فوتو: ءماجىلىس
دەپۋتاتتىڭ ايتۋىنشا, وڭىرلەرگە ءىسساپارى كەزىندە 2-ءشى توپتاعى قانت ديابەتىمەن اۋىراتىن ءبىر توپ ازاماتتار قابىلداۋىندا بولىپ, ماسەلەلەرىمەن بولىسكەن ەكەن.
ء«بىر وبلىستىڭ وزىندە ولارعا تولەنەتىن بىرجولعى تولەم ءبىر اۋداندا تولەنسە, ءبىر اۋداندا تولەنبەيدى. بۇل تەڭسىزدىك – ءماسليحات شەشىمىنىڭ ءارتۇرلى بولۋىمەن بايلانىستى بولعاندىقتان, اتالعان شەشىمدى وزگەرتۋدى ۇسىندىم. الايدا, ءماسليحات «مينيسترلىكتىڭ قورىتىندىسى بولماسا شەشىمدى وزگەرتۋ مۇمكىن ەمەس», دەدى. ارينە, بۇدان كەيىن مينيسترلىككە حات جولدادىم. وكىنىشكە قاراي, مينيسترلىك ءماسليحاتتىڭ جاۋابىن جىبەرۋمەن شەكتەلدى», دەدى نۇرگۇل تاۋ.
وسىعان بايلانىستى ماجىلىسمەن ەكى سۇراعىن دەنساۋلىق مينيسترىنە قويدى.
«مينيسترلىك 2-ءشى توپتاعى قانت ديابەتىمەن اۋىراتىندارعا بىرجولعى تولەم قاراستىرۋعا بولاتىنى تۋرالى رەسمي قورىتىندى بەرە الا ما؟ وسى ماسەلەنى رەسپۋبليكا كولەمىندە ءبىر جۇيەگە ەنگىزۋ جوسپارلارىڭىزدا بار ما؟», دەدى دەپۋتات ن.تاۋ.
ءوز كەزەگىندە دەنساۋلىق ساقتاۋ ءمينيسترى اقمارال ءالنازاروۆا دەپۋتاتتىڭ اتالعان سۇراقتارىنا جاۋاپ بەردى.
«بۇل – جەرگىلىكتى ءوزىن-ءوزى باسقارۋ زاڭىمەن بەلگىلەنگەن. سوندىقتان ءار وبلىس ءوزىنىڭ وكىلەتتى ورگاندارىمەن بەكىتىلگەن ءتىزىمدى كەڭەيتۋگە-ازايتۋعا نەمەسە تىزىمگە قوسىمشا دياگنوزداردى قوسۋعا قۇقىقتارى بار. ال, بىركەلكى جۇيەگە كەلتىرۋ ماسەلەسىن قوسىمشا قارايتىن بولامىز», دەدى اقمارال ءالنازاروۆا.
