«ەرتىس ورمانى» رەزەرۆاتىندا قىسقى تابيعاتقا جانە جانۋارلار الەمىنە قامقورلىق جاساۋ جۇمىستارى ءۇزىلىپ كورگەن ەمەس. قازىرگى ۋاقىتتا قىسقى بيوتەحنيكالىق ءىس-شارالار اياسىندا جانۋارلاردى ازىقپەن قامتاماسىز ەتۋ جانە اۋماقتى باقىلاۋ شارالارى جۇرگىزىلىپ جاتىر.
– اڭشىلىقتانۋشىلار جابايى جانۋارلار ءۇشىن بيىل 25 توننا ءشوپ, 3000 دانا بۇتاق بۋمالارىن, 600 كيلوگرامم تۇز دايىندادى. قىستا جانۋارلار جۇرەتىن سوقپاق جولدار انىقتالىپ, سول ماڭداعى اعاشتارعا ازىق ىلىنەدى. بۇل ءتاسىل, اسىرەسە ەلىك, بۇعى, قويان سەكىلدى اڭدار ءۇشىن ءتيىمدى. رەزەرۆات اۋماعىندا 61 ارنايى ازىقتاندىرۋ الاڭى بار. قىستا قار قالىڭ بولعان ۋاقىتتا, بوران سوققاندا مۇنداي ازىق ورىندارى جانۋارلاردىڭ قورەكتەنۋىنە مۇمكىندىك بەرەدى, – دەپ حابارلادى رەزەرۆاتتان.
ايرىقشا قورعالاتىن ورمان اۋماعىندا اڭشىلىقتىڭ بارلىق تۇرىنە قاتاڭ تىيىم سالىنعان. مۇندا سۇتقورەكتىلەردىڭ 21 ءتۇرى, قۇستىڭ 90, باۋىرىمەن جورعالاۋشىلاردىڭ 3 جانە 32 جاندىك ءتۇرى تىركەلگەن. ورماندى قىزىل كىتاپقا ەنگەن ورمان سۋسارى دا مەكەندەيدى.
