قارا ولەڭنىڭ كورىگىن قىزدىرعان ءسوز سايىسىندا ەلىمىزدىڭ 10 وبلىسىنان, 12 جەتەكشى ۋنيۆەرسيتەتىنەن كەلگەن 14 جاس تالانت باق سىنادى.
ءتول ونەرىمىزدى جاڭعىرتۋ, ايتىس ونەرىن كەڭىنەن ناسيحاتتاۋ, جاس اقىنداردىڭ سۋىرىپ سالمالىق قابىلەتتەرىن شىڭداۋدى ماقسات ەتكەن ءدۇبىرلى دودا – ايتىستىڭ التىن دىڭگەگى ءسۇيىنباي ارون ۇلىنىڭ 210 جىلدىعىنا, اباي قۇنانباي ۇلىنىڭ 180 جىلدىعىنا جانە ايتىس اقتاڭگەرى ورازالى دوسبوسىنوۆتىڭ 50 جىلدىق مەرەيتويىنا ارنالدى.
رەسپۋبليكالىق باسەكەنى اشقان اباي اتىنداعى قازۇپۋ باسقارما توراعاسى-رەكتورى بولات تىلەپ رۋحاني قۇندىلىعى جوعارى ونەر جارىسىنىڭ ماڭىزى مەن ءمانىن ايتىپ, قاتىسۋشىلارعا ساتتىلىك تىلەدى. ۇلتتىق ونەردى قولداۋ – ەل رۋحانياتىن دامىتۋداعى ماڭىزدى قادام ەكەنىن ايتقان ايتىستىڭ باس دەمەۋشىسى «تازا برەند» وتاندىق ونىمدەر كومپانياسىنىڭ ديرەكتورى جىبەك امانكەلدينا جاستاردىڭ شىعارماشىلىق جولىنا دەمەۋ بولۋ – ءاربىر وتاندىق ءونىم ءوندىرۋشىنىڭ ازاماتتىق بورىشى ەكەنىن ەرەكشە اتاپ ءوتتى.
تاپقىرلىق پەن قالجىڭنان «قۋىرداق قۋىرعان» ءسوز سايىسىنا ايتىسكەر اقىن, قر مادەنيەت قايراتكەرى, ايتىس اقىندارى مەن جىرشى, تەرمەشىلەردىڭ حالىقارالىق وداعىنىڭ الماتى قالاسى بويىنشا فيليالىنىڭ توراعاسى سەرىك قاليەۆ (قازىلار القاسىنىڭ توراعاسى), ايتىسكەر اقىن, قازاقستان جازۋشىلار وداعىنىڭ مۇشەسى, ورازالى دوسبوسىنوۆتىڭ ۇستازى داۋباي ابدىساەۆ, ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ مۇشەسى, مادەنيەت جانە اقپارات سالاسىنىڭ ۇزدىگى, «قازاق راديولارى» جشس الماتى فيليالىنىڭ جەتەكشىسى, «قۇرمەت» وردەنىنىڭ يەگەرى باقىت قۇتپانباي, اباي اتىنداعى قازاق ۇلتتىق پەداگوگيكالىق ۋنيۆەرسيتەتى, «حاكىم اباي» عىلىمي-زەرتتەۋ ورتالىعىنىڭ ديرەكتورى, فيلولوگيا عىلىمدارىنىڭ كانديداتى جابال شويىنبەت, ايتىسكەر اقىن, ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ مۇشەسى, مادەنيەت سالاسىنىڭ ۇزدىگى شۇعايىپ سەزىمحان قازىلىق جاسادى.
ىرىكتەۋ كەزەڭىندە 14 اقىن ءوز ونەرلەرىن ورتاعا سالىپ, قازىلار القاسىنىڭ جوعارى ۇپايىنا يە بولعان 8 اقىن ەكىنشى كەزەڭگە جولداما الدى. ۇمىتكەرلەر شەبەرلىگى سارالانىپ جاتقاندا, ساحنادا ۋنيۆەرسيتەت ستۋدەنتتەرى ونەر كورسەتىپ, كونتسەرت قويدى.
بايقاۋ قورىتىندىسى بويىنشا باس جۇلدە اقتوبە وبلىسى ا.جۇبانوۆ اتىنداعى ۋنيۆەرسيتەتىنىڭ ستۋدەنتى اراي نۇرادينگە بۇيىردى. ول 400 000 تەڭگە قارجىلاي سىيلىققا يە بولدى. ال ءبىرىنشى ورىنعا الماتىنىڭ قالاسى اباي اتىنداعى قازۇپۋ-دىڭ ستۋدەنتى دانيار بولاتحان يە بولىپ, 300 000 تەڭگە يەلەندى. ەكىنشى ورىندى الماتى قالاسى اباي اتىنداعى قازۇپۋ ستۋدەنتى سانجار داياربەك پەن شقو س.امانجولوۆ اتىنداعى ۋنيۆەرسيتەتتىڭ ستۋدەنتى ايعانىم بالعاباەۆا ءوزارا ءبولىسىپ, ارقايسىسى 200 000 تەڭگە كولەمىندە قارجىلاي سىيلىق جەڭىپ الدى. 150 تەڭگەدەن تۇراتىن ءۇشىنشى ورىن ءتورت قاتىسۋشى: استانا قالاسى ك.بايسەيىتوۆا اتىنداعى قازۇوۋ ستۋدەنتى مارسەل ەرسايىنوۆقا, جامبىل وبلىسى ش.مۇرتازا اتىنداعى ۋنيۆەرسيتەتتىڭ ستۋدەنتى جانەركە قامبارعا, پاۆلودار وبلىسى ءا.مارعۇلان اتىنداعى ۋنيۆەرسيتەت نۇربەك باكىرگە جانە قىزىلوردا وبلىسى قورقىت اتا اتىنداعى قىزمۋ ستۋدەنتى ديلناز ەرجىگىتكە بۇيىردى.
سونىمەن قاتار, قالعان اقىندار ارنايى نوميناتسيالار بويىنشا 100 000 تەڭگە كولەمىندەگى اقشالاي سايلىق يەلەندى. ولار:
- ەسەنقۇل جاقىپبەكوۆ اتىنداعى ارنايى جۇلدە – ەراسىل سەيتجان ۇلى (استانا قالاسى, ل.گۋميلەۆ اتىنداعى ەۇۋ);
- سەرىك ىدىرىسوۆ اتىنداعى ارنايى جۇلدە – ارىستان اعىباي (الماتى وبلىسى, سدۋ);
- سيازبەك سۇلەيمەنوۆ اتىنداعى ارنايى جۇلدە – سەرىكبول بازىلبەك (ماڭعىستاۋ وبلىسى, ش.ەسەنوۆ اتىنداعى ۋنيۆەرسيتەت);
- ەرىك اسقاروۆ اتىنداعى ارنايى جۇلدە – دانيال بولىسبەك (تۇركىستان وبلىسى, ءو.جانىبەكوۆ اتىنداعى ۋنيۆەرسيتەت);
- تەمىرحان تەبەگەنوۆ اتىنداعى ارنايى جۇلدە – ابىلاي قايرات ۇلى (الماتى قالاسى, ءال-فارابي اتىنداعى قازۇۋ);
- حاسەن ساماتىروۆ اتىنداعى ارنايى جۇلدە – ماعجان ساۋىتبەك (شىمكەنت قالاسى, ساز كوللەدجى).
ايتا كەتەيىك, كۇنى كەشە اباي اتىنداعى قازۇپۋ-دا ۋنيۆەرسيتەت تۇلەگى, ايتىس ونەرىنىڭ اقتاڭگەرى, وت اۋىزدى, وراق ءتىلدى اقىن ورازالى دوسبوسىنوۆ اتىنداعى جاس اقىندار ورتالىعى زاماناۋي ۇلگىدە قايتا جاڭعىرىپ, رەسمي تۇردە اشىلعان بولاتىن. وندا رەسپۋبليكالىق جاس ايتىسكەر اقىندار ءتۇرلى دارىستەر تىڭداپ, ونەرلەرىن جەتىلدىرەدى. باستى ماقساتى – ءتول ونەرىمىزدى جاڭعىرتۋ, ايتىس ونەرىن كەڭىنەن ناسيحاتتاۋ, جاس اقىنداردىڭ سۋىرىپ-سالمالىق قابىلەتتەرىن شىڭداۋ. ورازالى ورتالىعى بۇدان كەيىن رەسپۋبليكالىق جانە حالىقارالىق جاس اقىندار ايتىسىن ءداستۇرلى تۇردە وتكىزىپ تۇرماق.
