ۇيىمداستىرىلىپ, سالالىق تالاپتار مەن ينفراقۇرىلىمدىق قاجەتتىلىكتەر تالقىلاندى.
