زەرگەر ابزال مولدابەكتىڭ ايگىلى «قارلىعاشىن» الەۋمەتتىك جەلىدەگى جۇرت جاقسى بىلەدى. ءار جۇمىسىنا ەرەكشە دەن قوياتىن, اسەمدىكپەن قاتار مازمۇنعا ايرىقشا ءمان بەرەتىن شەبەر قۇس سيمۆوليكاسىن شىعارماشىلىعىنا وزەك ەتكەن. مۇنى ونىڭ ءار تۋىندىسىنان بايقاۋعا بولادى.
ول قولونەرمەن نەگىزىنەن شىعارماشىلىق, شەبەرلىك, جەكە قىزىعۋشىلىق ىڭعايىندا اينالىسادى. ءتىپتى كەيدە «مىنا اشەكەيدى جاساپ بولعان سوڭ, ساتۋعا قيماي قالدىم», دەيدى. ءار اشەكەيىنە تاۋار ەمەس, ونەر تۋىندىسى دەپ قارايتىن زەرگەردىڭ مازمۇندى تۋىندىلارى دا وسىنىسىمەن سۇرانىسقا يە.
«زەرگەرلىك قابىلەت اكەم جاعىنان دا, انام جاعىنان دا دارىعان. ويتكەنى اكەمنىڭ قولونەرگە يكەمى بار. ول كىسى ينجەنەر بولعان. نەشە ءتۇرلى قۇرال-جابدىق ويلاپ تاۋىپ, سولاردى ساتىلىمعا شىعاراتىن. ماعان ناعاشى جاقتان دا زەرگەرلىك قارىم-قابىلەت, قاسيەت بەرىلگەن. اتالارىمىز دومبىرا جاساعان, بۇركىت ۇستاعان, قولونەرمەن اينالىسقان كىسىلەر. مەنىڭشە, ونەرگە جەتەلەپ اكەلگەن قاننان بەرىلگەن قاسيەت دەپ ويلايمىن. سوندىقتان زەرگەرلىك ونەر مەن ءۇشىن مارتەبەلى جۇمىس», دەيدى ءوزى.
شەبەردىڭ ايتۋىنشا, ەلگە بەلگىلى «ەلىگىم», «قارلىعاش» اتتى تۋىندىلارى قارىنداستارىنا ارنالعان.
«جالپى, شابىت تىنىشتىقتى جانعا سەرىك ەتكەننەن كەلەدى عوي. جان دۇنيە, جۇرەك تىنىشتىعى بۇل جەردە ۇلكەن ءرول وينايدى. سول كەزدە عانا ونەر يەسى عالامات تۋىندىلاردى جارىققا شىعارادى», دەيدى زەرگەر.
ءيا, زەرگەرلىك بۇيىمداردى ازىرلەۋ ەڭ اۋەلى سۋرەت سالۋدان باستالسا كەرەك.
«ادامنىڭ ويىن, يدەياسىن ءبىرىنشى قاعازعا ءتۇسىرىپ, سىزىپ, سودان كەيىن بارىپ جوبالايمىز. سوسىن مەتالدان جاسالعان تۋىندىنى تاعار كەزدە قانشالىقتى ىڭعايلى بولادى دەپ قاراستىرىپ كورەمىز. ءبارىن ەسەپتەپ, ەلەپ, ەكشەپ العان سوڭ تەحنيكالىق جاعىنا كىرىسەمىز. جالپى, ءبىر تۋىندىنى جاساۋ ءبىر اپتادان باستاپ ءبىر اي نەمەسە ءبىر جىلعا دەيىن سوزىلۋى مۇمكىن», دەيدى ابزال مولدابەك.
سونداي-اق ول تاپسىرىسپەن كوپ جۇمىس ىستەمەگەنىن دە اشىق ايتتى. نەگىزىنەن قولتاڭبا رەتىندە قالاتىن اۆتورلىق تۋىندىلار جاساۋدى ماقسات تۇتقان.
«وسى كاسىپتى باستاعان كەزدە ەكى-ءۇش جىلداي تاجىريبە جيناۋ ماقساتىندا تاپسىرىس الىپ, ازىن-اۋلاق جۇمىس ىستەگەنمىن. كەيىن ءوزىمنىڭ اۆتورلىق ديزاينىمدى جاساي باستادىم. سونىڭ ىشىندەگى ەڭ ەرەكشە ەستە قالعانى «قارلىعاش» تۋىندىسى بولدى. وزىمە ەرەكشە ۇنايدى جانە كوپشىلىكتىڭ كوڭىلىنەن دە شىقتى. ودان كەيىن ادامنىڭ جاس ەرەكشەلىگىن كوپ تالعامايدى. جاستاردان باستاپ ۇلكەن كىسىلەرگە دەيىن تاعا بەرسە بولادى», دەيدى زەرگەر.
زەرگەردىڭ العاشقى كورمەسى بىلتىر وتكەن ەدى. شەبەر كورمەدە ونجىلدىق جۇمىسىن قورىتىندىلاپ, «Alash Jewels» برەندىنىڭ بارلىق تۋىندىلارى مەن «قارلىعاش» اتتى جاڭا توپتاماسىن تانىستىرعانى ەسىمىزدە. جۇزدەن اسا ديزاين, اشەكەي قويىلعان كورمەنى دايىنداۋعا ءۇش اي ۋاقىت كەتكەن. ال جاڭا توپتامانى جاساۋعا ءبىر جىل ۋاقىت جۇمساپتى. اۆتوردىڭ العاشقى كورمەسىنە فرانتسيا, شۆەيتساريا, رەسەي, ەلىمىزدىڭ بىرنەشە قالاسىنان تۇراقتى تۇتىنۋشىلارى ارنايى كەلگەن.
«الەۋمەتتىك جەلىگە اشەكەيدىڭ سۋرەتىن سالا سالعانمەن, ونىڭ قۇندىلىعى, ارتىندا قانداي وي مەن ەڭبەك جاتقانى كورىنبەي قالادى. سوندىقتان ارنايى كورمە وتكىزىپ, جاقسىلاپ تانىستىرايىن دەپ شەشتىم», دەگەن ەدى سوندا ابزال مولدابەك.
ءار اشەكەي-بۇيىمىنان اسەمدىك پەن جوعارى ەستەتيكالىق تالعام, قازاقى ناقىش كورىنەتىن زەرگەردىڭ شىعارماشىلىعى ەرىكسىز كوز تارتادى. «Alash Jewels» بۇيىمدارىن الەمنىڭ ءار تۇكپىرىنەن تاپسىرىس بەرىپ الاتىن ايدىك برەندكە اينالسا, قازاق مادەنيەتىنىڭ دە قاناتى كەڭگە جايىلعانى ەمەس پە؟
«زەرگەرلىككە كاسىپ رەتىندە ءالى كىرىسكەن جوقپىن. قازىر تەك شىعارماشىلىق دامۋ جولىندامىن. وسى ماماندىقتى وقۋىم, جۇمىس ىستەۋىمدى قوسقاندا 15 جىلداي ۋاقىتىم كەتتى. قازاقتىڭ ۇلتتىق ورنەكتەرىن, مادەنيەتىن, سالت-ساناسىن زەرگەرلىك ونەر ارقىلى الەمگە تانىتقىم كەلەدى», دەيدى شەبەر.
اسپاندا قالىقتاپ ۇشار قارلىعاشتاردى ويماقتاي قىلىپ قولىمىزعا قوندىرا الماسپىز, ءسىرا. دەسە دە ابزال مولدابەكتىڭ ايگىلى «قارلىعاشتارى» بۇگىندە تالعامدى ءار قىزدىڭ سۇيىكتى اشەكەيىنە اينالعان.
