فوتو: اشىق دەرەككوز
ا.ءالنازاروۆانىڭ ايتۋىنشا, جالپى ناركوز – كۇردەلى مەديتسينالىق ەمشارا, ونى تاجىريبەلى انەستەزيولوگتىڭ قاتىسۋىمەن, قاجەتتى قۇرال-جابدىقتىڭ تولىق قامتاماسىز ەتىلۋىمەن عانا جۇرگىزۋگە بولادى.
باس پروكۋراتۋرانىڭ تاپسىرماسى بويىنشا ەلدەگى 622 ستوماتولوگيالىق ۇيىمعا جوسپاردان تىس تەكسەرىس باستالعان. مينيسترلىكتىڭ دەرەگىنە سايكەس, قازىرگى تاڭدا 290 تەكسەرىس تىركەلگەن, ونىڭ 135-ءى اياقتالعان. 103 تەكسەرىس جالعاسىپ جاتىر, 52 ۇيىمنىڭ جۇمىسى توقتاپ تۇرعاندىقتان تىزىمنەن شىعارىلعان, تاعى 26 نىسان تەكسەرۋگە تىركەلۋ كەزەڭىندە. پروكۋراتۋرا جولداعان 316 كلينيكانىڭ 34-ءى ءمامس اياسىندا قىزمەت كورسەتەدى, ال 282-ءسى تەك اقىلى نەگىزدە جۇمىس ىستەيدى.
مينيستر اتا-انالاردى بالالارعا انەستەزيانى «ىڭعايلى ءتاسىل» رەتىندە قاراستىرماۋعا شاقىرادى.ول ۇزاق ناركوزدىڭ بالانىڭ جۇرەك-قان تامىر, تىنىس الۋ جانە جۇيكە جۇيەسىنە قاۋىپ ءتوندىرۋى مۇمكىن. كەيبىر جەكە كلينيكالاردىڭ «بارلىق ءتىستى ءبىر سەانستا ەمدەيمىز» دەگەن ۇسىنىسى تەك ناقتى مەديتسينالىق نەگىز بولعان جاعدايدا عانا ورىندى ەكەنىن اتاپ ءوتتى.
«اتا-انالار شەشىم قابىلداماس بۇرىن بارلىق تاۋەكەلدەر مەن جاعدايلار تۋرالى تولىق اقپارات الۋى قاجەت. بالانىڭ قاۋىپسىزدىگى ارقاشان ءبىرىنشى ورىندا تۇرۋى ءتيىس», دەدى دەنساۋلىق ساقتاۋ ءمينيسترى.
بۇعان دەيىن مينيستر اقمارال ءالنازاروۆا استاناداعى ستوماتولوگيالىق كلينيكادا ناركوزدان كەيىن كوز جۇمعان ءۇش جاسار قىزعا قاتىستى جاعداي بويىنشا سەۆوفلۋران (سەۆوران) پرەپاراتىنىڭ قولدانىلۋىنا تىيىم سالۋ ماسەلەسىنە تۇسىنىك بەرگەن ەدى. قازىر بۇل ىسكە قاتىستى سوت پروتسەسى جالعاسىپ جاتىر.
