شىنىندا, مۇنداي بەدەلدى حالىقارالىق كوميتەتكە ەكىنىڭ ءبىرى قابىلدانبايدى. بۇل شەشىم ايدانىڭ كاسىبي دايارلىعى مەن عىلىمي الەۋەتىنىڭ جوعارى ەكەنىن كورسەتەدى. ءبىر جاعىنان, جاس زەرتتەۋشىنىڭ لينگۆيستيكا سالاسىنداعى جۇيەلى ەڭبەگىنىڭ جەمىسى دەپ بىلەمىز.
بىلتىر ول حالىقارالىق وليمپياداعا تاۋەلسىز اۆتور رەتىندە تاپسىرما ۇسىنىپ, كاسىبي قاۋىمداستىقتى بىردەن ءوزىنىڭ عىلىمي جۇمىسىنىڭ ناقتىلىعىمەن ءارى تەرەڭدىگىمەن ءتانتى ەتتى. ونىڭ جۇمىسى جەكە تۋردىڭ رەسمي جيناعىنا ەنىپ, قاتىسۋشىلاردىڭ تاڭداۋىمەن «Solvers’ Choice Award» ماراپاتىنا يە بولدى.
ايدانىڭ وتاندىق وليمپيادالىق قىزمەتى دە نازار اۋدارتادى. 2023 جىلدان بەرى ول رەسپۋبليكالىق لينگۆيستيكا وليمپياداسىنىڭ تاپسىرمالارىن ازىرلەپ, قازىلار القاسىنىڭ جۇمىسىنا جانە ۇلتتىق قۇراما رەزەرۆىن دايىنداۋعا تۇراقتى تۇردە قاتىسىپ كەلەدى. ونىڭ ازىرلەمەلەرى بىزدەن تىس ەلدەردە دە سۇرانىسقا يە بولىپ, ۇندىستانداعى جيناقتارعا جانە IOL ىرىكتەۋ تۋرلارىنا ەنگەن. سونداي-اق جاس مامان «QazGO» گەوگرافيا وليمپياداسى مەن نەمىس لينگۆيستيكا وليمپياداسىنىڭ (DOL) كوميتەت مۇشەسى.
وقۋشى كەزىنەن بىلىمدارلىعىمەن كوزگە تۇسكەن تالاپتى جاس ەل اتىنان «IOL», «iGeO» جانە «EGeO» حالىقارالىق وليمپيادالارىندا باق سىناپ, جۇلدەلى ورىنداردى يەلەندى. بۇگىندە ول جاتتىقتىرۋشى رەتىندە دە ناتيجەلى ەڭبەك ەتىپ ءجۇر. ونىڭ شاكىرتتەرى ازيا-تىنىق مۇحيتى لينگۆيستيكالىق وليمپياداسىندا جوعارى جەتىستىككە قول جەتكىزىپ, بيىلعى حالىقارالىق دودادا قۇرمەت گراموتاسىمەن ماراپاتتالدى.
قازىر NIS تۇلەگى گەرمانيانىڭ تيۋبينگەن ۋنيۆەرسيتەتىندە كومپيۋتەرلىك لينگۆيستيكا باعىتىندا ءبىلىم الىپ جاتىر. ايدانىڭ حالىقارالىق تاپسىرمالار كوميسسياسىنداعى جاڭا ءرولى – كاسىبي ءوسۋدىڭ كەلەسى كەزەڭى. بۇل مۇمكىندىك وعان جاھاندىق لينگۆيستيكالىق قاۋىمداستىقتىڭ دامۋىنا ۇلەس قوسىپ, ەلىمىزدى ساراپشىلىق دەڭگەيدە تانىستىرۋعا جول اشادى.
