ارت-شەبەردىڭ تۋىندىلارىنىڭ قاتارىندا سۋ تاسقىنى كەزىندە قاپ تاسىعان ءيتتىڭ ءمۇسىنى دە بار. بۇل ءمۇسىندى ءبىر ايدا جاساعان.
«بىلتىرعى سۋ تاسقىنى كەزىندە ەلدىڭ بىرلىگىنە, ۇيىمشىلدىعىنا كۋا بولدىق. ءوزىم دە ەرىكتى رەتىندە جايىق وزەنىنىڭ جاعالاۋىنا بوگەت سالۋعا قاتىستىم. سول كەزدە پشون اتالاتىن ءيتتىڭ قاپ تاسىپ جۇرگەنىن كوردىك. كوپشىلىك الەۋمەتتىك جەلىدە جاعىمدى پىكىر قالدىردى. الايدا بىلتىرعى قاراشادا پشوندى اتىپ كەتكەنىن ەستىدىك. سودان سوڭ ونىڭ ءمۇسىنىن جاساۋعا بەكىندىم», دەيدى ازامات كەنجەعاليەۆ.
ونىڭ ايتۋىنشا, ءيتتىڭ ءمۇسىنىن جاساۋعا كادىمگى قارا تەمىردى پايدالانىپتى. الدىمەن تەمىردەن جۇرەك تەكتەس بولشەكتەردى ازىرلەدى. سودان ءيتتىڭ ءمۇسىنىن قۇراستىردى.
«الەۋمەتتىك جەلى قولدانۋشىلارى ۇناعان جازباعا, نە سۋرەتكە جۇرەك تۇرىندەگى ءلۇپىل باسادى. ءدال وسى ءلۇپىلدى پشوننىڭ مۇسىنىنە قولداندىم. ءمۇسىندى كولىك سىرىمەن سىرلادىم. ونى جايىق وزەنىنىڭ اتىراۋ قالاسىنداعى جاعالاۋىنا قويۋدى ۇسىنىپ, اكىمدىككە حابارلاسقان ەدىم. اكىمدىكتەن قولداۋ بولمادى», دەيدى ول.
جۇرتشىلىقتىڭ قولداۋىنا يە بولعان ءيتتىڭ ءمۇسىنى اتىراۋ قالاسىنداعى «Ailaq Coffee» كافەسىنىڭ الدىنا قويىلدى. بۇل كافە جايىق وزەنىنىڭ جاعالاۋىندا ورنالاسقان.
«پشوننىڭ ءمۇسىنىن سارىتوعاي اۋىلىندا تۇراتىن يەسى ساتىپ العىسى كەلەتىنىن ايتتى. كەيىن «Ailaq Coffee» كافەسىنىڭ يەسى حابارلاسىپ, ءمۇسىندى قويۋعا ورىن بەرەتىنىن ايتتى. ءمۇسىندى كۇتىپ ۇستاۋعا ۋادە بەردى. ول مۇسىنگە اقشا ۇسىنعان ەدى. بىراق اقشاسىن المادىم. ماعان ءوزىم جاساعان تۋىندىنىڭ بوس جاتپاعانى قاجەت», دەيدى ءمۇسىن اۆتورى.
ازامات مۇسىندەردى شەبەرحاناسىندا جاسايدى. مۇسىنگە قاجەتتى ماتەريالداردى ءوزىنىڭ اقشاسىنا ساتىپ الادى. ارت-مۇسىندەردىڭ ساپاسىن ارتتىرۋعا قاجەتتى زاماناۋي ستانوكتار قاجەت.
«جاقىندا الىپ بەكىرە بالىعىنىڭ ءمۇسىنى دايىن بولدى. ەندى وعان تىرەك ءارى كورنەكى نەگىز بولاتىن كاسپي تەڭىزىنىڭ ماكەتىن پىسىقتاپ وتىرمىن. بەكىرە بالىعىن دا بۇرىنعى جۇمىستارىم سەكىلدى ءوز ەسەبىمنەن جاسادىم», دەيدى ارت-شەبەر.
الايدا بەكىرەنىڭ ارت-ءمۇسىنى قويىلاتىن ورىن ءالى ناقتىلانعان جوق. بەكىرەنى ءۇش ايدا دايىنداعان شەبەر قالا اكىمدىگىنە اتىراۋ تەمىرجول ۆوكزالىنىڭ نەمەسە ح.دوسپانوۆا اتىنداعى حالىقارالىق اۋەجايدىڭ الدىنا قويۋدى ۇسىنىپتى. بىراق ساياباقتار مەن جايىق وزەنىنىڭ جاعالاۋىن قولايلى كورمەيدى.
تەمىردەن ءتۇيىن ءتۇرلى ءمۇسىن دايىندايتىن شەبەر ازامات كەنجەعاليەۆتىڭ بىرنەشە تۋىندىسى بار. ماسەلەن, شاۋىپ بارا جاتقان بىرنەشە جىلقىنىڭ ءمۇسىنى ساۋدا ورتالىعىنىڭ الدىندا تۇر. ءوزى تۇراتىن كەنتكە «Inderbor» كومپوزيتسياسى مەن «ماڭگىلىك الاۋ» مەموريالدىق نىسانىن سىيعا تارتتى.
اتىراۋ وبلىسى
