فوتو: قارجى مينيسترلىگى
تاۋارلاردىڭ ۇلتتىق كاتالوگىنا كىمدەر قوسىلۋ كەرەك؟
ەل اۋماعىندا تاۋارلار اينالىمىنا قاتىسى بار بارلىق كاسىپكەرلىك سۋبەكتىسى تۇك قوسىلۋعا مىندەتتى. ولارعا وندىرۋشىلەر, يمپورتتاۋشىلار, كوتەرمە كومپانيالار مەن ديستريبيۋتورلار, بولشەك ساۋدا دۇكەندەرى مەن ساۋدا جەلىلەرى, ونلاين الاڭدار مەن ماركەتپلەيستەر جاتادى.
ءار قاتىسۋشى ءبىرتۇتاس بازانى ءوز قىزمەتى شەڭبەرىندە پايدالانادى. بۇل ورايدا تاۋار كارتاسى تەگىن جاسالاتىنىن ايتا كەتكەن ءجون. سوندىقتان تۇك ەنگىزۋ باعانىڭ وسىمىنە اسەر ەتپەۋى ءتيىس.
ۇلتتىق كاتالوگتا تاۋار كارتالارىن كىمدەر تىركەۋى كەرەك؟
تىڭ تەتىكتە تاۋار كارتالارىن ءونىم وندىرۋشىلەرى نەمەسە ونى ەلگە اكەلەتىندەر تىركەۋگە مىندەتتى. ەگەر دە 2026 جىلدىڭ 1 قاڭتارىندا تۇك-تا تىركەلمەگەن تاۋارىڭىز ساتىلىمدا تۇرسا, مەيلى ءوندىرۋشى نەمەسە يمپورتتاۋشى بولماساڭىز دا وعان NTIN كودىن بەلگىلەۋ كەرەك. تاۋار كارتاسىنىڭ بار-جوعىن تەكسەرۋ ءۇشىن, سونداي-اق جاڭاسىن جاساپ, وزگەرىستەر ەنگىزۋ ءۇشىن nct.kz سايتىندا تىركەلۋ قاجەت.
جاڭا كارتانى تولتىرعان كەزدە تاۋاردىڭ اتاۋى, برەندى, سيپاتتاماسى, قۇرامى جانە قاي ەلدە جاسالعانى تۋرالى اقپاراتتى قوسۋ قاجەت. كارتانى جاساماس بۇرىن ءونىمنىڭ كاتالوگتا بار-جوعىن تەكسەرگەن ءجون. جۇيەدە قازىر 15 ملن-نان استام كارتا بار. ەگەر دە ءبىر تاۋاردى ءتۇرلى يمپورتتاۋشى جەتكىزۋمەن اينالىسسا, دەمەك ونىڭ كارتاسى بۇرىننان جاسالعان بولۋى مۇمكىن. مۇنداي جاعدايدا تاۋاردى قايتا تىركەۋدىڭ قاجەتى جوق.
باقىلاۋ-كاسسالىق ماشينالاردى (بكم) جاڭارتۋ: كىمگە نە ىستەۋ كەرەك؟
تۇك-قا ەنگىزىلگەننەن كەيىن بارلىق باقىلاۋ-كاسسالىق ماشيناسى NTIN كودتارىن بەرە الاتىن 2.0.3 حاتتاماسى بويىنشا جۇمىس ىستەۋى كەرەك. بۇل جۇمىستى بكم تەحنيكالىق قىزمەتى فيسكالدى دەرەكتەر وپەراتورىمەن بىرلەسىپ دەربەس جۇزەگە اسىراتىنىن اتاپ وتكەن ابزال. بيزنەسكە تەك ءبىرتۇتاس كاتالوگتا تىركەلگەن NTIN كودى بار ءونىمدى پايدالانۋ مەن ونى ساتۋ كەزىندە سكانەرلەۋ قاجەت.
بۇل رەتتە قازاقستان اۋماعىندا ساۋدا قىزمەتىندە كاسسالىق ماشينالاردى قولدانۋ زاڭدا بەلگىلەنگەن تالاپ بولىپ سانالاتىنىن ايتا كەتكەن دۇرىس. بازارلار مەن اۋىلدىق جەرلەردەگى ساۋداگەرلەر ءۇشىن جەڭىلدەتىلگەن سحەمالار قاراستىرىلادى. بىراق جۇيەگە قوسىلۋدان اينالىپ وتۋگە جول بەرىلمەيتىنىن ەسكەرۋ قاجەت.
ەگەر دە قانداي دا ءبىر ءونىمنىڭ NTIN ۇلتتىق كودى بولماسا, وندا ساۋدانى بۇعاتتاماۋ ءۇشىن وعان ۋاقىتشا كود بەرىلەدى. بۇدان كەيىن كاسىپكەر تۇك-تا قاجەتتى مالىمەتتەردى ەنگىزىپ, تۇراقتى كودتى الۋى ءتيىس.
