فوتو: ۇلتتىق ەكونوميكا مينيسترلىگى
كەزدەسۋدە سەرىك جۇمانعارين لەيا گۋتەررەستى وسى جىلعى شىلدەدە قىزمەتكە تاعايىندالۋىمەن قۇتتىقتاپ, 1994 جىلدان بەرى جالعاسىپ جاتقان ارىپتەستىكتىڭ ماڭىزىن اتاپ ءوتتى.
«ازيا دامۋ بانكى ءبىز ءۇشىن ستراتەگيالىق ارىپتەس. ىنتىماقتاستىق كەزەڭىندە بانك كولىك, ەنەرگەتيكا, شوب, تسيفرلىق دامۋ, الەۋمەتتىك بىرقاتار ماڭىزدى جوبانى قارجىلاندىردى. بۇگىنگى كەزدەسۋ ارىپتەستىگىمىزدى ودان ءارى نىعايتۋعا, جاڭا پەرسپەكتيۆالىق باستامالاردى جۇزەگە اسىرۋعا ىقپال ەتەتىنىنە سەنىمدىمىز. ادب-نىڭ قازاقستان بويىنشا 2023–2027 جىلدارعا ارنالعان ەلدىك ستراتەگياسىنىڭ نەگىزگى باسىمدىقتارى ءبىزدىڭ ۇلتتىق باسىمدىققا تولىق سايكەس كەلەتىنىن اتاپ وتكىم كەلەدى. قازاقستان بۇدان ءارى دە وسى ستراتەگيانى ءتيىمدى جۇزەگە اسىرۋدى قولداماق», دەدى سەرىك جۇمانعارين.
ءوز كەزەگىندە لەيا گۋتەررەس ادب جارعىسىنا تۇزەتۋ بويىنشا داۋىس بەرۋ كەزىندە قازاقستاندى قولداۋدىڭ ماڭىزدىلىعىن ەرەكشە اتادى. اتالعان تۇزەتۋ بانكتىڭ كرەديتتىك الەۋەتىن 50%-عا – 36 ملرد دوللاردان اسىرۋعا مۇمكىندىك بەرگەن.
ء«بىزدىڭ ىنتىماقتاستىعىمىزدىڭ بارىسىندا 1994 جىلدان باستاپ ادب قازاقستانعا 7 ملرد دوللاردان كوپ قاراجات بەردى. ءبىز ءداستۇرلى باعىتتا دا, جاڭا سەكتوردا دا ارىپتەستىكتى ودان ءارى ارتتىرۋعا سەنەمىز», دەپ اتاپ ءوتتى ول.
گۋتەررەس سونداي-اق ادب بيىل ستراتەگيالىق مينەرالدار مەن اسا ماڭىزدى شيكىزاتتار تىزبەگىن قولداۋعا ارنالعان جاڭا ساياساتتى جۇزەگە اسىرۋعا كىرىسكەنىن ايتىپ, قازاقستاندا وسى سالادا الەۋەتى جوعارى جوبالاردى زەرتتەۋگە دايىن ەكەنىن جەتكىزدى.
سەرىك جۇمانعارين قازاقستان ۇكىمەتى ادب, ەادب, ەقدب جانە دۇنيەجۇزىلىك بانكتى قوسقاندا, حالىقارالىق قارجى ۇيىمدارىنىڭ ۇزدىك تاجىريبەسىن ەسكەرە وتىرىپ, ءمجا سالاسىنداعى زاڭنامانى جاڭعىرتىپ جاتقانىن اتاپ ءوتتى.
كەزدەسۋ سوڭىندا تاراپتار كولىك ينفراقۇرىلىمى, ونەركاسىپ, ەنەرگەتيكا, تسيفرلىق تەحنولوگيالار, تۇرعىن ءۇي قۇرىلىسى جانە كريتيكالىق ماتەريالدار سالاسىنداعى پەرسپەكتيۆالىق جوبالاردى بىرلەسە جۇزەگە اسىرۋ جونىندە پىكىر الماستى.
