جاڭا ەرەجەلەر جوباسىنا سايكەس, بانكتەر قارىز الۋشىنىڭ مىندەتتى الەۋمەتتىك مەديتسينالىق ساقتاندىرۋعا, مىندەتتى الەۋمەتتىك ساقتاندىرۋعا جانە باسقا دا مىندەتتى تولەمدەرگە قارىزى بار-جوعىن تەكسەرۋگە ءتيىس. بۇل مالىمەتتەر قارىز الۋشىنىڭ تاۋەكەلدىك ءپروفيلىن قالىپتاستىرۋ كەزىندە ەسەپكە الىنادى جانە نەسيە بەرۋ شەشىمىنە ىقپال ەتۋى مۇمكىن.
قۇجاتتا كورسەتىلگەندەي, مىندەتتى الەۋمەتتىك مەديتسينالىق ساقتاندىرۋ جۇيەسى ىسكە قوسىلعاننان بەرى كوپشىلىك ازاماتتاردا تۇراقتى قارجىلىق ءتارتىپ قالىپتاسقانىمەن, كەيبىر ادامداردا تولەم بويىنشا قارىزدار جينالىپ قالعان.
«مىندەتتى الەۋمەتتىك مەديتسينالىق ساقتاندىرۋعا تولەم جاساماۋ بانكتەر ءۇشىن قوسىمشا تاۋەكەلدەر تۋعىزادى. سەبەبى مىندەتتى تولەمدەردى ۋاقىتىلى نەمەسە ادەيى تولەمەۋ قارىز الۋشىنىڭ قارجىلىق جاۋاپكەرشىلىگىنىڭ تومەندىگىن كورسەتەدى جانە ونىڭ نەسيە مىندەتتەمەلەرىن بۇزۋ ىقتيمالدىعىن ارتتىرادى», دەلىنگەن قۇجاتتا.
سونىمەن قاتار, مىندەتتى الەۋمەتتىك مەديتسينالىق ساقتاندىرۋعا جارنا تولەمەگەن ازاماتتار ساقتاندىرۋ جۇيەسى ارقىلى مەديتسينالىق كومەككە قول جەتكىزە المايدى. بۇل جاعداي اۋرۋعا شالدىعۋ, ەڭبەككە جارامسىزدىق نەمەسە مۇگەدەكتىك تۋىنداعان كەزدە ولاردىڭ تولەم قابىلەتتىلىگىن تومەندەتىپ, بانكتەر ءۇشىن كرەديتتىك تاۋەكەلدەردى كۇشەيتەدى.
جاڭا تالاپتار مىناداي كولەمدەگى نەسيەلەرگە قولدانىلادى:
- ءىرى بانكتەر ءۇشىن (كاپيتالى 100 ميلليارد تەڭگەدەن جوعارى) – قارىز الۋشىنىڭ نەسيە جانە شارتتى مىندەتتەمەلەرىنىڭ جالپى سوماسى بانكتىڭ كاپيتالىنىڭ 0,01 پايىزىنان اسسا;
- كاپيتالى تومەن بانكتەر ءۇشىن – بۇل كورسەتكىش 0,02 پايىزدان اسسا.
وسىنداي قارىز الۋشىلارعا بانك كەڭەيتىلگەن تالداۋ جۇرگىزەدى. ەندى بۇل تالداۋعا مىندەتتى الەۋمەتتىك مەديتسينالىق ساقتاندىرۋ بويىنشا قارىزدار تۋرالى اقپارات رەسمي تۇردە ەنگىزىلەدى.
