فوتو: ۇكىمەتتىڭ ءباسپاسوز قىزمەتى
150 شارشى مەتردەن اساتىن جاڭا عيمارات ءبىر اۋىسىمدا 25 ادامدى قابىلداۋعا ارنالعان. مەديتسينالىق پۋنكت اۋىلدىڭ 300-دەن استام تۇرعىنىنا ساپالى جانە ۋاقتىلى مەديتسينالىق قىزمەت كورسەتۋ مۇمكىندىگىن بەرەدى. نىسان زاماناۋي مەديتسينالىق جابدىقتارمەن قامتاماسىز ەتىلگەن.
«قۇرىلىس كەزىندە ينكليۋزيۆتىلىككە, قيمىل-قوزعالىسى شەكتەۋلى ادامداردىڭ قولجەتىمدىلىگىن قامتاماسىز ەتۋگە كوڭىل ءبولىندى. مەديتسينالىق نىساننىڭ اشىلۋى اۋىل تۇرعىندارىنىڭ العاشقى مەديتسينالىق-سانيتاريالىق كومەككە قولجەتىمدىلىگىن ارتتىرادى, سونداي-اق مەديتسينا قىزمەتكەرلەرىنىڭ ەڭبەك جاعدايىن جاقسارتادى. اقتوبە وبلىسىندا قايتارىلعان اكتيۆتەر قاراجاتى ەسەبىنەن قۇرىلعان ارناۋلى مەملەكەتتىك قوردان اۋىلدىق دەنساۋلىق ساقتاۋ سالاسى بويىنشا بارلىعى 11 جوبا جۇزەگە اسىرىلىپ جاتىر. بۇگىنگى تاڭدا 5 نىسان پايدالانۋعا بەرىلدى, التاۋىنىڭ قۇرىلىسى جالعاسۋدا», دەلىنگەن حابارلامادا.
جالپى, قايتارىلعان اكتيۆتەر ەلىمىزدە دەنساۋلىق ساقتاۋ سالاسىن دامىتۋعا باعىتتالعان. 2024-2025 جىلدارى ارناۋلى مەملەكەتتىك قوردان مەديتسينالىق نىسانداردى سالۋ جانە جاڭارتۋ ءۇشىن 144,2 ملرد تەڭگە ءبولىندى. بۇل اۋقىمدى ينفراقۇرىلىمدى جاڭارتۋ اۋىل تۇرعىندارىنا ساپالى مەديتسينالىق قىزمەتتەردى قالاعا بارماي-اق الۋعا مۇمكىندىك بەردى.
«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2022–2025 جىلدارى اۋىلدىق جەرلەردە 813 مەديتسينالىق نىسان سالىندى, ونىڭ ىشىندە 620 العاشقى مەديتسينالىق-سانيتاريالىق كومەك كورسەتۋ مەكەمەسى بار. 2024 جىلى 392 نىسان پايدالانۋعا بەرىلدى, ال 2025 جىلى تاعى 188 نىساننىڭ سالىنۋى جوسپارلانعان.
«زاماناۋي اۋدانارالىق اۋرۋحانالار مەن مساك جەلىسىن دامىتۋ ۇلت دەنساۋلىعىنىڭ كورسەتكىشتەرىن تىكەلەي جاقسارتتى. وسىلايشا, ونكولوگيالىق اۋرۋلاردى ەرتە انىقتاۋ 3,5%-عا ءوسىپ, 32,6%-دى قۇرادى, ال 60%-دان استامى باستاپقى ساتىسىندا دياگنوز قويىلادى. 23-ءى اۋداندىق اۋرۋحانالاردا ورنالاسقان 83 ينسۋلت ورتالىعىنىڭ جۇمىسى ترومبوليز ۇلەسىن 6%-عا دەيىن ارتتىرۋعا مۇمكىندىك بەردى. سونىمەن قاتار جاڭا مامانداندىرىلعان ورتالىقتاردىڭ اشىلۋى بالالارعا وڭالتۋ كومەگىنىڭ قولجەتىمدىلىگىن ەداۋىر ارتتىردى», دەلىنگەن حابارلامادا.
مەديتسينا ينفراقۇرىلىمىن جاقسارتۋ جانە قىزمەت كورسەتۋ ساپاسىن ارتتىرۋعا باعىتتالعان كەشەندى شارالار اۋىل تۇرعىندارىنىڭ ءومىر ءسۇرۋ ۇزاقتىعىنا وڭ اسەرىن تيگىزىپ, 2024 جىلدىڭ قورىتىندىسى بويىنشا بۇل كورسەتكىش 74,2 جاسقا جەتتى.
