ماۋلەن اشىمباەۆ ءىس-شاراعا قاتىسۋشىلارعا ءىلتيپات ءبىلدىرىپ, مەملەكەت باسشىسى قازاقستان حالقىنا جولداۋىندا بەلگىلەپ بەرگەن وڭدەۋ ونەركاسىبىنىڭ باسىم باعىتتارىنا نازار اۋداردى. پالاتا سپيكەرى ولاردى ۋاقتىلى ءارى ساپالى ىسكە اسىرىپ, جاڭا ءوندىرىس ورىندارىن اشۋ ءۇشىن زاماناۋي تاسىلدەردى قولدانۋ, مەملەكەتتىك ورگاندار مەن بيزنەستىڭ تىعىز ءوزارا ءىس-قيمىلى ماڭىزدى ەكەنىن اتاپ ءوتتى. مۇنداي قادام سالانىڭ ىشكى نارىقتاعى ۇستانىمىن نىعايتىپ, ونى حالىقارالىق دەڭگەيدە دامىتۋعا ىقپال ەتەدى.
«پرەزيدەنت قاسىم-جومارت توقاەۆ بيىلعى جولداۋىندا وڭدەۋ ونەركاسىبىن دامىتۋدىڭ ماڭىزدى ەكەنىن ايرىقشا اتاپ ءوتتى. جالپى, ماشينا جاساۋ عىلىمدى قاجەت ەتەتىن, كۇردەلى جانە وزىق سالا رەتىندە ەلدىڭ يندۋستريالىق دامۋىنىڭ نەگىزگى درايۆەرلەرىنىڭ ءبىرى سانالادى. بۇل سەكتور ەكونوميكانىڭ ارالاس سالالارىنا مۋلتيپليكاتيۆتى اسەر ەتەدى. سونداي-اق ونىڭ ونىمدەرىنىڭ قوسىلعان قۇنى جوعارى ەكەنى بەلگىلى. سوندىقتان پارلامەنت مەملەكەت باسشىسى جۇكتەگەن مىندەتتەردىڭ ورىندالۋى ءۇشىن دايەكتى تۇردە سالانى قولداۋ جۇيەسىن قالىپتاستىرىپ كەلەدى», دەدى سەنات توراعاسى.
سونداي-اق ول سەناتورلار قازاقستان ماشينا جاساۋشىلار وداعىمەن بىرلەسىپ ازىرلەگەن ماشينا جاساۋدى دامىتۋعا ارنالعان زاڭ جوباسىنا ەرەكشە ءمان بەرىپ, پالاتانىڭ وسى باعىتتاعى جۇمىسىنا كەڭىرەك توقتالدى. قۇجات اۆتوموبيل ونەركاسىبىن وركەندەتۋگە, سالالىق كلاستەرلەر قۇرۋعا, ارنايى ەكونوميكالىق ايماق پەن يندۋستريالىق ايماقتاردى دامىتۋعا جانە دۋالدى وقىتۋعا قاتىستى ماڭىزدى شارالاردى قامتيدى.
وتىرىس بارىسىندا ۇيلەستىرۋ كەڭەسىنىڭ مۇشەلەرى بەلگىلى ءبىر ناتيجەلەرگە قاراماستان, سالادا ءالى دە بولسا جەتىلدىرەتىن تۇستار بار ەكەنىنە نازار اۋداردى. سونىڭ ىشىندە قاراعاندى وبلىسىنىڭ ساران قالاسىندا وتكەن ماشينا جاساۋدى دامىتۋ ماسەلەلەرىنە ارنالعان دوڭگەلەك ۇستەلدە ايتىلعان بىرقاتار مىندەت جان-جاقتى ءسوز بولدى. ولاردى ماشينا جاساۋدى دامىتۋدىڭ 2024–2028 جىلدارعا ارنالعان كەشەندى جوسپارى اياسىندا قوسىمشا پىسىقتاۋ قاجەت. ناقتى ايتقاندا, كادر تاپشىلىعى, جابدىقتى جاڭارتۋ ءۇشىن زاماناۋي تەحنولوگيالار مەن ينۆەستيتسيالاردىڭ جەتكىلىكسىزدىگى, يمپورتقا تاۋەلدىلىك سياقتى تۇيتكىلدەر وتە وزەكتى. بۇگىندە مۇناي-گاز, تاۋ-كەن مەتاللۋرگياسى, ەنەرگەتيكالىق ماشينا جاساۋ سياقتى ماشينا جاساۋدىڭ بىرقاتار ستراتەگيالىق سەگمەنتىندە وقشاۋلاۋ دەڭگەيى 20–30 پايىزدى قۇرايدى. ال بىلىكتى ماماندارعا دەگەن قاجەتتىلىك 7 مىڭ ادامعا جەتكەن.
سونىمەن قاتار ءىس-شارادا ءىرى ونەركاسىپتىك جوبالاردىڭ قىزمەتى مەن ارالىق ناتيجەلەرىنە, وقشاۋلاۋ دەڭگەيىنە, جابدىقتى جاڭعىرتۋعا جانە شىعارىلاتىن ءونىم جەلىسىن كەڭەيتۋگە قاتىستى پىكىرلەر مەن ۇسىنىستار ايتىلدى. تسيفرلاندىرۋ جانە زاماناۋي تەحنولوگيالىق شەشىمدەردى ەنگىزۋ ماسەلەلەرى دە تالقىلاندى.
جالپى, وتىرىسقا پرەمەر-ءمينيستردىڭ ءبىرىنشى ورىنباسارى, ۇيلەستىرۋ كەڭەسىنىڭ توراعاسى رومان سكليار, «قازاقستان ماشينا جاساۋشىلار وداعى» زتب باسقارما توراعاسى مەيرام پىشەمباەۆ پەن سالالىق مينيسترلىكتەر مەن جەتەكشى وتاندىق كاسىپورىنداردىڭ وكىلدەرى قاتىستى.
