تەك العاشقى دەمالىس كۇندەرىنىڭ وزىندە 1,15 ملرد تەڭگەدەن استام سوماعا بيلەت ساتىلىپ, 504 مىڭنان استام كورەرمەن تارتقان. قالاي دەسەك تە, بۇل – قازاقستان پروكاتى تاريحىنداعى بارلىق انيماتسيالىق فيلمدەر ىشىندەگى ەڭ كاسسالىق كورىلىم عانا ەمەس, اۋقىمى جاعىنان «اۆاتار: سۋ جولىنان» كەيىنگى ەكىنشى ءىرى ستارتقا اينالىپ وتىر.
تاعى ءبىر اتاپ وتەرلىك تۇسى, «اڭدار شاھارى» كەيىپكەرلەرى العاش رەت قازاق تىلىندە سويلەپ, گۇلنارا سيلباەۆا, اسان ءماجىت, سابيرا جاراسقىزى, باقىتجان الپەيىس, شاح-مۇرات ورداباەۆ سىندى قازاڭ اكتەرلارى دۋبلياجدى دىبىستادى.
«اڭدار شاھارى 2» انيماتسيالىق كارتيناسىنىڭ قازاقشا نۇسقاسى 110,8 ملن تەڭگە جيناپ, بارلىق تابىستىڭ 14,5%-ىن قامتاماسىز ەتكەن.
رەكوردتىق اقپارات تاعى ءبىر ايتۋلى وقيعامەن تۇسپا-تۇس كەلىپ وتىر. Disney العاش رەت قازاقستانداعى جەرگىلىكتى كومپانيامەن كەلىسىمشارت جاسادى. الەمگە ايگىلى ستۋديا وتاندىق RTS Decaux كومپاەنياسىمەن بىرگە استانا مەن الماتى قالالارىندا اۋقىمدى سىرتقى جارناما ناسيحاتىن بىرىگىپ اتقارسا, بۇل دا ورتالىق ازياداعى Disney ستۋدياسى جۇزەگە اسىرىپ وتىرعان العاشقى ىنتىماقتاستىق.
الەمدەگى ەڭ ءىرى كينوستۋديالاردىڭ ءبىرى مەن قازاقستاندىق سىرتقى جارناما وپەراتورى اراسىنداعى وسىناۋ سەرىكتەستىك جاي عانا ماركەتينگتىك جوبا ەمەس, ول وتاندىق نارىققا دەگەن سەنىمنىڭ بيىكتەپ, دامىعانىن بىلدىرەدى.
ساراپشىلار جاھاندىق ستۋديانىڭ بۇل مۇددەسىن قازاقستاننىڭ سىرتقى جارناما نارىعىنىڭ قارقىندى وسۋىمەن بايلانىستىرىپ وتىر. ماسەلەن, 2025 جىلدىڭ ءبىرىنشى جارتىسىندا ونىڭ كولەمى 12,5 ملرد تەڭگەدەن استى.
«اڭدار شاھارى 2» فيلمىنە توقتالا كەتەتىن بولساق, جاڭا بولىمدە دجۋدي حوپس پەن نيك ۋايلد اڭدار شاھارىنداعى بەيمىلىم اۋداندارعا بارىپ, ەزەكتى تەرگەۋ ىستەرىمەنمەن بەتپە-بەت كەلەدى. كەزەكتى كارتينادا دا العاشقى ءبولىمدى جاساعان رەجيسسەرلار – دجارەد بۋش پەن بايرون حوۆارد, پروديۋسەر يۆەتت مەرينو تەر توككەن.
العاشقى فيلم شامامەن 10 جىل بۇرىن شىققانىن جانە «وسكار», «التىن گلوبۋس», BAFTA سەكىلدى تالاي بەدەلدى ماراپاتتى جەڭىپ العانىن, كارتينانى شاكيرا, ماكولەي كالكين, جان رەنو, يدريس ەلبا, دجەيسون بەيتمان, دجەننيفەر گۋدۆين سىندى دارىندار دىبىستاعانىن ەسكە سالا كەتۋگە بولادى.
