مەملەكەتتىك ءتىلدى جۇيەلى تۇردە مەڭگەرۋ – ۇلتتىق ۇلان اسكەري قىزمەتشىلەرى ءۇشىن ماڭىزدى باعىتتاردىڭ ءبىرى. سەبەبى ءتىل ءبىلۋ اسكەري ورتادا عانا ەمەس, حالىقپەن تىعىز جۇمىس جۇرگىزۋدە, قۇجاتتامانى مەملەكەتتىك تىلدە ساۋاتتى جۇرگىزۋدە جانە كۇندەلىكتى قىزمەتتىك كوممۋنيكاتسيادا ۇلكەن ءرول اتقارادى. وسى ماقساتتا «ورتالىق» وڭىرلىك قولباسشىلىعىنىڭ جەكە قۇرامى ارنايى وقىتۋ باعدارلاماسىنا قاتىسىپ, قازاق ءتىلىن مەڭگەرۋدىڭ بازالىق دەڭگەيىنەن تابىستى ءوتتى.
سەرتيفيكاتتاردى سالتاناتتى تاپسىرۋ ءراسىمى قاراعاندى قالاسىنىڭ تىلدەردى دامىتۋ ورتالىعىندا بولدى. ورتالىق ماماندارى اسكەري قىزمەتشىلەردىڭ جاۋاپكەرشىلىگى مەن ىنتاسىن اتاپ ءوتىپ, مەملەكەتتىك تىلگە دەگەن قۇرمەت پەن قىزىعۋشىلىقتىڭ جىلدان جىلعا ارتىپ كەلە جاتقانىن جەتكىزدى.
ءوز كەزەگىندە اسكەري قىزمەتشىلەر قازاق ءتىلىن ۇيرەنۋگە مۇمكىندىك جاساعانى ءۇشىن ورتالىققا جانە «ورتالىق» باسشىلىعىنا العىس ءبىلدىردى. ولار الىنعان ءبىلىمدى قىزمەتتە دە, كۇندەلىكتى ومىردە دە ءتيىمدى قولدانۋعا نيەتتى ەكەنىن اتاپ ءوتتى.
بۇل باستاما الداعى ۋاقىتتا دا جالعاسىن تاۋىپ, اسكەري ورتادا مەملەكەتتىك ءتىلدى قولدانۋ اياسىن كەڭەيتۋگە جانە كاسىبي قىزمەت ساپاسىن ارتتىرۋعا ىقپال ەتپەك.
