فوتو: اشىق دەرەككوز
قالا اكىمدىگىنىڭ مالىمەتىنشە, ەلورداداعى جرۆي مەن تۇماۋدىڭ ءورشىپ تۇرعان كەزىندە دارىگەرلەر كۇنىنە 50-60 بالانى قابىلداعان. قازىر كورسەتكىش تومەندەگەنىمەن, ماۋسىم ءالى اياقتالعان جوق.
«بالالار ۆيرۋستى ءبىر-بىرىنە جۇقتىردى. قالادا جرۆي مەن تۇماۋ بىردەي تارالىپ ءجۇر. ۆيرۋستىق ينفەكتسيا جەڭىل وتەدى, تەمپەراتۋرانى تومەندەتەتىن دارىلەر كومەكتەسەدى, ال تۇماۋ الدەقايدا اۋىر وتەدى. جوعارى تەمپەراتۋرا بايقالادى, ونى ءتۇسىرۋ قيىنعا سوعادى. بالانىڭ جاعدايى السىرەيدى, ينتوكسيكاتسيا بايقالادى.قوسىمشا جوتەل, مۇرىن بىتەلۋى پايدا بولادى», دەدى دارىگەر.
پەدياتر اتا-انالاردى ءوز بەتىنشە ەمدەۋگە جول بەرمەۋگە جانە العاشقى سيمپتومدار پايدا بولعاندا دەرەۋ دارىگەرگە قارالۋعا شاقىردى.
«توسەكتە دەمالۋ قاجەت. كوپتەپ جىلى سۋسىن ىشكىزۋ كەرەك – سۋ, كومپوت, مورس. قانتتى شىرىندار مەن گازدالعان سۋسىنداردى ۋاقىتشا بەرۋگە بولمايدى. بولمەنى ۇنەمى جەلدەتىپ, دىمقىل كۇيگە اينالدىرۋ كەرەك, بالانى وراپ تاستاۋعا بولمايدى. سولعىن تارتىپ تۇرعاندىقتان, توڭىپ تۇرعانداي كورىنۋى مۇمكىن, سونىڭ اسەرىنەن قالىڭ كيىندىرگەندىكتەن, دەنە قىزۋى تىپتەن كوتەرىلۋى مۇمكىن.
تەمپەراتۋرانى تۇسىرەتىن بىرنەشە ءدارىنى ءبىر ۋاقىتتا بەرۋگە بولمايدى. ءدارى بەرىلگەننەن كەيىن تەمپەراتۋرا دەرەۋ 36,6 گرادۋسقا ءتۇسۋى كەرەك دەپ ويلاۋدىڭ قاجەتى جوق. ءبىر-ەكى گرادۋسقا تومەندەسە, بۇل ءدارىنىڭ اسەر ەتىپ جاتقانىن بىلدىرەدى.
تۇماۋ كەزىندە قابىنۋ, پنەۆمونيا, فارينگيت, تونزيلليت جانە تاعى باسقا اسقىنۋلار بولۋى مۇمكىن. كوزدىڭ كونيۋنكتيۆيتى, قىزارۋى, مۇرىننان قان كەتۋ دە بايقالۋى مۇمكىن», دەپ ءتۇسىندىردى ول.
تاعى ءبىر قاتەلىك – دارىگەردىڭ تاعايىنداۋىنسىز انتيبيوتيك قولدانۋ.
«بۇل قاتە, ويتكەنى تۇماۋ مەن جرۆي-دە ولار كومەكتەسپەيدى, اۋرۋدىڭ سەبەبى ۆيرۋستا, مۇندايدا انتيبيوتيكتىڭ قاجەتى جوق. ءبىز ولاردى تەك قابىنۋ نەمەسە پنەۆمونيا سەكىلدى اسقىنۋلار بولعاندا عانا تاعايىندايمىز. ونداي جاعدايدا دا دارىگەردىڭ نۇسقاۋىمەن, بالانىڭ جاسىن, سالماعىن جانە وزگە دە ەرەكشەلىكتەرىن ەسكەرە وتىرىپ قابىلداۋ كەرەك. ءوز بەتىمەن باستاۋعا بولمايدى, ويتكەنى باسقا دارىلەر سياقتى جاناما اسەرى بار. قاتە دوزادا قولدانسا, باۋىر مەن بۇيرەككە زاقىم كەلتىرۋى مۇمكىن. ءتىپتى ۆيرۋسقا قارسى دارىلەردى دە تەك دارىگەردىڭ تاعايىنداۋىمەن عانا قولدانۋ قاجەت», دەپ قورىتىندىلادى راۋشان تەكتىباەۆا.
