سۋرەتتى تۇسىرگەن – ەرلان ومار, «EQ»
باعدارلاماعا اۋىلدار مەن اۋدان ورتالىقتارىنا جۇمىس ىستەۋگە كەلگەن تۇرعىندار قاتىسا الادى. نەسيە قاراجاتىن ءۇي ساتىپ الۋعا نەمەسە سالۋعا پايدالانۋعا بولادى. نەسيەنىڭ ەڭ جوعارى سوماسى – 2 500 ايلىق ەسەپتىك كورسەتكىش (اەك) نەمەسە 9 830 000 تەڭگە, مەرزىمى – 15 جىلعا دەيىن.
سونىمەن قاتار اۋىل تۇرعىندارى كوتەرمە جاردەماقى دا الادى. بۇل بيىل 100 اەك نەمەسە 393 200 تەڭگە كولەمىندەگى بىرجولعى تولەم بولدى. ول ءۇيدى جابدىقتاۋعا, العاشقى قاجەتتى زاتتاردى ساتىپ الۋعا كومەكتەسەدى.
قارجىلاندىرۋدى مەملەكەت جۇزەگە اسىرادى. باعدارلاماعا تەحنيكالىق, كاسىپتىك, جوعارى نەمەسە جوعارى وقۋ ورنىنان كەيىنگى ءبىلىمى بار, سونداي-اق كەمىندە ءۇش جىل ەڭبەك ءوتىلى بار تۇرعىندار قاتىسا الادى. قاتىسۋشىلار ءبىلىم بەرۋ, دەنساۋلىق ساقتاۋ, الەۋمەتتىك قامسىزداندىرۋ, اگروونەركاسىپ كەشەنى, مادەنيەت, سپورت, اۋىلدىق وكرۋگتەر اكىمدەرى اپپاراتتارىنداعى مەملەكەتتىك قىزمەت (اكىمدەر مەن ولاردىڭ ورىنباسارلارىن قوسپاعاندا) سىندى سۇرانىسقا يە سالالاردا جۇمىس ىستەۋگە ءتيىس.
جىل سايىن جەرگىلىكتى اكىمدىكتەر جوعارىدا اتالعان باعىتتار جونىندە سۇرانىسقا يە ماماندار ءتىزىمىن جاسايدى. نەسيەلەر ءدال وسى ءتىزىم اياسىندا بەرىلەدى. سوندىقتان باعدارلاماعا قاتىسقىسى كەلەتىن ازاماتتار ەڭ الدىمەن, ءوز ەلدى مەكەنىنىڭ اكىمدىگىنە بارىپ, قاي ماماندىقتاردىڭ قاجەت ەكەنىن ناقتىلاۋى كەرەك. ەگەر اكىمدىك, مىسالى, دارىگەر نەمەسە اگرونوم قاجەت ەكەنىن راستاپ, تۇرعىندى تۇرعىن ءۇي ماسەلەسىن شەشۋدە قولداۋعا دايىن بولسا, وندا مامانعا باعىتتاما بەرەدى. وسىدان كەيىن اۋىل تۇرعىنى Baspana Market (otbasybank.kz) پورتالىندا ءوتىنىم بەرە الادى.
«ديپلوممەن – اۋىلعا!» باعدارلاماسى قوستاناي وبلىسىنىڭ تۇرعىنى, ءۇش بالانىڭ اكەسى ۆالەري بارىشەۆكە باستاپقى جارناسىز ءوز ءۇيىن ساتىپ الۋعا مۇمكىندىك بەردى. بىرنەشە جىل بۇرىن ۋنيۆەرسيتەتتى تامامداعان جاس مامانعا قالادا ءوز ماماندىعىنا ساي جۇمىس تابۋ, باسپانا ماسەلەسىن شەشۋ قيىنعا سوقتى. پاتەراقى قىمبات, باستاپقى جارناعا قاراجات جيناۋ مۇمكىن ەمەس. سول سەبەپتى كالينين اۋىلدىق وكرۋگىنىڭ اكىمدىگىنە مامان بولىپ جۇمىسقا ورنالاسىپ, اۋىلدا ءوز باعىن سىناپ كورۋدى ۇيعارعان. سول جەردە «ديپلوممەن – اۋىلعا!» باعدارلاماسى تۋرالى بىلگەن.
– «ديپلوممەن – اۋىلعا!» باعدارلاماسى بولماعاندا, ءبىز ءالى دە باسپاناسىز جۇرەتىن ەدىك. تۇرعىن ءۇي ماسەلەسىن شەشۋگە ارنالعان مۇمكىندىكتى بارىنشا پايدالانۋ كەرەك. قالادا جىلدار بويى جالدامالى پاتەردە تۇرۋعا بولادى, ال اۋىلدا وسىلاي تەز ارادا باسپانالى بولىپ, بالالاردى جايلى ورتادا وسىرۋگە مۇمكىندىك بار, – دەيدى قۋانىشىمەن بولىسكەن ۆ.بارىشەۆ.
«ديپلوممەن – اۋىلعا!» باعدارلاماسىنىڭ وپەراتورى – «وتباسى بانك». بانك ءوتىنىم قابىلداۋ مەن نەسيە بەرۋ ۇدەرىسىن تولىعىمەن ونلاين فورماتقا اۋىستىردى. ويتكەنى كوپتەگەن اۋىل بانك بولىمشەلەرىنەن الىس ورنالاسقان. قاشىقتان قىزمەت كورسەتۋ ازاماتتاردىڭ ۋاقىتىن ۇنەمدەپ, مەملەكەتتىك قولداۋعا قول جەتكىزۋ ۇدەرىسىن ەداۋىر جەدەلدەتتى. سونىمەن قاتار «وتباسى بانك» اكىمدىكتەرمەن دەرەكتەر الماسۋدى اۆتوماتتاندىردى. بۇل كەلىسۋ مەرزىمدەرىن قىسقارتۋعا, قاراجات ءبولۋ اشىقتىعىن ارتتىرۋعا, كليەنتتەرگە قولايلى جاعداي جاساۋعا مۇمكىندىك بەردى. باعدارلاما قاتىسۋشىلارى ءوتىنىم مارتەبەسى مەن حابارلامالاردى ونلاين الادى, سونداي-اق نەسيەنى مەرزىمىنەن بۇرىن ونلاين وتەي الادى. باعدارلاما ءوز تيىمدىلىگىن دالەلدەدى. ول وڭىرلەردە, اۋىلدىق جەرلەردە بىلىكتى كادرلاردى ۇستاپ قالۋعا ناقتى كومەكتەسىپ وتىر. كەيىنگى ەكى جىلدا وسى باعدارلامانىڭ ارقاسىندا 7 188 وتباسى باسپانا ماسەلەسىن شەشتى. 2023 جىلى 17,7 ملرد تەڭگەگە 3 483 نەسيە بەرىلدى, 2024 جىلى 29,6 ملرد تەڭگەگە 3 705 نەسيە راسىمدەلدى.
