وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ ءبولىم باسشىسى گۇلبولات امانعاليەۆانىڭ دەرەگىنە سۇيەنسەك, 7 121 جاس جۇمىسپەن قامتىلىپتى. تارقاتىپ ايتقاندا, تۇراقتى جۇمىسقا 4 مىڭعا جۋىعى, ال سۋبسيديالاناتىن ورىندارعا 3 154 ادام جاس ورنالاسقان.
«ماۋسىم ايىنان بەرى 33 جاس قىسقا مەرزىمدى كۋرسقا جىبەرىلدى. ال وnline skills پلاتفورماسى ارقىلى وقۋعا 729 جاس تارتىلىپ, 550-ءى سەرتيفيكات الدى. «باستاۋ-بيزنەس» جوباسىمەن 862 جاس كاسىپكەرلىك نەگىزدەرىن مەڭگەرۋ ءۇشىن وقۋعا قاتىستى. ونىڭ ىشىندە 500-گە جۋىعى سەرتيفيكات الىپ, 71 جاس جۇمىسقا ورنالاستى. ال 43 جاسقا مەملەكەتتىك گرانت بەرىلدى», دەيدى گۇلبولات امانعاليەۆا.
ونىڭ مالىمەتىنشە, تۇرمىسى تومەن توپتاعى 114 جاس جەكە كاسىبىن باستاۋ ءۇشىن 400 اەك كولەمىندە قايتارىمسىز گرانت قارجىسىن العان. سونداي-اق 13 500 جاسقا كاسىبي باعدارلاۋ قىزمەتى كورسەتىلگەن.
